AZAYA 41

Onɛ sʋŋid Israel la yɛla
1 “Aaɛn baanlimm man tuon,
yanam banɛ ka ku'om giligi ya tɛɛns la!
Kɛl ka buudi wʋsa nidib tɛndigi ba paŋ!
Kɛl ka ba yi paalʋ na tu'as;
kɛlli ka ti la'as taaba sariakadib zin'igin.
2 Anɔ'ɔnɛ mɔr onɛ bɛ ya-nya'aŋ la kena
ka tis o paŋ ye o tʋm o pʋpielim tʋʋma?
Anɔ'ɔnɛ zaŋ tɛɛnsi niŋ o nu'ugin
ka kɛ ka o nyaŋ na'anam banɛ zabid nɛ o la?
O nɔk o zaba sʋ'ʋg la kʋʋ ba ka ba lieb wʋʋ titan,
ka o tiraug la kɛ ka ba nwɛnɛ udug ka sisi'em mɔri kennɛ.
3 O kati ba nɛ dɔl suokanɛ ka o nan zi' dɔl laa,
ka lɛɛ pʋ pu'alimi o mɛŋa.
4 Anɔ'ɔn maal nɛ'ɛŋa ka nyaŋi tʋmi li?
Anɔ'ɔnɛ sʋ'oe zʋmaana wʋsa yɛla, hali dunia pin'ilʋgʋnɛ?
Man Zugsɔb, onɛ an pin'ilʋg

ka an naar la, maannɛ ala.”

