The Wedding Party

The Wedding Party

film

Title	The Wedding Party
Genre	romantic comedy, drama film
Publication date	8 Sɛnlʋŋ/Nwadispiigin 2016, 16 Samanpiid/Nwadispii nɛ atan 2016, Mɔtul/Nwadisawai 2017
Country of origin	Nigeria
Original language of film or TV show	English, Igbo, Èdè Yorùbá
Director	Kemi Adetiba
Screenwriter	Kemi Adetiba, Tosin Otudeko
Director of photography	Akpe Ododoru
Film editor	Andrew Webber
Composer	Dr. Bayo Adepetun
Producer	Don Omope, Zulu Oyibo, Ijeoma Agukoronye
Production company	Ebonylife TV
Date of first performance	8 Sɛnlʋŋ/Nwadispiigin 2016, 26 Sapal/Nwadispii nɛ ayi 2016
Narrative location	Lagos
Color	color
Distribution format	video on demand
Kijkwijzer rating	12
Official website	http://theweddingpartymovies.com/

The Wedding Party anԑ nͻŋilim yela sini kanԑ ka Nigeria dim maal yʋʋm tusayi nԑ piinԑ ayuobʋ ni ka onԑ gaad tuoni gosi li maalig yela an Kemi Adetiba. Ba da yisi li paalʋ ni bԑ Canada nԑ yʋʋm tusayi nԑ piinԑ ayuobʋ, Sԑnlʋŋ nwadig, daba anii daar bԑ Toronto International Film Festivald di’ema ni ka mԑ yisi li paalʋ yʋʋm tusayi nԑ piinԑ ayuobʋ, Sapal nwadig la ni dapisi nԑ ayuobʋ daari bԑ Eko Hotel and Suites Lagos sʋ’ʋlim, Nigeria. Ba da yis sini la paalʋ na ye dunia dim wʋsa nyԑ gͻs nԑ yʋʋm tusayi nԑ piinԑ ayuobʋ, Samanpiid nwadig dapiinԑ ayuobʋ daar, ka li da an Nigeria sini kanԑ ka nidib gͻs gaadi li taaba; nԑ lin ti paae yʋʋm tusayi nԑ pisi nԑ yinnԑ ni ka sini kanԑ buon Omo Ghetto: The Saga da kԑna di’e li nͻbir.

Suor dͻlisim

Dunni Coker onԑ an yʋʋm pisi nԑ anaasi ka o dʋ’adib an Engineer Bamidele nԑ Mrs. Tinuade Coker, da maan sid kulug malima nԑ Dozie Onwuka onԑ ka o dʋ’adib an ligidi dim. O ma ka o yʋ’ʋr buon Lady Obianuju Onwuka da gͻs ka o biig la ye o di pʋ’a kanԑ an nͻŋdaan.

Daar kanԑ ka ba ye ba di taaba la bԑʋgʋ, ba da pin’ili maan di’ema zin’ig la, ka onԑ gͻsidi li yela an Wonu, o da mugusud o mԑŋ ye o maal zin’ig la sʋ’ʋŋa tis ligidi dim banԑ buol o ye o kԑna maal zin’ig la. Pʋ’a la dʋ’adib nԑ o kpi’es sʋnya da pԑlig ya nԑ ban pʋ paas Tinuade Coker yʋ’ʋr di’ema gbaʋŋin la, daʋ la dʋ’adib da dʋk diib kanԑ ka pʋ’a la dʋ’adib pʋ bͻͻda, ka o ma mԑ lԑn pian’a zԑrig pʋ’a la ba’anami tis o zuanam banԑ kԑna la, pʋ’a la nԑ o sid Chief Felix Onwuka da pʋ tʋ’ʋgʋda. Dunni zuanam la’ad o ye o nan zi’ digin nԑ daʋ, ka Dozie zuanam mԑ la’ad o bʋnlinԑ sa naam suos di’ema ni la ela. Daʋ kanԑ nar ye o zienin pʋadid la nya’aŋ la sa paam sapʋ’at di’ema la ni ka kʋ nyaŋi kԑn pʋ’adiir la naa, ka Sola kanԑ ka o ba’a kae nԑ si’el la di’e o nͻbir.

