Azaya 44

Wina'am gaŋ Israel
1 “Zugsɔb la yɛl ye;
“Jakob yaasɛ, kɛlisimi, ya anɛ man tʋmtʋmnib,
manɛ gaŋ Israel.
2 Manɛ an Zugsɔb onɛ maalif
ka ya'abi fʋ niŋi fʋ ma pʋʋgin,
ka an onɛ na sʋ'ʋŋif.
M tʋmtʋm Jakob, da zɔt dabiem,
fʋnɛ an onɛ ka m gaŋ.
3 M na kpa'ae ku'om niŋ teŋ la zin'ikanɛ ka ku'om kae,
ka kɛ ka ku'om pʋbid zin'ikanɛ ka teŋ la an kpi'emis;
M na kpa'ae m Siig n niŋi ya biis zug,
ka m albareka na bɛɛ tisi ya yaas la.
4 Ba na nɔbigid tɔ'ɔtɔ wʋʋ mɔɔd nɛ,
ka nwɛnɛ tibanɛ bɛ kɔldaug nɔɔrin nɛ.
5 Sɔ' na yɛl ye, ‘Man anɛ Zugsɔb la din’,
ka sɔ' mɛ na buol o mɛŋ ye, ‘Jakob yaaŋ’;
hali sɔ' na sɔb man Zugsɔb yʋ'ʋri niŋ o nu'ugin,
ka na ye o anɛ Israel nid.”
Li anɛ Zugsɔb ka ka' badaa
6 “Zugsɔb la yɛl si'eli nwa';
Zugsɔb onɛ an Paŋtita'ar Sɔb la,
onɛ an Israel na'ab nɛ ba Faangid.
Manɛ an pin'ilʋg ka an naar;
li ya'a ka' manɛ, Wina'am lɛn kae.
7 Anɔ'ɔnɛ nwɛnɛ mam? Li sɔb yim paalʋ na yɛl nyain.
Kɛl ka o nie linɛ da niŋ kʋdimin sa nyain pa'alim
man da pin'ili maal nidib la, nɛ linɛ na ti niŋ.
Ɛɛn, kɛl ka o yɛl linɛ na ti kena.
8 Da kirida, mɛ da zɔt dabiem.
M pʋ mɔɔl nɛ' yɛla ka pian' li yɛla ka li yuugɛɛ?
Ya anɛ m kasɛtib. Wina'am si'a lɛm bɛɛ paas man zugɔɔ?
Ayei, tampiing lɛn kae, baa yinnee.”
9 Banɛ maan bada la wʋsa anɛ zaalim,
ka linɛ ka ba gɔs ka li an nyɔɔdi tisi ba la ka' gbinnɛ.
Banɛ pian'adi ba yɛla la anɛ zʋnzɔɔs;
nyan kanɛ bɛɛ ba zugin la ba zi'.
10 Anɔ'ɔnɛ kpi'a win ka maal ba'ar
linɛ kʋ nyaŋi sʋŋ o?
11 On nɛ o buudi la wʋsa na di nyan;
banɛ kpi'ed la ka' si'ela, ba anɛ ninsaalib.
Kɛl ka ba wʋsa la'asi yɛli ba zi'esim;
dabiem nɛ yʋ'ʋsan'auŋ na paae ba.
12 Onɛ kʋnt la mɔri tʋʋma laukʋ tʋm,
o mɔri lii tʋm nɛ bugumsaana;
o mɔri zan'ari kʋnti li,
o nu'ug paŋ ka o mɔri tʋm.
O kɔ'ɔm ɛɛnti zabid ka o paŋ naae;
ku'onuud ya'a nyaŋ o, o na tadig.
13 Kampinta la mɔr nwiigi makid
ka mɔr linɛ makidi zanbinnɛ li bɛn;
ka kpi'edi li nɛ lieŋ
ka nɔk linɛ makidi pa'annɛ li zemisʋg la makid.
O maannɛ li ka li nwɛnɛ nid nɛ,
ka o vɛnlim wʋsa nwɛnɛ nid,
ka kpɛn'ɛs o teŋgban dɔɔgin.
14 O na nwaae na'aziinr,
bɛɛ tikanɛ daadi mɔr paŋ.
O paamid tiis la nɛ mɔɔgin,
bɛɛ o sɛ ka saa ni ka ba nɔbig.
15 Daad anɛ linɛ ka ninsaal na nɔki nyu'oe bugum;
o nɔkid sieba nyu'od bugum ʋʋsid,
ka nɔkid sieba nyu'oe bugum sɛn'ɛd bodobodo.
