Ghana Immigration Service

Ghana Immigration Service

government agency

Inception	1989
Country	Ghana
Official website	https://home.gis.gov.gh/

Ghana Immigration Service anɛ gɔmina lugur kanɛ bɛ Ghana Ministry of Interior ni. Banɛ gɔsid biis karim gaad taaba yɛlla nɛ banɛ bɔɔd ye ba tu suor yi Ghana keŋ teŋ sieba. Ba mɛ gɔsid mɛɛb zin'is yɛlla ka gɔsid saam banɛ bɛ kpen' Ghana la yɛlla, ka mɛ sʋŋid banɛ bɔɔd gbana banɛ na nyaŋi nɔki tu suor. Ka mɛ lɛn gɔsis Ghana tutɔndis yɛlla,  nɛ banɛ ka di muki ba ba tɛɛnsin k ba zɔti kpɛn'ɛd na la ye ba na mɔr gbana banɛ nar ye ba mɔr wʋsa. Ba mɛ lɛn sa'an nidib ka pa'anɛ ba wada nam nɛ lin nar ye badɔlisi li siem, li kas-kas anɛ immigration dim yɛlla. Fʋ tʋn'e buol bɛɛ sɔbi niŋi ba baŋ wiin'ig kaŋa  fʋ ya'a bɔɔd sʋŋir 0539802748.

Pin’inlig

Ghana da nam pʋ paami ba mԑŋi yi Britain nu’ugin la, ba da buoni lʋgir la yiiga nԑ Immigration and Passport Unit, ka da bԑnԑ Colonial Police Force banԑ da bԑ Gold Coast la nu’usin. Onԑ da an ba tuongat anԑ Nevile C. Hill.

Ghana da sʋ’ʋg o mԑŋ yʋʋm tusir, kͻbiswai nԑ pisnu nԑ ayͻpͻi ni la, kpikpiŋ da nͻbig ya ka nidib yit katԑŋi kpԑn’ԑd na ye ba kpiis. Lin da an ye Ghana dimi da gaad tuoni sʋ’ʋgi ba mԑŋ sankpan’asim pʋʋgin la, nidib banԑ da kpԑn’ԑd na ye ba gͻs tԑŋ la, li kaskas anԑ tԑԑns banԑ bԑ African sʋ’ʋlim, da zuoe nԑ. yʋʋm tusir, kͻbiswai nԑ pisyuobʋ ka kpԑԑmnam zin’in ka la’asi gban’ae ye ba nͻk Immigration and Passport Unit ka li an lʋgir yinnԑ paas Ministry of the Interior. Lin nya’aŋ ka ba nͻki li niŋ Ministry of Foreign Affairs nu’usin ye ba tis nidib suor kԑn gbana.

Ban da zaŋ Immigration Service niŋ Ministry of Interior nu’usin la yʋma atan’ ya’aŋ, ka Aliens Act 1963 (Act 160) da kԑna tisi ba paŋ ye ba tʋmi ba tʋʋma. Ghana Immigration Service da pin’il nԑ yʋʋm tusir, kͻbiswai nԑ pisnii nԑ awai ni, da dͻlisnԑ PNDC Law 226.

Tʋʋma

Immigration Service tʋʋma anԑ ye ba gͻs nidib banԑ kae tԑŋ nwa nidib yela tisi ba. Ba tʋʋma nwa’:

1. Ye ba maal suor lin na niŋ si’em ka nidib banԑ kae tԑŋ kaŋa nidib dͻlis wada nyaŋi kpԑn’ԑ Ghana na, ka mͻr ya’ Ghana ka mԑ paam suori tʋm tʋʋma.
2. Ye li sʋŋ ka tԑŋ la malima kԑŋ tuon, ka maal suor kanԑ ka nidib na dͻlisi kpԑn’ԑ na gͻs tԑŋ la, mͻr ligidi kpԑn’ԑ na tʋm tʋʋma ka ya’am iansig da bԑԑ.

Paaspͻt paamig

Banԑ maan Ghana paaspͻt tisid nidib anԑ ministry of Foreign Affairs and Regional Integration ka ka’ Ghana Immigration Service dima. Ghana Immigration Service dim bԑnԑ an suor ka nidib dͻlisidi ka paamid paaspͻt la ka ka’ banԑ maanna.

Ba dͻlisid suoya ayuobʋ bama ka paamid Ghana paaspͻt:

1. Da’am paaspͻt gbaŋ zaalig la ban kuosid zin’ig si’eba (banki si’eba ni)
2. Sͻm bʋnlinԑ wʋsa bԑ ye ba sͻbi pa’al ban an sͻ’ ka paas dʋ’am gbaŋ nԑ gbaŋ si’eba tis lin tisid zin’ig sia.
3. Ba mͻr zin’ig kanԑ tikid nu’ug ka mԑ kied nid la fͻtͻ
4. Di’em gbaŋ kanԑ pa’al ye fʋ maal linԑ lar wʋsa naae, ka baŋ daar kanԑ ka fʋ na di’e li
5. Ba ya’a maal paaspͻt la naae, li mͻr zin’ig kanԑ ka ba tisid ka nidib na kԑŋ anina lԑn tiki ba nu’us ka di’e.

Nwa’ mͻr ligidi yͻͻd ka li anԑ GH¢100.00 (US$70.00), banԑ bͻͻd tͻ’ͻtͻ’ la la, ka banԑpʋ bͻͻd tͻ’ͻ mԑ yͻͻd GH¢50.00 (US$35.00). Nidib bԑdigʋ kԑn zin’igin la saŋsi’eba ye ba maal ka pʋ nyԑtta, linԑ kԑ anԑ gbana la ԑԑnti pʋ paae ba, bԑԑ bʋnlinԑ maan gbana la ͻn san’am. Nwa’ kԑ ka li an daaʋŋi tis banԑ bͻͻd ye ba paam Ghana paaspͻt.

Sʋmbʋgʋsʋm ka nyaan di’e Visa

2024 U.S. Visa gʋ’ʋb azin’in baanlim yela

Atԑni daar, sawaar nwadig, dabpisi nԑ anii daar, United States da yis gbaŋ na ye ninsi’eba kʋ paam suori kpԑn’ԑ ban tԑŋin naa, nwa’ da anԑ ninsi’eba ka ba da gͻs ka ba pʋ bͻͻd azin’in baanlim nԑ ka ka’a Ghana gͻmԑna bԑԑ nidib wʋsaa, li kaskas anԑ vootʋg saŋa da paad la. U.S. Secretary of State Antony Blinken da maligim pian’a nyain ye wada kaŋa bԑnԑ ninsi’eba yela ka ka’ nidib wʋsa yelaa.