AZAYA 39

AZAYA 39

Babilon Na'ab tʋm Sieba na
( 2Na 20:12-19)
1 Saŋkan la Merodak-Baladan onɛ saamme an Babilon Na'ab ka o yʋ'ʋr buon Baladan la da tɔlim gbana nɛ piini ye ba tis Hezekia bɔzugɔ o da wʋm o ban'as la yɛla. 2 Hezekia sʋnf da ma'ae ka o di'e saam la ka pa'ali ba linɛ wʋsa bɛɛ o la'ad dɔɔgin la. La'abama da anɛ, anzurifa nɛ sanlima nɛ tudaari nɛ kpasʋma. O mɛ da pa'ali ba zaba la'ad zin'ig nɛ la'abanɛ wʋsa bɛ la'ad suak dɔɔgin la. Si'el da pʋ kpɛlim na'ayin la bɛɛ o sʋ'ʋlim la ni ka o pʋ pa'ali baa.
3 Azaya onɛ da an nɔdi'es la da keŋ Na'ab Hezekia san'an bu'os o ye, “Nimbanɛ kena la yɛl ye bɔ, ka ba yi yaanɛ na?” Ka Hezekia lɛbis ye, “Ba yinɛ lallisa, hali Babilon teŋin na.” 4 Ka nɔdi'es la bu'os o ye, “Ba nyɛ bɔɔ fʋ yin la?” Ka Hezekia lɛbis ye, “Ba nyɛ si'el wʋsa. Si'el pʋ kpɛlim suak dɔɔgin la ka m pʋ pa'ali baa.” 5 Ka Azaya yɛl Hezekia ye, “Tɔ'! Kɛlisim Zugsɔb Paŋtita'ar Sɔb la yɛl si'el, 6 † ‘Saŋa kenna ka la'abanɛ bɛ na'ayin nwa' wʋsa nɛ fʋ yaanamɛ da su'a la'asieba ba saŋa ti paae zina la wʋsa, ba na vaae li wʋsa lɛb Babilon teŋin ka si'el-si'el kʋ kpɛlim!’ Zugsɔb la yɛl ala.”  7 O lɛn yɛl ye, “Ba na gban'e fʋ yaas banɛ aan fʋ mɛŋ ziim la sieba mɔri keŋ zan' ba ka ba lieb Babilon Na'ayitʋmtʋmnib.” 8 Ka Hezekia lɛbis ye, “Zugsɔb pian'akanɛ ka fʋ pian' la an sʋm!” Bɔzugɔ o tɛn'ɛs o sʋʋnrin ye, “Sumbʋgʋsʋm ya'a sadigim bɛ man nyɔvʋr bɛllim saŋa la, li ka' yɛllɛ.”