Azaya 7

Azaya n mɔr labaar na tis na'ab Ahaz la yɛla

1 Ahaz onɛ da an Na'ab Jotam biig ka o yaab an Na'ab Uzia la da di na'am Juda sʋ'ʋlimin saŋsi'a la, Aram na'ab Rezin nɛ Remalaya onɛ an Israel na'ab la biig Peka da duoe keŋ ye ba zab nɛ Jerusalem teŋ dim, amaa ka da pʋ nyaŋi baa.
2 Ba da yɛl David yidim banɛ an na'am tuŋ dim la ye, “Aram dim la la'as nɛ Efiram dimi naal nɔɔr”; ka Ahaz nɛ o nidib la wʋsa ya'am iank, ka ba susʋnya dammid wʋʋ sisi'em na da'ad tiis vaand ka li dammid si'em la.
3 Ani ka Zugsɔb la yɛl Azaya ye, “Fʋn nɛ fʋ biig Sear-Jasuob yim keŋ tʋ'ʋs Na'ab Ahaz, ka o bɛ ku'osuokanɛ ka ku'om naanid bɛuŋ kanɛ bɛ zugin la pʋbidi dɔl la naarin. Suokanɛ ka banɛ piesid piena tʋm la.
4 Kem yɛl o ye, Gu'usim, ka an baanlimm ka da zɔt dabiem. Da kɛ ka fʋ ya'am ian'ad Na'ab Rezin nɛ Aram dim nɛ Na'ab Remalaya sʋnfʋ duoe nɛ ya la zugɔ. Ba nwɛnɛ nyɔ'ɔsi na yit bugum dagbida ayi' ni na nɛ
5 Aram nɛ Efiram dim, nɛ Remalaya biig la sid gban'e fʋ yɛla bɛ'ɛdi yɛt ye,
6 ‘Kɛl ka ti keŋ zab nɛ Juda, kpɛn'ɛs nidib la dabiem ka faaɛn teŋ la sʋ'oe, ka diis Tabeel biig la na'am ka o gur zin'ig la tisi ti.’
7 Amaa la'an nɛ wala, Zugsɔb Paŋtita'ar Sɔb la yɛl ye,
“Ayei! Li kʋ zi'enɛ,
li kʋ nyaŋi maalɛ.
8 Bɔzugɔ, Damaskus tempʋʋgʋ sʋ'oe Aram teŋ la sʋ'ʋlim,
ka Rezin mɛ sʋ'oe Damaskus.
Lin yi nannanna ti paae yʋma pisyuobʋ nɛ anu la, Efiram teŋ la na widig hali
ka ba kʋ lɛm buonnɛ ba ye sʋ'ʋlim ya'asɛ.
9 Samaria tempʋʋgʋ mɛ sʋ'oe Efiram teŋ la sʋ'ʋlim,
ka Remalaya biig Na'ab Peka mɛ sʋ'oe Samaria.
Ya ya'a pʋ zi'en sʋ'ʋŋa nɛ yadda,
ya kʋdim kʋ nyaŋi zi'en kiŋ-kiŋ nɛ.”
10 Zugsɔb la da lɛm pian' tis Ahaz ye,
11 “Sɔsimi fʋ Zugsɔb Wina'am la ka o tisif zanbin kanɛ na maal teŋ teŋir sa bɛɛ agɔla gɔla.”
12 Amaa ka Ahaz lɛbis ye, “M kʋ sɔsɛ. M kʋ maki m Zugsɔba.”
13 Ka Azaya lɛbis ye, Yanam David yidima, kɛlisimi. Yanamɛ mak saalib summɔtir la li pʋ siakɛɛ, ka ya yʋ'ʋn bɔɔd ye ya maki m Wina'am la summɔtirɛɛ?

14 † Dinzugɔ, Zugsɔb la mɛŋ na pa'ali ya zanbin kaŋa:

Pu'asadir na tʋk pʋʋgʋ du'a biribiŋ
ka ba na pʋd o, o yʋ'ʋr ye Immanuel.a

15 O ya'a ti nɔbigi na nyaŋi zan'as bʋmbɛ'ɛd ka gaŋ linɛ an sʋm la, o diib na anɛ bin'isim nɛ siind.

16 Amaa saŋkanɛ ka biig la ti mɔr ya'am na bak sʋm nɛ bɛ'ɛd la, li saŋa ka na'anama ayi' banɛ ka fʋ zɔt la tɛɛns na lieb dabɔɔd.
17 Zugsɔb la na kɛ ka dabisbɛ'og lu fʋn nɛ fʋ nidib nɛ fʋ saam yidim la zugin. Yɛlbanɛ nan zi' paae ya lin yi saŋkanɛ ka Efiram da aaɛn yi Juda sʋ'ʋlimin la hali ti paae zina. O na kɛ ka Asiria na'ab la kena zab nɛ ya.
18 Dabiskan daar ya'a ti paae, Zugsɔb la na vʋʋli buol pʋmpɔɔs Egipt kɔldaadin la sa ka ba yina, ka siins mɛ yi Asiria na.

19 Ba na kena pɛ'ɛl bɔn'ɔzulima la, nɛ tampinlɛma la ni, ka na tabin gɔn'ɔs tiis ka pɛ'ɛl kɔlis la wʋsa. 20 Daakan la Zugsɔb la na nɔk barig Efiritis kɔldaug la lɔ'ɔm, ka li anɛ Asiria na'ab la. O na pʋni ya zut ka pʋni ya nɔba kɔnbilʋg ka mɛ kɔɔnsi ya tiemis.

21 Saŋkan la, dau sɔ' ya'a nan kpɛm mɔr na'asa'a yinne nɛ kɔnbid ayi' li anɛ zusʋŋ.

22 Ba bin'isim na zu'oe hali ka o na mɔr bin'iskpaam dit. Banɛ kpɛlim teŋin la wʋsa na dit bin'iskpaam nɛ siind. 23 Li saŋa la, vain pɔsʋma banɛ ka vain tiis tusir daa bɛ ka ba na kuos ka li paae anzurifa ligidi tusir la, tutuud nɛ gɔn'ɔs na faaɛn zin'ig la. 24 Banɛ ken ani wʋsa na mɔr tiraad nɛ piema ken bɔzugɔ, zin'ig la na anɛ tutuud nɛ gɔn'ɔs ma'aa.

25 Ya'a kpɛlim nɛ kʋkʋna banɛ ka ba da kuod nɛ kʋnya la, ya kʋ lɛn li'eli ani ya'asɛ bɔzugɔ ya na zɔt dabiem tutuud nɛ gɔn'ɔsi galis la zug. Niigi nɛ kɔnbid ma'aa na bɛɛ ani.