Kukpiun/Da'adiib
Kʋkpiŋkpin/Daꞌadit anɛ niŋkanɛ mɔr o yaꞌam bɔɔdim, ka tɛnꞌɛsid bɛog yɛla ka tʋmi mɔɔd ye o yaꞌam bɔɔdim la kilimi amɛŋa. Dab nɛ puꞌab wʋsa na tunꞌe an daꞌaditib sʋma. Li baꞌa kae ye fʋ anɛ dau bɛɛ puꞌaa. Li baꞌa mɛ kae fʋ n miꞌi gbaʋŋɔ paae siꞌem bɛɛ fʋ n keŋ sakuri paae siꞌemm. Daꞌadiib zanbin kanɛ an naꞌanaꞌa anɛ fʋ na siꞌiŋ kʋkpiʋŋ paal.
Daꞌadit zʋgʋ an wala wala?
Daꞌadit iednɛ ka vɛɛnsid o sʋꞌʋlimin la baŋid on bɛ babsiꞌa la tituaa nɛ on bɔɔd ye o maal siꞌel. Li anɛ itʋg kaŋa ni ka o paamid suobanɛ gilig o. Yɛlgu'uda pʋ vɔlisid daꞌadit naꞌanaꞌa bɛɛ kɛt ka o basidi o kʋkpieŋɔ. Saŋa bɛdigʋ, daꞌadit pʋ zɔt dabiem nɛ on na kuosi o nyɔɔri siꞌiŋ tʋʋm saaʋŋɔ. O mɔri o bɛog pʋtɛn'ɛr ka laꞌasid laꞌabanɛ bɛ wʋsa ye o kɛ ka o pʋtɛnꞌɛr la liebi amɛŋa. Daꞌaditib mɛ tisi ba mɛŋ sida. Ba mɔr yada nɛ ba pʋtɛnda la nɛ ban na nyaŋ ka pʋtɛnda la sid tʋm. Nɛꞌɛŋa sʋŋidi ba ka ba ziꞌe kiŋ-kiŋ hali laꞌamnɛ ba yaꞌa paam yelguda.
Fʋ tunꞌe tɛnꞌɛsid ye waai, nɛꞌɛŋa na tɔi. Aatɔ, li yɛlsʋm anɛ ye, sɔꞌ wʋsa na tunꞌe an daꞌadit. Ɛɛn, laꞌamnɛ fʋ. Kpɛlim karimim ka fʋ na paam labaya pamm kati waꞌae fʋ n na niŋ siꞌem ka paam miꞌilim kanɛ na kɛ ka fʋ an daꞌadit sʋŋ.
Fʋ yaꞌa bɔɔd ye fʋ paam daꞌadiib bɛɛ kʋkpiʋŋ miꞌilim, dɔlisim suobama.
1. Sɔnsim nɛ nimbanɛ kpiisid fʋ bɔɔd ye fʋ kpiis si'ela di ya'an ka zamisi yii ba sanꞌan. Mamisʋg, fʋ kʋkpiʋŋ la ya'a anɛ tanꞌaŋ kpaam tʋʋma, paam niŋkanɛ tʋm tʋʋm kan la diti li nyɔɔd ka pianꞌa tis o. fʋ yaꞌa tunꞌe karimid, bɔɔmi fʋ tʋʋma la gbana karim ka zamis.
2. Siakim zamis yaꞌam paal ka mɛ kɛlisi fʋ taaba pʋtɛnda.
3. Siꞌelnam yaꞌa gbɛligid, tɛnꞌɛsim linɛ gbɛlig la yɛla tituaa ka zamis yaꞌam yi gbɛlima la ni.
4. Pianꞌam daaʋŋ bɛɛ yɛlguda banɛ bɛ fʋ tʋʋma la ni tisi fʋ yidim ka sɔsi ba sʋŋir. Yidim, zuanam nɛ nimbanɛ tʋmi fʋ tʋʋma la buudi sʋŋir na nyaŋi sʋŋif ka fʋ kʋkpiʋŋ la keŋ tituaa.
