AZAYA 49

Zugsɔb tʋmtʋm la yɛla 1 Kɛlisimi yanam banɛ ka ku'om giligi ya tɛɛns la;

wʋmmi nɛ'ɛŋa, yanam tɛɛns banɛ bɛ lalli la:
Zugsɔb la da buolim ka ba nam pʋ du'a ma;
m du'am saŋa ka o pʋd o m yʋ'ʋr.
2 O kɛ ka m nɔɔr pian'ad dit nwɛnɛ zaba sʋ'ʋg nɛ,
ka zaŋimi su'a o nu'ug pʋʋgin.
O maalim ka m pʋlim nwɛnɛ piim nɛ;
ka nɔkimi suu o lɔkin.
3 O yɛlim ye, “Israel, fʋ anɛ m tʋmtʋm,
di na yinɛ fʋ ni ka nidib dʋ'ʋsi m yʋ'ʋr.”
4 Amaa ka m yɛl ye, “Man gɛɛnlis la ka' gbinnɛ;
M san'ami m paŋ zaalim ka si'el-si'el kae.
Nɛ wala, linɛ nar nɛ man la bɛ nɛ Zugsɔb la nu'ugin,
ka m yɔɔd bɛɛ m Wina'am san'an.”
5 Nannanna Zugsɔb la pian' tisim;
o anɛ onɛ maalimi niŋi m ma pʋʋgin ye m aan o tʋmtʋm,
ka mɔr Jakob n lɛb o san'an na,
ka la'as Israel dim banɛ widig la o mɛŋ san'an.
Zugsɔb la tisim na'asi
m Wina'am la aan m paŋ.
6 O yɛlim ye,
“Fʋ kʋ aan m tʋmtʋm ma'aanɛ,
ye fʋ kɛ ka Jakob buudi la ma'aa lɛbi m san'an na
ka mɔr Israel dim banɛ kpɛlim la lɛbis na,
amaa m mɛ na kɛ ka fʋ an nɛɛsim tis banɛ ka' Israel dim buudi la,
ka kɛ ka ba baŋ Wina'am yɛla nyain.
Ala ka fʋ na mɔri m faangir la paae dunia bɛn wʋsa.”
7 Zugsɔb onɛ aan ya Faangid ka an Kasi tis Israel la
yɛt onɛ ka buudi wʋsa da nɛ'ɛs ka kis o la,
on onɛ an tʋmtʋmi tis na'anam la;
yɛl si'eli nwa' ye:
“Na'anam na nyɛɛf ka duoe zi'en,
ka kpi'emnam mɛ nyɛɛf ka igin teŋin,
ka li anɛ Zugsɔb onɛ an sida sɔb la zug

onɛ an Kasi tis Israel kanɛ ka o gaŋ la.”

Israel dim na lɛbi ba zin'igin
8 † Zugsɔb la yɛl si'eli nwa' ye,
“Saŋkanɛ ka m na zɔɔ ya nyɔɔg la ya'a ti paae, m na di'e ya winsɔsʋg,
ka na sʋŋi ya m faangir daar la;
m na guri ya ka maali ya
ka li na yinɛ ya san'an na ka m na maal nɔnaar nɛ nidib wʋsa,
ka kɛ ka teŋ la lɛbi digin wʋʋ lin daa an si'em la,
ka nidib lɛbi zin'inɛ ba teŋ kanɛ daa lieb dabɔɔd la.
9 Ka yɛl banɛ ka ba gban'e ba ka ba an yammis la ye, ‘Yimi na,’
ka yɛl banɛ bɛ likin la ye, ‘Yimi nɛɛsimin na!’
Ba na nwɛnɛ kɔnbidi ɔnbid suoya nɔɔrin.
Hali baa pipirisi nɛ, ba na nyɛ diibi di.
10 † Kɔ'ɔm bɛɛ ku'onuud kʋ gban'e ba,
ka nintaŋ tʋʋlʋg kʋ wʋmi baa.
Onɛ zɔti ba nimbaanlig la na guri ba,
ka na dɔlli ba keŋ ku'om bun zin'isi'a.
11 M na kɛ ka m zuoya la wʋsa lieb suoya,
ka na dʋ'ʋsi m suoraad la.
12 Gɔsima, ba na yi lalli kena;
sieba na yi datiuŋ na ka sieba yi ya-tuona na,
ka sieba yi Ason sʋ'ʋlimin na.
13 Saŋgbana, tansimi nɛ sumalisim;
teŋgbauŋɔ, maalim sumalisim;
zuoya, yʋ'ʋmmi nɛ sumalisim!
Zugsɔb la bʋgʋnnɛ o nidib sʋnya
ka na zɔt banɛ namisid la nimbaanlig.”

