AZAYA 28

Efiram na paam tɔɔg

1 Tɔɔg na paae Efiram dim banɛ nuud daam kʋʋn

ka mɔr nyɛɛsim hali la!
Ba puum vɛnl hali ka bɛ bɔn'ɔg kanɛ mɔr kʋ'ʋlʋm la ni,
amaa li ziankid nɛ ka li vɛnlim bɔdigid.
Tempʋʋg kan la ni banɛ dʋ'ʋsidi ba mɛŋ la,
daam lɛbisi ba teŋin!
2 Gɔsima, Zugsɔb la na tʋm onɛ mɔr paŋ nɛ kpi'euŋ na.
O nwɛnɛ sakuga nɛ sisi'etita'ar kanɛ san'am la'ad nɛ.
O nwɛnɛ satita'ari na ni
ka ku'om kpɛn' kɔlisi badig ka pʋbid teŋin nɛ paŋ si'em la.
3 La'avɛnla linɛ ka Efiram danuudib mɔri nwɛ'ɛd nyɔ'ɔg la,

ba na nɔɔ ba nɛ nɔba.

4 Teŋ la bɛ nɛ bɔn'ɔg kanɛ mɔr kʋ'ʋlʋm la ni,
amaa li vɛnlim la na bɔdig wʋʋ puum nɛ.
Ba na zii li tɔ'ɔtɔ gaad nwɛnɛ kekandeenna na bi'ig
ka ba pun'oe li tɔ'ɔtɔ di si'em la.
5 Li daar ya'a paae Zugsɔb onɛ an Paŋtita'ar Sɔb la na an na'atita'ar,
ka nwɛnɛ na'am zupibig dinɛ vɛnl hali tis o nimbanɛ kpɛlim la.
6 O na kɛ ka o siig bɛ sariakatib la ni ka ba pian'ad linɛ an sida,
ka tis banɛ gur za'anɔɔr la kpi'euŋ
ka ba nyaŋ banɛ ye ba kpɛn' zab nɛ ba la.
7 Hali maanmaannib nɛ nɔdi'esidib la nunɛ daam kʋʋli gɛrid

ka ba ya'am fɛndig daam nuub zug.

Daam ma'aa ka ba nuu kennɛ tu'usid
ka pʋ gban'ad linɛ ka Zugsɔb niedi tisidi ba la gbinnɛ.
Ba gban'ar wʋsa pʋ dɔl suorɛ
ka li anɛ ban nuud daam kʋʋn la zug.
8 Ka ban dit si'el zug la wʋsa pɛ'ɛl nɛ tiind,
zin'isi'a pʋ kpɛlim an nyain ka dian'ad kae.
9 Ba yɛt ye, “Anɔ'ɔn ka o bɔɔd ye o pa'alɛ?
Ka anɔ'ɔn ka o pian'adi pa'annɛ o labaar la gbinnɛ?
Li anɛ biis banɛ bas bin'isir mu'ab ka li pʋ yuug, bɛɛ?
Bɛɛ li anɛ banɛ ka ba tuki ba bin'isirɛ?
10 O yɛti ti ye, ‘Niŋimi nɛ anwa ka niŋ anwa,
dɔlli zi'elkaŋa ka dɔl zi'elkaŋa,
niŋim dina bi'ela ka niŋ kpɛ' bi'ela.’”