5 Tembanɛ ka ku'om gilig la nyɛɛ li la, dabiem gban'e ba nɛ,
hali tembanɛ bɛ teŋ-magbinnin la kiridnɛ;
Ba la'as nɛ kennɛ m san'an na.
6 Sɔ' wʋsa sʋŋid o tiraan
ka yɛt o ba'abiis ye, “Kpɛ'ɛŋimi ya mɛŋ!”
7 Onɛ kpi'ed la kpɛmisid onɛ kʋnt sanlima la,
ka onɛ mɔr sanlima bʋligid la mɛ
kpɛmisid onɛ mɔr zan'ari kʋnt la.
Ka yɛt onɛ nyɛligidi tabin la ye, “Li an sʋ'ʋŋa.”
O nɔk kpa'asi kpa' ba'ar la tabil sʋ'ʋŋa ka li kʋ lii.
8 “Amaa Israel nidiba, yanamɛ aan m tʋmtʋmnib.
Jakob nidiba, yanam ka m gaŋ,
yanam bama aan m zua Abraham yaas.
9 M mɔri ya yinɛ teŋ-magbinnin na,
ka buoli ya yi zin'ibanɛ lal na
ka yɛl ye, ‘Ya anɛ m tʋmtʋmnib.’
Mam mɛŋi gaŋi ya ka pʋ zan'asi ya.
10 Dinzug da zɔtnɛ dabiem, ka m bɛ nɛ ya,
da kɛ ka li paki ya, ka manɛ aan ya Wina'am.
M na kpɛmisi ya ka sʋŋi ya;
M na mɔri ya nɛ m nu'ukpi'euŋ la ka faaɛn ya.
11 Banɛ duoe zi'e ya yɛla la
sid na di nyan tita'ar
banɛ zan'asi ya la na bɔdig,
ba na nwɛnɛ zaalim nɛ.
12 Ya na ti ieedi ya dataas la zin'ig,
ka kʋ nyɛɛ baa.
Banɛ duoe zi'e bɔɔd ye ba zab nɛ ya la na mɛlim.
13 Manɛ aan ya Zugsɔb Wina'am;
m zanli ya nɛ m datiuŋ nu'ugin
ka yɛti ya ye ya da zɔt dabiem;
ka m na sʋŋi ya.
14 Jakob yaas banɛ an tadimbʋʋsɛ, da zɔti dabiem,
Israel buudbanɛ pɔɔda, da zɔti ya;
mam na sʋŋi ya.”
Zugsɔb la pian' li, onɛ an ya Faangid,
ka an Israel dim Wina'am Onɛ An Kasi la.
15 “Gɔsima, m na maali ya nwɛnɛ dakanɛ bʋ'ʋd ki,
ka ya an bʋmpaal linɛ pʋlim ka mɔr tɛbisim bɛdegʋ.
Ya na nwa'ae zuoya la bugus,
ka kɛ ka kʋkʋna lieb wʋʋ udug nɛ.
16 Ya na yɛligi ba, ka pɛbisim ʋki ba,
ka sisi'etita'ar da'ae ba mɔri keŋ.
Amaa ya na maal sumalisim Zugsɔb la san'an,
ka dʋ'ʋs man Israel dim Wina'am Onɛ An Kasi la yʋ'ʋr.
17 Nɔŋ nɛ fara dim ieed ku'om,
ka pʋ paam baa si'el si'ela;
ka ku'onuud mɔri ba, ka ba zilima kʋdig.
Man Zugsɔb na gandigi ba sɔsʋg;
mam onɛ an Israel Wina'am la kʋ tami ba yɛllɛ.
18 M na kɛ ka kɔldaad pʋbidi dɔl kʋkʋna linɛ an pipiris la zug,
ka kɛ ka ku'om tansid bɔn'ɔdin la.
Ku'om na bun zin'ikanɛ an dindak la yitna.
19 M na kɛ ka na'aziinr nɛ gɔn'ɔs nɛ olif bɛ pipirisin la,
ka tiis yi zin'ikanɛ ka mɔɔg gba pʋ yit la,
tiwa'a banɛ mɔr mɛɛb dasʋma la na yii ani mɛn.”
20 Ala ka nidib na nyɛ ka baŋ,
ba na tɛn'ɛs ka gban'e li gbin,
ye Zugsɔb la paŋi tʋm nɛ'ɛŋa,
ye Israel Wina'am Onɛ an Kasi la maali li.
21 Zugsɔb la yɛl ye, “Yɛlimi dinɛ paki ya,”
Jakob na'ab la yɛl ye, “Yisiminɛ ya nɔɔr pian'ʋkʋ an si'el.”
22 Ka ye, “Mɔrini ya bada la na ka ba yɛli ti
linɛ na niŋ saŋa kanɛ kenna.
Yɛlimi ti kʋdimin yɛla la da an si'em,
ka ti tɛn'ɛsi li yɛla gɔs
ka baŋi li naarɛ na an si'em.
Bɛɛ ya nie pa'ali ti linɛ na ti niŋ.
23 Yɛlimi ti linɛ na niŋ bɛog,
ka ti baŋ ye ya sid anɛ wina.
Maalimi bʋn linɛ an sʋm bɛɛ bɛ'ɛd,
ka li na paki ti ka kpɛn'ɛsi ti dabiem.
24 Badaa, ya ka' vɔɔnrɛ,
ya tʋʋma wʋsa anɛ zaalim;
ka banɛ kaanbidi ya la mɛ ka' vɔɔnrɛ.
25 M gaŋ sɔ' ka o yi ya-datiuŋʋ kenna
o yinɛ winnigi tansid zin'isi'a la ka na'asid man yʋ'ʋr.
O nɔɔd na'anam wʋʋ tan nɛ,
ka nwɛnɛ onɛ ya'abid ya'adi nɔn ya'ad si'em la.
26 Anɔ'ɔnɛ yɛl nɛ' yɛla pin'ilʋgʋn ka ti na baŋɛ,
bɛɛ dɛŋi maal ka ti na yɛl ye, ‘On yɛl si'el la anɛ sida’?
Ayei, sɔ' pʋ nie nɛ' yɛllɛ,
sɔ' mɛ pʋ dɛŋi yɛli li yɛllɛ,
sɔ' pʋ wʋm pian'asi'a ya san'anɛ.
27 Manɛ dɛŋ yiiga yɛl Zion ye, ‘Gɔsima, banɛ nwana!’
M tʋm sɔ' Jerusalem ye o yɛli ba labasʋŋ la.
28 M gɔs bada la ni ka pʋ nyɛ sɔ'ɔɔ,
sɔ' ka' ba sʋʋgin la na nyaŋi sa'ali ba,
Man bu'osi ba la, sɔ' pʋ nyaŋi gandigɛ.
29 Gɔsima, ba wʋsa anɛ ziri dim!
Ba tʋʋma la wʋsa la'asi anɛ zaalim,
bada la wʋsa nwɛnɛ sisi'em da'ad.”