AZAYA 29

Tɔɔg na paae David teŋ
1 Woo, tɔɔg na paae fʋn Ariel,
linɛ an teŋ kanɛ ka David da zin' la!
Kpɛn ken tuonnɛ paasid malima nɛ di'ema
banɛ ka fʋ maan yʋʋm-yʋʋm la!
2 M na kɛ ka sʋnsa'aŋ sig Ariel teŋin na
ka o kaasid ka fabin.
O sid na lieb nwɛnɛ bam buon o
ye malʋŋ bimbim kanɛ ka ba nyu'od maannɛ li zug la.
3 M na gilig teŋ la ka zab nɛ o.
M na mɛ zaŋguom kpi'ema giligi ya,
ka maali m zaba zin'isi giligi ya.
4 Fʋ na lu teŋin, ka digi pian'adi bɛbin,
ka yit teŋin na wʋʋ silinsiiug nɛ;
fʋ na dig teŋin ka pian'adi nya'am.
5 Amaa fʋ dataas banɛ zu'oe la na nwɛnɛ titanbin'isbʋʋlʋg nɛ,
nimbanɛ an bugusnam la na nwɛnɛ udug
ka sisi'em da'ae li mɔri gaadnɛ.
Li sid na gbirigi niŋ tɔ'ɔtɔ.
6 Zugsɔb onɛ an Paŋtita'ar Sɔb la na kena nɛ satansʋg,
ka teŋ na mi'im ka tʋkpiidʋg bɛ, nɛ sisi'etita'ar.
O na kena nɛ sʋnpɛɛn
nɛ bugum kanɛ dit ka pʋ basid si'el baa bi'elaa.
7 Ani ka bi'emnam banɛ yi tɛɛns nɛ buudi wʋsa na
zabid nɛ Ariel linɛ an Jerusalem la
na la'asi giligi ba kpi'euŋ zin'ig la,
amaa ba na gaad tɔ'ɔtɔ nwɛnɛ nidi na zaansim yʋ'ʋŋ si'em la.
8 Ka nwɛnɛ onɛ kɔ'ɔm zabid ka o gbisi zaansim nyɛ diibi dit,
amaa on duoe gbɛɛmin la ka o kɔ'ɔm nan kpɛn zabid;
bɛɛ onɛ ka ku'onuud mɔr o ka o gbisi zaansim nuud ku'om,
amaa on ti duoe la ka ku'onuud nan kpɛn mɔr o ka o bɔɔd ligib.
Ala ka li na ti aan tis tɛɛns nɛ buudi wʋsa
banɛ zabid nɛ nimbanɛ bɛ Zion Zuorin la.

9 Li na lidigi ya ka paki ya,

ya na nwɛnɛ zu'om ka pʋ nyɛtaa.
Ya kʋʋli ken ka pʋ nu daam,
kennɛ tu'usid ka li ka'anɛ daam yɛllɛ.
10 † Zugsɔb la kɛ ka gbɛɛm lii ya zugin.
O ligil nɔdi'esidib la nini,
ka lus banɛ nyɛti tu'asid Wina'am yɛla la zut.
11 Nier linɛ tisid nɔdi'esidib la na nwɛnɛ gbauŋ kanɛ ka ba kpilim ka tabili li, ka fʋ ya'a nɔki tis onɛ mi' karʋŋ ye, “Di'em karim,” o na lɛbis ye, “M kʋ nyaŋɛ bɔzugɔ, ba tabili li nɛ.”
12 Fʋ ya'a lɛn nɔk gbauŋ la tis onɛ zi' karʋŋɔ, ka yɛl o ye, “Di'em karim,” o na lɛbis ye, “Ayei! Man zi' karʋŋɔ.”
13 † Zugsɔb la yɛl ye,
“Nimbama kennɛ m san'an na nɛ ba nɔɔr pian'ad
ka na'asidim nɛ ba nɔŋgbana,
amaa ka ba sʋnya lal nɛ mam hali.
Ban zun'od mam si'em la pʋ yii ba sʋʋnrin naa,
li anɛ zi'ela linɛ ka nidib pa'ali ba gʋllim.
14 † Dinzugɔ, m na kɛ ka yɛl nyalima paadi ya
ka yɛlpakir na paadi ya yinne-yinne;
ya'am dim la ya'am na bɔdig,
ka mi'ilim dim mi'ilim mɛlim.”
15 Tɔɔg na paae banɛ sig bʋmbu'azulima ni
ye ba su'a ka Zugsɔb da baŋ ban gban'e si'ela,
nɛ banɛ tʋm likin ka tɛn'ɛsid ye,
“Anɔ'ɔnɛ nyɛ? Ka anɔ'ɔnɛ baŋɛ?”
16 Ya tulis si'elnam tutula,
ka tɛn'ɛsid ye onɛ ya'abid la nwɛnɛ ya'adɛ?!
Sɔ' nan mi' maal si'el ka li bʋn yɛl onɛ maali li la
ye, “Ka' fʋnɛ maali ma”?
Dʋk na yɛl onɛ ya'ab o la ye, “O zi' si'elaa”?
17 Li kʋ yuugɛ, Lebanon kʋ lɛm mɔr tititada
ka li na anɛ wʋʋ lɔmbɔn'ɔg;
ka zin'ikanɛ daa an lɔmbɔn'ɔd la
na an tisʋma zin'ig wʋsa.
18 Li daar ya'a ti paae,
tʋbkpida na wʋm ka ba karim gbauŋʋ tisi ba,
ka zʋnzɔɔs banɛ bɛ likin biridi la na nyɛt.
19 Tadimnam la na lɛm mɔr sumalisim Zugsɔb la tuon,
banɛ an nɔŋ dim la na maal sumalisim
ka li anɛ Israel Dim Wina'am Onɛ an Kasi la zug.
20 Banɛ mugusidi ba taaba la na bɔdig,
ka banɛ an ninla'asnam la mɛlim,
ka nimbanɛ ka ba ya'am kpɛn' nɛ tʋʋmbɛ'ɛd la kʋ lɛm bɛɛ.
21 La'an nɛ banɛ pian'adi kɛt ka nidib kɔ'ɔŋid bʋʋd,
ka bɛnt banɛ tu'ad sida kɔɔtʋ ni la baans,
ka dit ziri kasɛti mɔŋ banɛ mɔr sida la bʋʋd la;
ba wʋsa na ba'as bɛ'ɛd.
22 Dinzug ka Zugsɔb, onɛ da faaɛn Abraham la, yɛl Jakob yidim ye,
“Nyan kʋ lɛm gban'e ya
ka kɛ ka ya lɔɔdi ya nindaasɛ.
23 Ba ya'a ti nyɛɛ ba biisi ba sʋʋgin,
banɛ ka man nu'ug maal la,
ba na na'as mam ye m yʋ'ʋr an sʋ'ʋŋa
ka m an Kasi Sɔbi tis Jakob yidim la.
Ka ba na zi'en ka li an pakiri tisi ba
man Israel Wina'am yɛla.
24 Banɛ an kalinka'ad siigin la yʋ'ʋn na gban'e li gbin,
ka banɛ nyɔn hali la mɛ siak sa'alʋg.”