Sɔlima: Da Basi Fʋ Tʋʋm Kʋdirɛ

Azaŋku'ari n da bɛ. Ka daar yinne ka o yɛli o yidim ye, dʋnna, on na keŋ makka mɛn. Ka ti'ebi o la' ad wʋsa n gban'ɛ o suori n keŋ paae makka la ni. Ani ka ba pa'al o si'elnam nɛ yɛla pamm fʋn na tʋm si'el, nɛ fʋn kʋ tʋm si'el wʋsa. Ba yɛl o ye, fʋ ya'a keŋ makka, fʋn da lɛm zuu, da kʋʋ, da sa'ami fʋtiraan sʋnfɔ. Ka kaal yɛla pamm pa'al o, ye o kulim ka da tʋm lini wʋsa a tʋʋmbɛ'ɛd buudi kɔtaanɛ. Ka Azaŋku'ar ye o wum pa'ala nɛ sa'ala la wʋsa, amaa o siak ya ka na dɔlisi li suor dɛdɛ ka paami o mɛŋ mɛn.

Azaŋku'ar zamisi ala ka li saŋa ti paae ka ba bas o ka o liebi Alaazi n kul na bɛɛ o yin. Ka o kpi'es nɛ o zuanam nɛ o sabuos, nɛ o dienam nɛ o dakiis, ka sieba yi lalli nɛ yamma wʋsa n kena pʋ'ʋs o. Nidib wʋsa keŋ pʋ’ʋs o, ka Abʋʋg ma'a pʋ kɛŋɛ, dinɛ aan Abʋʋg pu’a ye, li pʋ malisa, ye o sid la mɛ kem pʋ'ʋs o. Ka o sid la ye, mɛɛ o mi' ye Azaŋku'ar pʋ nyɛti ba nifɔ, ye daasi'erɛɛ o nam pʋ basi o Bʋ-ɔnbir la. Ka o pu’a yɛl o ye, o kem, ka o ye atɔ, ka sid due n wa'ae.

Abʋʋg keŋ ti tu'ae samanin la ka o ya'am iank, on paae la, o labinɛ kʋkpɛŋ sa ka sɔnsig ka Azaŋku'ar siak tɔ’ɔtɔ ka laki gɔs o pid o. Ka siak ye nambaa, ka pʋ'ʋs o ye nɛ o ken-ken, ka Abʋʋg mɛ siak. Ka Abʋʋg yʋ'ʋn bɛ kʋkpɛŋ sa ka bu'os o ye, o wum ye o keŋ makka ka kul na lin ka o mɛ kena ye o pʋ'ʋs o, nɛ o zugsʋŋ. Ka Azaŋku'ar ye asida, ye ba sid daa paae ka ba pa'aliba yɛla pamm amaa ka lɛɛ yɛli banɛ ye, Fʋ ya'a mɔri fʋ tʋʋm kʋdir, fʋn da basi lii, ka ɛnrid bi'el-bi'eli n kennɛ Abʋʋg baba, ka Abʋʋg mɛ kia'asid bi'el-bi'eli n bɔɔd zuaa, Li pʋ yuugɛ, ka Azaŋku'ar dam bab-bab ye o gban'e Abʋʋg sansi'a la, ka Abʋʋg mɛ kpɛlim dam bab-bab m gban'e  o yisuore n zɔɔ kul. On kʋlim zɔɔ paae la, o pʋ nyɛɛ o pu’a nini ayi'i. Ka ba ʋk taaba nɛ tʋ'ʋd pamm, ka o yɛli o pu’a ye, o pa'a pʋn ye o kʋ keŋɛ ka onɛ zan'as, ye o nɔba ya'a pʋ kpi’eminɛ, anwaa on pʋn kpiin sa. Ka kpɛlim sa'ali o pu’a nɛ o biis ye ba baŋimi ba mɛŋ nɛ Azaŋku'ar ba guaan pʋʋgin.

Ala ka Abʋʋg nɛ Azaŋku'ar pʋ la'amid taaba la.