Linɛ taꞌasid kuꞌom basib

Wiim bɛɛ banꞌas yaꞌa da li teŋ la zug: Wiim bɛɛ banꞌas yaꞌa da gbirigi li kusaυg teŋgbaυŋ zug ka ba ia li tiim bɛɛ mak ye ba guꞌu li gυꞌυŋ, kusaas na bas kuꞌom n ziꞌel nɔɔri sɔs Winaꞌam nɛ teŋgbana la ye ba yaꞌa sυŋ ka ba yiꞌ yɛltɔɔg la pυυgin, ba mɔr sam ka ba na yɔ tisi ba. Nɔziꞌelυg la tɔnꞌɔn an, nua, buug, baag, naaf nɛ bunkɔnbbanɛ wυsa bɛ kusaυg.

Saa yaꞌa da wak: Saa yaꞌa da ɛɛnti wak ka kusaas ia sakuꞌom ye ba bυdi gυꞌυŋ, ba na kaanbi sɔs yaanam nɛ Winaꞌam ye ba sυŋ ka saa ni tisi ba. Saŋa pamm nii, kaanb kaŋa kaanbidnɛ nɛ zɔm maꞌaa ka kuꞌom pυ paasida, ba ɛɛnti yɛl bada la nɛ ye ban ia kuꞌom ye ba bu zɔm la gυꞌυŋnɛ.

Puꞌa yaꞌa da ɛɛnti saꞌae ka li muk: Kusapuꞌa yaꞌa da saꞌae bɛɛ o duꞌam daari paae ka mugusυg bɛ duꞌam la pυυgin, kusaas na kpaꞌae kuꞌom n sɔs baꞌanam nɛ yaanam ye ba duom ziꞌen ka sυŋ ka puꞌa la sig laafi. Saŋa pamm nii, kuꞌom kpaꞌar kaŋa ɛɛnti anɛ kuꞌozaal, bɔzugɔ ba na yɛl bada la ye ban on zinꞌin nɛ sunsanꞌauŋ ka nyɛt diib yaanɛ tisidi ba?

Sigisaa yaꞌa da li: Sigisaa yaꞌa da li, kasaas na kpaꞌae kuꞌom sɔs Winaꞌam nɛ yaanam ye ba duom ziꞌenɛ sυŋ ka ba kua nɛ laafi ka naaf da zanꞌas kenɛ ka wiim bɛɛ puan mɛ da nyɛ sɔꞌ ka υυn yaꞌa ti nie ba laafi, ba mɔr linɛ ka ba na tisi ba.