AZAYA 48

Israel dim zukpi'euŋ la yɛla
1 Kɛlisimi nɛ', Jakob yidima,
yanam banɛ ka ba mɔr Israel yʋ'ʋri buonnɛ ya
ka ya yi Juda gbinnin na la,
yanam banɛ pɔɔd nɛ Zugsɔb yʋ'ʋr,
ka ye ya dɔlnɛ Israel Wina'am
amaa ka li ka' sida la.
2 Yanam banɛ buoli ya mɛŋ ye ya anɛ tempʋkanɛ an kasi nidib
ka ti'e Israel Wina'am la.
Zugsɔb Paŋtita'ar Sɔb la aan o yʋ'ʋr.
3 “M dɛŋi yɛl linɛ an kʋdimin yɛla ka li yuug,
m nɔɔr mɔɔli li ka pa'ali li nyain;
m tʋmi li vuguri, ka kɛ ka li maal.
4 Mam mi' ya tʋbzian'asim yɛla;
ya niŋgɔɔnr pʋ su'unida,
ka ya zut kpi'emi gaad kʋntzɛn'ug.
5 Alazug ka m yɛli ya nɛ'ɛnam kʋdimin sa la;
m mɔɔli li yɛla tisi ya ka li nam pʋ maalɛ;
ala ka ya kʋ yɛl ye,

‘Ti bada la maali ba,’

bɛɛ ‘Ti daad nɛ ti kʋnt wina la niŋi li.’
6 Ya wʋm nɛ'ɛnam yɛla; yʋ'ʋn gɔsimini ba.
Ya kʋ siakɛɛ?
Lin yi nannanna wa'ae sa m na yɛli ya yɛlpaala
banɛ su'a ka ya pʋ baŋ la.
7 Bʋmbama maan nɛ nannanna ka ka' saŋa kanɛ gaad la;
Ya nan zi' wʋmi li daasi'er sa ka ya'a ka' zinaa.
Ala ka ya kʋ nyaŋi yɛl ye,
‘Ɛɛn, ti pʋn mi' ba yɛlaa.’
8 Yanam pʋ wʋm bɛɛ gban'e li gbinnɛ;
hali kʋdimin sa ya tʋba nam pʋ yɔ'ɔgɛ.
M mi' ya sʋ'ʋŋa ye ya anɛ banɛ ka ya pʋʋg pʋ paada;
ya biilimin sa ya anɛ banɛ pʋ siakida.
9 † Mam pʋ bɔɔd ye m yʋ'ʋr san'am la zug
ka m gu'usid nɛ m sʋnpɛɛn la;
m mɛŋ yʋ'ʋsʋŋ zug, m kʋ kɛ ka li kɛɛn ya san'an na, san'ami ya.
10 Gɔsima, m maki ya nɛ namisʋg linɛ nwɛnɛ bugum,
ka nwɛnɛ anzurifa ka ba nyɛligidi siligid si'em la.

11 Mam mɛŋ zug, ka m niŋ nɛ'.

M na niŋ wala kɛ ka m mɛŋ yʋ'ʋr nyɛ zɛrigirɛ?
M kʋ nɔki m na'asi la tis sɔ'ɔɔ.”
Israel nyɛ yɔlisim
12 “Kɛlisima, O Jakob
Israel onɛ ka m buol la:
Manɛ la, manɛ an pin'ilʋg ka an naar.
13 † Mam mɛŋ nu'ug ka m ɛɛnb dunia la,
ka m datiuŋ nu'ug yadig saŋgbana la;
m ya'a buoli ba,
ba wʋsa la'asid nɛ duoe zi'en.
14 Ya wʋsa la'asim taaba na ka kɛlis.
Ba'akanɛ san'anɛ dɛŋi yɛli ya nɛ'ɛnam yɛla?
Zugsɔb la gaŋ sɔ' la
na niŋ nwɛnɛ on gban'e ye o niŋ Babilon dim si'em la.
O nu'ukanɛ mɔr paŋ la na zab nɛ Babilon.
15 Mam mɛŋ mɛŋi pian';
ɛɛn, manɛ buol o.
M na mɔr o na,
ka o na nyaŋi tʋm o tʋʋma sʋ'ʋŋa.
16 “Li'elimi m san'an na, ka kɛlis nɛ'ɛŋa:
“M yiiga mɔɔlʋg la, m pʋ su'a pian';
ka lin maal saŋsi'a la, m bɛɛ ani mɛn.”
Ka nannanna Zugsɔb onɛ an Paŋtita'ar Sɔb la,
tʋmim nɛ o Siig la.
17 Zugsɔb onɛ an Israel dim Faangid
ka an Wina'am Onɛ An Kasi la yɛl si'em nwa':
“Manɛ an fʋ Zugsɔb Wina'am
onɛ pa'anif linɛ an sʋm,
ka pa'anif suokanɛ ka fʋ na ken.
18 Fʋ ya'a kɛlisini m nɔzi'ela la,
fʋ sumbʋgʋsʋm na pʋbid nwɛnɛ kɔldaug ku'om nɛ,
ka fʋ pʋpielim nwɛnɛ atɛuk ku'opila nɛ.
19 Fʋ yaas la na zu'oe wʋʋ titanbin'isʋg nɛ,
ka fʋ biis na nwɛnɛ tanbin'isbʋʋlʋg nɛ;
ba yʋ'ʋr ka' linɛ na bɔdigɛ
bɛɛ li san'am mam san'anɛ.”
20 Basim Babilon,
zɔm yi Babilon dim san'an!
Mɔɔlim agɔla gɔla nɛ sumalisim
ka yɛli li yɛla.
Kɛl ka labaar la paae teŋ-magbinnin;
yɛlim ye, “Zugsɔb la faaɛn o tʋmtʋm Jakob.”
21 On da mɔri ba ken sian'arin la, ku'onuud da pʋ gban'e baa.
O da kɛ ka ku'om yi tampiingin na ka ba nu;
o da buak tampiing la,
ka ku'om yina.  22 Zugsɔb la yɛl ye,
“Bugusim dim kʋ maligin nyɛ sumalisim.”