Sɔlima: Dau Nɛ o Pu'a Yimmir

Dau da bɛ mɔri o pu'a yimmir, ka pu’a la ye on pʋ lɛm bɔɔd ye o sid la di pu’a ya'asɛ, zi' ka pu'a la anɛ sɔn'i ka o sid la zi’. Ka sɔɔnb mɛ pɛ'ɛl teŋin la, ka teŋina'ab la mɛ an sɔn'i, hali ka o kpi'a onɛ  kpi'e nɛ o la mɛ an sɔn'i. Ka o kpi'a la mɔɔd ye o gban'e dau la ka o pu’a la baŋ ka zaŋi o sid la siigi kpɛn’ɛs zɔŋ mɔpil-nyu'ug zugʋ su'a anina, ka o kpi'a la baŋ ka zi' on na niŋ si'em paam oo, pu’a la bɛ la zug. Ka pu’a la sa'ali o sid la ye, o ya'a ti kae daasi'ere on mit ka o piligi o zɔŋ la ye o maali pil, ka dau la siak ye, awoo.

Ka daar yinne ka pu’a la yɛl o sid la ye o keŋ o saam yin ka lɛb na. Ka bɛʋg nie ka o kpi'a la wʋm ye pu’a la keŋi o ba yir ka bas o sid la, o zɔnɛ tɔlibiga keŋi o kpi'a la yinne pʋ'ʋs o, ka o kpi'a la bu'os o ye, o beogun kibar an bɔ? Ka o ye si'el-si'el kae, ye on kenɛ na ye o gɔs on duoe si'em, ka yɛlsi'a kae. Ka o lɛbis ye, laafi bɛɛ o. Ka ba zin'ini sɔnsi sɔns bi'ela, ka dau la ye, m zua, man gɔsi fʋ zɔŋ la, ba pili li ka li yuug hali, ye o kɛl ka ba piligi li nannanna ka lɛbisi li pil, ka ban pʋm zin' nwa ba pʋ tʋm si'ela. Ka dau tami o pu’a la sa yɛl o si'el la, ka ye, fa-fa-fa, ye o faam o yak na. Ka dau kpɛn dʋ zɔŋ la zugu n aans tat-tat-tat-tat, ti paae dau la siigi bɛ si'el la, n gban'e suu o bɛn-biigin. Dau la suu o bɛnigin naae la, o duoe nɛ agɔlla gɔsi o yin kii, ka ma'aa siak ye, ‘Yooi’. Ye ba buon o nɛ yin sa. Ka kpɛn naam zɔŋ la zugu n zuligi sig na ye o kpi'a la kɛl ka o kuli kiis buolʋg la ka lɛb na ka ba piligi naae ka lɛbisi pil.

Zi', ka dau la siigi la ka o gban'e mɔri kul. On paae la, o mɔri kpɛn'ɛnɛ su'a sʋ'ʋŋa ka zɔ tɔlib, tɔlib n lɛbi paae na ma'a yɛl dau la ye ba mɔn nɛ sa'ab ka buon ye on kul na di, ye li anɛ buol yaalis ka on zi' ka kul, ye o kem na ka ba gɔsi piligi naae ka pil tɔ'ɔtɔ. Ka ba sid piligi naae ka lɛbisi pil ya'as, ka o kul.

On lɛbi kul la, o kpɛn mɔri siig la tɔ'ɔtɔ n gaadi keŋ tisi ba na'ab la. Ka na'ab la ye o mɔdigim ka li ti sɔbi sʋdig ka nidib bɛdigʋ gbis ka ba mɔr o keŋ titʋgir kanɛ zu'oe hali ka ba ɛɛnti la'asidi anina kʋʋd nidib la ni, ka ba taaba kena ka ba la'asi kʋʋ o pʋdig.

Dau la gban'e pu’a la sid la, zi’ o pu’a la bɛɛ o ba yir la sa, ka nyɛɛ li, ka mak ye o zin'ini gʋ'ʋŋ ka duoe niŋ zua pira, n mɔr nyas, nyas, nyas, n paae o yin na ka ɔnsir an bɔrrrr.