14 Amaa Zion teŋ la yɛl ye, “Zugsɔb la bas mam nɛ,

Zugsɔb la tam mam yɛla nɛ.”
15 Ka Zugsɔb la lɛbis ye, “Pu'a na tam o bikanɛ nam mu'ad yɛllɛɛ?
O kʋ zɔɔ o bikanɛ ka o du'a la nimbaanligaa?
Hali o ya'a na tam,
man lɛɛ kʋ tami fʋ yɛllɛ!
16 Gɔsima, Jerusalem, m sɔbi fʋ yʋ'ʋri niŋi m nu'usin;
m kʋ tami fʋ yɛla baa bi'elaa.
17 Fʋ biis na lɛbi fʋ san'an tɔ'ɔtɔ na,
ka banɛ san'amif la zɔ ka basif.
18 † Ʋkimi fʋ nindaa gɔsi gilig;
fʋ biis la wʋsa la'asidi fʋ san'an na.”
Zugsɔb la yɛl ye, “Sida-sida,
fʋ na nwɛ' nyɔ'ɔg nɛ fʋ nidib la yɛla;
ba na nwɛnɛ pu'apaali na yɛ fuvɛnla nɛ.
19 La'an nɛ teŋ la lieb dabɔɔd ka nid baa yinne kae
ka teŋ la dig zaalim la,
nannanna li na pɔɔdi tisi fʋ nidib la,
ka fʋ bi'emnam banɛ san'ami li la na lalig sa ka basif.
20 Bibanɛ ka fʋ daa du'a fʋ sʋnsa'aŋ saŋa la
na yɛli fʋ tʋba ni ye,
‘Zin'ikaŋa pɔɔdi tisi ti;
tisimi ti paalʋ linɛ zu'oe ka ti bɛɛ ani.’
21 Ka fʋ na yɛli fʋ sʋnfʋn ye,
‘Anɔ'ɔnɛ du'a bama tisi ma?
M daa mɔr sʋnsa'aŋ ka pʋ lɛm mɔr biiga;
ba daa mɔrimi lɔ'ɔŋ teŋ ka zan'asim.
Anɔ'ɔnɛ ugusi ba?
M daa kpɛlim nɛ m kɔn'ɔkɔn',
amaa gɔsima, bibama wʋsa yi yaanɛ na?’”
22 Zugsɔb onɛ an Paŋtita'ar Sɔb la yɛl si'eli nwa':
“Gɔsima, m na buol banɛ ka' Israel dim la,
ka yɛl dunia nidib wʋsa
ye ba mɔri fʋ biribis la ba nu'usin na
ka buki fʋ pu'ayuos la mɔr na.
23 Na'anamɛ na liebi fʋ saamnam,
ka ba pu'ab mu'asidi fʋ biis.
Ba na igini fʋ tuon ka tisif girima;
ba na sigisi ba mɛŋi fʋ tuon ka na'asif.
Ala ka fʋ na baŋ ye manɛ an Zugsɔb la;
banɛ nɔki ba ti'iri niŋi m ni la kʋ di nyannɛ.”
24 Ban zabi faaɛn si'el la,
sɔ' na lɛn nyaŋi faaɛn li zabzabidib la nu'usinɛɛ?

Anɔ'ɔnɛ na nyaŋi sʋŋ banɛ ka ba zabi gban'e ba

ka faaɛn ba zabzabid la nu'usinɛ?
25 Amaa Zugsɔb la yɛl si'eli nwa':
“Ɛɛn, ba na faaɛn banɛ ka ba gban'e ba la zabzabidib la nu'usin,
ka di'e la'abanɛ ka zabzabidib la faaɛn la.
M na zab nɛ banɛ zabid nɛf la
ka fʋ biis na nyɛ faangir.
26 M na kɛ ka banɛ mugusidif la ɔnbi ba mɛŋ niŋgbiŋ;
ba na nuu ba mɛŋ ziim, wʋʋ daam nɛ.
Ala ka nidib na baŋ ye,
man Zugsɔb la anɛ Faangid,
ya Faangid la anɛ Paŋtita'ar Sɔbi tis Jakob.”