Azaya 63

Wina'am sam yɔɔb nɛ o faangir dabisir 1 Anɔ'ɔnɛ nwa' yi Edom teŋgbauŋʋn kenna, anɔ'ɔnɛ mɛ yi Bozira tempʋʋgin kenna ka o fuud si' mu'oe wala? Anɔ'ɔnɛ nwa' yɛ fuvɛnla, bɛ tuonnɛ nɔɔd vugur vuguri ken nɛ paŋ wala? “Li anɛ mam, m pian'ad nɛ pʋpielim, ka mɔr paŋi na nyaŋi faaɛn ya.” 2 Bɔ ka fʋ fuud mu'oe nwɛnɛ onɛ nɔɔd tiis wala maan daam? 3“ Mam ma'aa bɛ zin'ikanɛ ka ba nwi'asid tiis wala la; buudi la wʋsa ni, sɔ' daa pʋ sʋŋi ma. Ka dinzug ka m nɔɔ ba nɛ sʋnpɛɛn ka nɔɔ ba teŋin nɛ ɛndʋg; ka ba ziim tɔn'ɔsi madi m fuud, ka m fuud la wʋsa si'. 4 Saŋa paae ya ka m na yɔɔ m dataas la sam, ka faanm nidib la bas. 5 M gɔsi gilig ka sɔ' kae na sʋŋi ma, ka li pakim nɛ sɔ' kae na sʋŋim la; ala ka m mɛŋ paŋ tʋm tisim faangir, ka m mɛŋ sʋnpɛɛn tisim kpi'euŋ ka m ken tuon. 6 M nɔ tɛɛns la nɛ m sʋnpɛɛn; m sʋʋnri duoe ka m kɛ ka li wʋmi ba ka ba ziim kpa'ae teŋin.” Zun'or nɛ winsɔsʋg 7 M na yɛl Zugsɔb la pʋpielim an si'em on maal si'el ka li nar ye ba wɔ'ɔg o la, ka li dɔl wʋʋ Zugsɔb la maal si'eli tisi ti la. Asida, o maal yɛlsʋma bɛdegʋ tis Israel yidim, ka li anɛ o nimbaanlzɔɔr nɛ o pʋpielim piini la zug. 8 O yɛl ye, “Asida ba anɛ m nidib, ba anɛ m bibanɛ kʋ faa ma,” dinzug ka o liebi ba Faangid. 9 Ba sʋnsa'aŋ wʋsa pɔɔgin, o mɛ daa mɔr sʋnsa'aŋ, ka o tʋm maliak kanɛ bɛɛ o san'an la ka o faaɛn ba O nɔŋilim nɛ o nimbaanlzɔɔr la zug ka o faaɛn ba; ka ʋki ba agɔlaa zi, yʋʋmpʋkʋda la saŋa sa. 10 La'an nɛ wala ba zan'as o ka san'am o Siig Kasi la sʋʋnr. Ala ka o liebi ba dataa, ka o mɛŋ zab nɛ ba. 11 Ani ka o nidib la tiɛn Moses zʋmaana la yɛla ka bu'os ye, “Onɛ da nɔk o paŋtita'ari mɔri ba yina la bɛ ya? Onɛ mɛ dɔlli ba atɛukʋn kena nɛ o kɔnbkemnib la bɛ ya? On kanɛ da nɔk o Siig Kasi niŋi ba sʋʋgin la bɛ ya? 12 Onɛ da nɔk o paŋtita'ari dɔlis Moses ni buak atɛuk dinɛ da bɛɛ ba tuon ka li kɛ ka ba dʋ'ʋs o yʋ'ʋr saŋa linɛ ka' bɛnnɛ. 13 Onɛ da dɔlli ba yi zin'izulima zin'igin ka ba nwɛnɛ wiedbanɛ zɔt paalʋ ni, ka pʋ tu'ugida. 14 Ba nwɛnɛ niigi sigid bɔn'ɔgin nɛ, ka Zugsɔb la Siig tisi ba vʋ'ʋsʋm. Fʋn daa guri fʋ nidib la si'em nwa' ye fʋ da' yʋ'ʋtita'are tisi fʋ mɛŋ”. 15 Naanim arezana ni gɔs na fʋ na'am zin'ig linɛ an kasi ka vɛnl hali la. Fʋ paŋ nɛ fʋ kpi'euŋ la wʋsa kpɛlim yaanɛ? Fʋ pʋ lɛn zɔti ti nimbaanlig bɛɛ mɔri ti nyɔɔgɔ. 16 Amaa fʋnɛ aan ti ba' la'an nɛ Abraham zi' ti la, ka Israel mɛ zan'asi ti la; Oo Zugsɔba, fʋnɛ aan ti ba', ka fʋ yʋ'ʋr buon Faangid kʋdimin sa. 17 Oo Zugsɔba, bɔ ka fʋ kɛ ka ti yidigi fʋ suoya la ka digilimi ti sʋnya ka pʋ lɛn na'asidi fɔ? Tinam banɛ aan fʋ tʋmtʋmnib nɛ buudkanɛ aan fʋ din la zugɔɔ, lɛm na. 18 Fʋ nidib la da sʋ'ʋgi fʋ teŋ kanɛ an kasi la ka li pʋ yuugɛ, amaa nannanna, ti dataas la kpɛn' teŋ la ni ka nwa'asi fʋ Pʋ'ʋsim Yir linɛ an kasi la digil teŋinɛ nɔɔd. 19Ti anɛ fʋ din kʋdimin sa; amaa fʋ pʋ sʋ'ʋg nimbanɛ, ba pʋ mɔri fʋ yʋ'ʋri buonnɛ baa.