O paae na pʋ'ʋsi o sid nɛ agɔla-gɔla, ka bu'os o ye, o daa yɛl o ye bɔ? Ye ka wala, ka o kae ka o lɛdigi aand zɔŋ la ka on kae? Ye o gɔsim ka on kʋdim zi'e nwa la, ba na kʋʋ o. Ye on ken nwa, o anɛ sɔn'i, ka pʋ bɔɔd ye o kʋ nida, ye o kpi'a la mɛ anɛ sɔn'i ka pig o ka li yʋma lal, ka man nɔŋif la zug ka m zaŋi fʋ siig la sua', ka man yɛlif ka fʋ zan'as ka niŋ si'em la, fʋ siig la, ba gban'e li zina, amaa ba nam pʋ kʋʋ fɔ, amaa yʋ'ʋŋa, ba lɛɛ na kʋʋf, nidib ya'a ti bɔɔd gbɛɛm saŋa la. Ka o sid la gbin yɔ'ɔg, ka o kaas ye, ‘M ba yooo.’ Ka pu’a la yɛl o sid la ye o kpɛ'ɛŋimɛ o mɛŋ ka on na  kpɛ'ɛŋi o mɛŋ, ka ba mɔɔ gɔs, ka Win ya'a sʋŋ, ti na nyaŋi ba. Ka dau kan'ad ye, o ba' bɛ, ka kpi'im bɛ, ka bʋga bɛ, ye ba sʋŋim o ka o da kpii.

Dinɛ an pu’a la bu'os o ye, o mi tɔɔnb sʋ'ʋŋa ka kʋ nyɛsigɛɛ? Ka o lɛbis ye ɛɛn. Ka o yɛl o ye o bɔɔm tiraug nɛ piima sʋ'ʋŋa, ka ba ya'a ti dii naae, o na dɔll o ka ba keŋ su'a ka guri ba ka ba ya’a ti kena ye ba kʋʋ o la, ka o pa'al ka o tɔɔn ba na'ab la kʋ, ka o ya'a tɔɔn nyɛsig, o sid la na kpi, ba kʋ bas o. Ka o sid la ti'eb ka di wala-wala sa, ka o pu’a la dɔl o ka ba sid keŋ su'a. Ka li saŋa paae ka ba yʋ'un ian'ad tii-tii paana, ka dau la mɔdig ka ba yʋ'ʋn ti bɔɔd ye ba kʋʋ o la, ka o pʋ'a la parig o, ka o kpɛn tɔɔn ba na'ab la mut, ka ba wʋsa iank zig-zig ka basi o sid la, ban ianki naae la, ka ba keŋ kʋʋb zin'igin la nyɛ nɛ Abaŋkʋsɔl daugʋ digi, ka pʋ'a la di’e sʋ'ʋg o sid la sa'an n kɛnsi kɛns nwiis la ka ba lɛbi kul. Ka pʋ'a la paae sa'ali o sid la ye,  o zɔm yʋ'ʋŋa keŋ kateŋ, ka beog nyaan nie , ka ya'a ka'a alaa, na'ab la saa na isigi kena n gɔs o, ka lɛbi kpi, o mɛ ya'a gɔs o ka lɛb, o mɛ na kpi. Ka dau la duoe yʋ’ʋŋ la zɔ.

Ka bɛʋgʋ nie la, ka na'ab la sid kena bu'os dau la yɛla, ka o pʋ'a la ye, on wien daba atan' nwa zina, o nam pʋ kul naa. On lɛb la, li pʋ yuugɛ, ka ba tʋm na ye na'abi kpi. Ka li niŋ bi'ela ka pu’a la mɛ kan'asi o biis wʋsa nɛ ba la'ad n bɛɛn o sid kateŋ la.

Ti mi ye, pu’a anɛ pu’a. Ka pʋ sʋm ye o baŋ dau gbin wʋsaa, amaa yalim bɔɔdim daar bɛ.