5. Fʋ yaꞌa na nyaŋ, iemi fʋ tiraan onɛ na sʋŋifʋ fʋ tɔnꞌɔlim nɛ fʋ tadʋŋ pʋʋgin ka da kpɛm mɔɔd ye fʋ siꞌiŋ kʋkpiʋŋ la Fʋ kɔnꞌɔ-Kɔnꞌɔɔ.
6. Gbanꞌami fʋ pʋtɛnꞌɛr la kiŋ-kiŋ ka kpɛꞌɛŋi fʋ mɛŋi tʋmi fʋ paŋi tunꞌe siꞌem hali laꞌamnɛ yɛlgu'uda yaꞌa bɛ.
7. Nyidigim ka kpɛn zamisid labapaala kati waꞌae fʋ tʋʋma la yɛla. Kem kʋkpiʋŋ lasa ka ɛnti yɔꞌɔgi fi mɛŋ nɛ suobanɛ na maligim pɛɛsif baŋir. Fʋ yaꞌa maanɛ anwa, fʋ na paam miꞌilim paala ka kpɛn bɛ kʋkpiʋŋin.
8. Iem sʋŋid. Sʋŋid anɛ niŋkanɛ ka fʋ na nyaŋi zamisi o sanꞌan bɛɛ dɔl o. Yɛlgu'udtitaꞌar kanɛ daamid puꞌab anɛ apʋ-wʋm kʋkpiʋŋ yaꞌan labaya bɛɛ apʋ nyɛt nimbanɛ ka ba bɔɔd ye ba nwɛnɛ baa. Azamisid niŋkanɛ tʋmi fʋ tʋʋma la buudi n yuug kpɛmisidif ka yisidif yɛlgu'uda pʋʋgin. Sʋŋid mɛ tisidif sumaꞌasim ka miꞌi ye fʋ na tunꞌe zamis yaꞌam yii fʋ gbɛlima ni ka luaki ba nyain. Fʋ mɛ na paam tiꞌir ye daaʋŋ yaꞌa naami fʋ daꞌadiib pʋʋgin na, nidib bɛ na sʋŋif.
9. Tisimi fʋ mɛŋ nɛ fʋ tʋʋma la sida ka niŋ yada ye fʋ na nyaŋi tʋmi li. Li yaꞌa kaꞌ fʋ tisnɛ fʋ mɛŋ sida nɛ fʋ n na nyaŋ siꞌela, fʋ kʋ nyaŋi kɛ ka fʋ taaba tisif sidaa. Li anɛ yɛlkpan ye fʋ baŋ ye fʋ kʋkpiʋŋ la bɛnɛ ye li maali fʋ yɛl. Fʋ ya'a baŋ nɛꞌɛŋa, li nar ye li maligim pɛɛsif yada.
10. Iem ka zaŋi fʋ mɛŋi naal nɛ asuŋtaaba laꞌasʋg. Anaaltaab anɛ suosʋŋ kanɛ sʋŋid nidib ka ba zamisid taaba ni ka pʋdigid labaya. Puꞌab laꞌasʋg mɔr nyɔɔd bɛdigʋ tisidi ba. Bɔzugɔ, li sʋŋid ka ba nyaŋidi zabidi ba mɛŋ nɛ ba kʋkpimis yɛla. Puꞌab laꞌasbama na tunꞌe kɛ ka ba niŋ zuod nɛ taaba ka li nyaŋi sʋŋ ka ba kʋkpiʋŋ keŋ tuon.
11. Iem suŋir. Li yaꞌa ti naꞌar, da zɔ dabiem nɛ sʋŋir ieebɔ. Fʋ yaꞌa bɔɔdnɛ ligidi sʋŋir, tʋʋma miꞌilim sʋŋir, fʋn na zanli fʋ tʋʋma siꞌem-siꞌem, nɛ sʋŋir buudi wʋsa, ieem niŋkanɛ na tunꞌe sʋŋif ka o sʋŋif.