11 † Alazug, Wina'am na zaŋ nimbanɛ an saam

nɛ banɛ pian'ad pian'azʋna la,
kɛ ka ba pian' tis nimbama.
12 O da yɛli ba ye, “Vʋ'ʋsʋm zin'igi nwa',
kɛl ka banɛ gɛn la vʋ'ʋs.”
Ka lɛn yɛl ye, “Nɛ'ɛŋa an linɛ ka ba na kɛlis,”
amaa ba da pʋ kɛlisida.
13 Dinzug, Zugsɔb labaar la na lieb nɛ zaalim tisi ba:
Wʋʋ ban yɛt si'em ye,
“Niŋimi nɛ anwa ka niŋ anwa,
dɔlli zi'elkaŋa ka dɔl zi'elkaŋa,
niŋim dina bi'ela ka niŋ kpɛ' bi'ela.”
Ala ka ba na lɛb nya'aŋi lii pu'alim,
ka baŋ kanɛ bɛnd la gban'e ba.
14 Dinzugɔ, kɛlisimi Zugsɔb labaar,
yanam banɛ an ninla'asnam la,
yanam banɛ sʋ'oe nimbanɛ bɛ Jerusalem la.
15 Ya dʋ'ʋsidi ya mɛŋ ka yɛt ye,
“Tinam maal nɔɔr yinne nɛ kum,
ka naal nɔɔr nɛ yaʋg.
Ban'as nɛ yɛltɔɔd ya'a kena li kʋ niŋi ti si'ela,
bɔzugɔ tinam nɔknɛ faadi su'a ti mɛŋ,
hali dama'am aan ti suak zin'ig.”
16 † Alazug ka Zugsɔb onɛ an Paŋtita'ar Sɔb la yɛl ye,
“Gɔsima, m digil kugir Zion teŋin,
kugir kanɛ ka ba maki li ka li an bʋnsʋŋ hali,
linɛ na ɛɛnb ɛɛnbir kanɛ mɔr paŋ:
onɛ niŋ yadda kʋ di nyannɛ.
17 M na kɛ ka yɛlsida an wʋʋ nwiig dinɛ ka m mɔri makid la,
ka pʋpielim an wʋʋ nwiig dinɛ ka tanmɛɛdib mɔri makidi mɛɛd la;
saa nɛ sakuga na udigi ya suak linɛ an faad la keŋ,
ku'om na gɛɛl zin'ikanɛ ka ya su'ad la.
18 M na san'am nɔnaar kanɛ ka ya maal nɛ kum la,
yanamɛ naal nɔɔr nɛ yaʋg si'em la, li kʋ nyaŋi zi'enɛ,
ban'as nɛ tɔɔg ya'a ti gɛɛli ya, li na mɔri ya keŋ.
19 Lin kɛn saŋsi'a wʋsa na, li na mɔri ya keŋ,
li ya'a anɛ bɛogʋn bɛɛ nintaŋ bɛɛ yʋ'ʋŋɔ, li na mɔri ya keŋ.”
Ya ya'a gban'e labakaŋa gbin,
asida li na kpɛn'ɛsi ya dabiem pamm.
20 Gadʋg la pɔɔd nɛ nidi na tiɛn o mɛŋ,
ka fuug la mɛ pʋ yalim ka nid na pilɛ.
21 Zugsɔb la na duoe wʋʋ on da duoe Perazim Zuorin si'em la,
ka bʋʋgi ba wʋʋ on da bʋʋg o bi'emnam Gibeon Bɔn'ɔgin si'em la.
O na tʋm tʋʋm kanɛ an tʋʋm saaŋ la,
o na tʋm linɛ na lidigi ba.
22 Basimini ya ninla'asim la,
ya'a ka' alaa baans banɛ lɔɔ ya la na muki ya gaad ala.
Zugsɔb onɛ an Paŋtita'ar Sɔb la yɛlim
ka m baŋ on gban'e ye o san'am teŋ la wʋsa si'em.
23 Kɛlisimi ka wʋmi m,
kɛlisim man yɛt si'el la sʋ'ʋŋa.
24 Kpaad ya'a nwɛ' vugus ye o bʋdɛ,
o na bas bʋdig ka kpɛn nwɛ'ɛdi kennaa?
O na kpɛn bugud ka bʋ'ʋsid tandia'ana laa?
25 O ya'a ti bug o pɔɔg la ka maali bʋ'ʋsi naae,
ka' nyiri ka o na bʋd ka li'is sɔ'ɔdɛ?
Ka o ya'a ti naae, o kʋ bʋd ki li kɔn'
ka bʋd mui li kɔn'ɔɔ?
26 Wina'am pa'an kpaad la
ka zamisid o linɛ dɔl suor.
27 Ba pʋ bʋ'ʋd nyiri nɛ balayaa,
ba pɔn'ɔnɛ ka li pun'oe ka ba pie;
ba mɛ pʋ bʋ'ʋd sɔ'ɔd nɛ balayaa,
ba kpa'asidnɛ.
28 Ba nɛ'ɛm zʋʋd la nɛ maan diib,
ka ba pʋ bʋ'ʋd ka li ti lieb zɔ'ɔm.
Hali baa o ya'a nɔk bʋŋ nɛ tɛreko nɔɔ li si'em,
li kʋ maligin kilim zɔ'ɔm.
29 Nɛ' wʋsa yinɛ Zugsɔb onɛ an Paŋtita'ar Sɔb la ni na,
li anɛ sa'al kanɛ an nyalima
nɛ ya'am kanɛ an sʋm hali.