Pʋ’adiir la malima saŋa paae la, nidib banԑ kԑna la maal nԑ summalisim, ya’a ka’a Obianuju Onwuka ma’a zin’I anina ka o ya’am kae anina. Ban da duoe lͻr yi malima zin’igin la lԑbid diib nԑ di’ema zin’igin la, Dunni da nyԑ pʋ’a pԑtnam ka li bԑ Dozie tuon gԑfa ni ka o sʋnf pԑlig hali. O da yel o ye li tͻn’ͻ an o zuanam la yinnԑ nͻki niŋ anina, nԑ ban ti paae di’ema zin’igin la. Nͻŋgbanwa’ar da lu dʋ’adib la ni banԑ na kpԑn’ԑ di’ema zin’igin la yiiga; li niŋ al aka  ka ba bas ka Onwuka yidim banԑ an ligidi dim la kpԑn’ԑ yiiga.

Diib zin’igin la mԑ lԑn mͻr la’ad bԑdigʋ, Tinuade Coker da nͻk sͻ’ ye o dʋg Yoruba diib ka ba saam la di ka bas diib kanԑ ka Obianuju Onwuka maal la. Sola da yis o nͻͻr kuom na ka ye o yis sini giŋ sia ka ba gͻs, o da pʋ baŋԑ ka tiak linԑ ka Dozie ti’eb ye nidib la gͻs la lԑbis bʋnlinԑ mͻr nyan linԑ pa’al wan wʋʋ Dozie anԑ ninkanԑ gaae o pʋ’a la nya’aŋ, linzug ka pʋ’a la zͻ yi. Sͻ da sial o yi’iŋi an Dozie sabua kʋdʋg ka o yʋ’ʋr buon Rosie, o da ma’a ye on digin nԑ Dozie daar kan nͻͻ - li yelsida anԑ ye Rosie da mͻ ye o digin nԑ o ka lԑԑ gʋ’ʋŋ nԑ. Anina ka Dunni sʋnf pԑlig ka o kpԑn’ԑ lͻri gaad.

Dozie nԑ o bier Nonso nԑ dʋ’adib la da yii ied Dunni amaa ba da kpԑn’ԑ dͻͻg kanԑ ka ba di’es piini la’asi digil la ka na’ayiig bԑ anina ka nͻk malifʋ kpa’ ba ka ba pʋ nyaŋi yii. Ba da pin’ili yisidi ba zugun yela tisid taaba, Dozie ma da tuasi pa’al o sid o sʋnfʋ ԑԑnti san’am si’em nԑ on na nyԑ ka o dͻl pʋ’abibis, ka Dunni saam mԑ yel ye o tʋʋma ni la ligidi la wʋsa kpԑn’ԑ mͻͻg. Ba naal taaba anina ka Nonso nyaŋ na’ayiig la ka nͻk o malifʋ la. Dozie da kpԑn’ԑ lͻr ni nԑ Sola ye ba kԑŋ ia Dunni, O da pian’a pa’al o ye on pʋ san’am o mԑŋa bԑԑ ba pʋ’adiir la. Ba la’asi dͻl taaba lԑb di’ema zin’igin la ye ba wa’a yʋ’ʋn kan wʋsa.