Amaa ka lɛn nɔki li maal win ka wɔ'ɔgidi li;
o nɔkidi li maan ba'ar ka igini li tuon.
16 Daad la pʋsʋk o na nɔki nyu'oe bugum dʋg diib,
ka sɛn' ni'im bugumin la ɔnbi tig.
O na lɛn ʋʋs ka yɛl ye,
“Aa, man nyɛ bugum la, waad yi ya!”
17 Linɛ kpɛlim la o na nɔki maal o win bɛɛ ba'ar;
ka igini li tuonnɛ na'asi li.
O na sɔsi li ka yɛl ye,
“Faanmim ka fʋnɛ aan m win!”
18 Ba zi' si'el si'ela, ka mɛ pʋ gban'ad si'el gbinnɛ,
ba ligili ba nini ka ba pʋ nyɛta,
ka ba pʋtɛnda digilim la zug ba pʋ gban'ad si'el gbinnɛ.
19 Ninkanɛ maan bada nwa' pʋ mɔr pʋtɛn'ɛr
bɛɛ baŋir bɛɛ gban'ad si'el gbin ka na yɛl ye,
“M nɔk daug la pʋsʋkʋ nyu'oe bugum;
hali ka sɛn' bodobodo li bugumsaana la zug,
ka mɛ sɛn' ni'imi anina ɔnbɛ.
Wala ka m na lɛn nɔk linɛ kpɛlim la maal ba'arɛ?
Li pʋ nar ye m igin daug tuonnɛ pʋ'ʋsɛ.”
20 Ninkanɛ dit tampɛligim gba sɔn o.
O pʋtɛn'ɛbɛ'ɛd la ma'ad o nɛ kpɛn'ɛsid mɔɔg;
o kʋ nyaŋi faaɛn o mɛŋ bɛɛ siaki yɛl ye,
“Linɛ bɛɛ m datiuŋ nu'ugin nwa' kʋ tun'e an Wina'am.”
21 “Israel nidiba, tɛn'ɛsimi nɛ'ɛnam yɛla,
bɔzugɔ ya anɛ man tʋmtʋmnib;
m kʋ tami ya yɛlaa.
22 M uusi fʋ tʋʋmbɛ'ɛd la wʋʋ saŋgbana nɛ,
fʋ tʋʋmbɛ'ɛd linɛ nwɛnɛ bɛogʋn mɛligim la.
Lɛmmi m san'an na,
ka manɛ faanf.”
23 Saŋgbana, yʋ'ʋmmi nɛ sumalisim, Zugsɔb la maal nɛ' la zug;
tansiminɛ agɔla yanam banɛ bɛ teŋ teŋir la.
Zuoya, yʋ'ʋmmi nɛ sumalisim,
nɛ tiis banɛ bɛ sian'arin la wʋsa,
Zugsɔb la faaɛn Jakob,
o nɔk o na'am la tis Israel.
Israel na paam zin'ig
24 Zugsɔb onɛ aan fʋ Faangid,
ka maali fʋ niŋi fʋ ma pʋʋgin la yɛl si'eli nwa':
“Manɛ an Zugsɔb
onɛ maal si'el wʋsa la,
ka tiɛn saŋgbana la yadig,
manɛ tɛk teŋgbauŋ la yadigi li m mɛŋ.
25 Manɛ kɛt ka ba'abʋgʋdibi yɛt si'el la lieb zaalim
ka kɛ ka banɛ ye ba nyɛt bɛog sa yɛla la lieb zɔn,
ka yis banɛ zamis hali la ya'am
ka kɛ ka li lieb yalimis.
26 Manɛ kɛt ka m tʋmtʋmnib la yɛt si'el la maan,
ka kɛ ka ban yɛt ye si'el na ti maal la niŋ amɛŋa.
Manɛ yɛt Jerusalem yɛla ye, ‘Nidib na bɛ tempʋʋgin la,’
ka yɛt Juda teŋ la yɛla ye, ‘Ba na mɛɛ li,’
ka mɛ yɛli ba dabɔɔd la yɛla ye, ‘M na mɛɛ ba ya'as.’
27 Manɛ yɛt ku'okanɛ zulim la ye li kpiɛnm,
ka kɛt ka li ku'osuoya kʋdigid.
28 Manɛ yɛl Sarus yɛla ye, ‘O anɛ m kɔnbkem
ka na maal linɛ wʋsa an sʋm tisim.
O na yɛl Jerusalem yɛla ye, “Kɛl ka li lɛn lɛbi mɛ'!”
Ka yɛl Pʋ'ʋsim Yir la ye, “Kɛl ka li ɛɛnbir la ɛɛnb.”’”