Maanib

• Adesua Etomi an Dunni Coker (Sid la)
• Banky Wellington an Dozie Onwuka (Pʋa la)
• Richard Mofe Damijo an Chief Felix Onwuka (Dau la saam)
• Sola Sobowale an Mrs. Tinuade Coker (Pua la ma)
• Iretiola Doyle an Lady Obianuju Onwuka (Dau la ma)
• Alibaba Akporobome an Engineer Bamidele Coker (Pua la saam)
• Zainab Balogun an Wonu (Onԑ gͻs di’ema la yela)
• Enyinna Nwigwe an Nonso Onwuka (Sid la bier)
• Somkele Iyamah-Idhalama an Yemisi Disu (Pʋa la zua kanԑ bԑ o nya’aŋ)
• Beverly Naya an Rosie (Dau la sabua kʋdʋg)
• Daniella Down an Deadre Winston (Pʋa la zua)
• Afeez Oyetoro an Ayanmale
• Ikechukwu Onunaku an Sola (Dau la zua kanԑ bԑ o nya’aŋ)
• AY Makun an onԑ pian’ad di’ema la ni
• Emmanuel Edunjobi an Woli (Wina’am nid)
• Kunle Idowu an Harrison
• Jumoke George an Iya Michael
• Sambasa Nzeribe an Lukman

Maalig

Banԑ da maal sini la anԑ ELFIKE Film Collective. Ka onԑ gaad tuoni gͻsi li yela an Kemi Adetiba. ELFIKE Film Collective anԑ Nigeria sʋ’ʋlim sini maanib lʋga anaasi la’as taaba: EbonyLife Films, FilmOne Distribution, Inkblot Productions nԑ Koga Studios.

Yiib

Sini la da yi paalʋ Toronto nԑ yʋʋm tusayi nԑ piinԑ ayuobʋ Sԑnlʋŋ nwadig daba anii daari bԑ Toronto International Film Festival (TIFF).

Yʋʋm tusayi nԑ piinԑ ayͻpͻi Mͻtul nwadig la ni ka li da yi Netflix na.

Siakir

The Wedding Party nyԑ yʋ’ʋr sʋ’ʋŋ nidib ni. Onԑ ka ba buon Chidumga Izuzu ka o bԑ Pulse Nigeria la ye, "li anԑ sini kanԑ maan la’ad. Sini la pʋ la’as si’el nam bԑdigʋ wan wʋʋ zaba nԑ tʋʋmbԑ’ԑd bԑԑ kʋkͻr si’eba pʋ paas anina ka pian’ada. Li ka’a linԑ ka fʋ gͻsid ka fʋ ya’am iankida. Li anԑ sini kanԑ mͻr la’ad ka ba maali li ala mͻri kԑŋ naae".

Nollywood nͻŋir da pa’al ye sini la vԑnlim anԑ pisnu nԑ anaasi, kͻbiga pʋʋgin, ka yel ye, "Man nͻŋ sini si’em la, bakwai kanԑ kԑn na m na lԑn gͻs sini kaŋa ya’as. Sini la paae di’ema zin’igin la anԑ di’ema nԑ diib ma’a."

Cinema Axis' Courtney Small da yel ye, "The Wedding Party ka’a sini kanԑ ka fʋ tuasi tis sͻ’ͻ ka malisim la wʋsa bԑԑ, amaa li anԑ sini kanԑ ma’ad nidib sʋnya. La’ad bԑdigʋ bԑ anina, li anԑ tilas ye fʋ ya’a gͻsi li fʋ na la’a kpi."

Isabella Akinseye da wͻ’ͻgi li ka mԑ lԑn zԑrigi li.

Wilfred Okiche onԑ bԑ ynaija da yel si’eli kati wa’ae Kemi Adetiba nԑ on gaad tuoni gͻsi maal sini la anԑ anwa; "Li ya’a ka’a pian’a bԑdig kanԑ ka sid la saam yina pian’a laa nԑ Sambassa Nzeribe nԑ Hafiz Oyetoro zin’isin la, Adetiba maal si’el wʋsa ka li kԑŋ titua".

Temitope Adeiye onԑ bԑ thenet.ng da yel ye The Wedding Party anԑ "sini sʋ’ʋŋ yinnԑ kanԑ ka m gͻs yʋʋm tusayi nԑ piinԑ ayuobʋ ni".