AZAYA 5

AZAYA ZUT 5

Vain tiis pɔɔg yʋʋma
1 “M na yʋ'ʋm tis onɛ ka m nɔŋ la;
o vain tiis pɔɔg la yɛla ka m na yʋ'ʋm ye,
‘Onɛ ka m nɔŋ la mɔr tiis pɔɔg
ka li bɛ zuokanɛ mɔr kʋ'ʋlʋm la zug.
2 O tuu li ka uusi yis kuga la wʋsa,
ka gaŋ tisʋma sɛ.
O mɛ' dɔwɔk kanɛ ka ba zin' gur,
ka tu zin'ikanɛ ka ba na nwi'asid vain la,
ka bɔ tibanɛ wan walsʋma,
amaa ka ba lɛɛ wan walbɛ'ɛdnam.
3 Nannanna, yanam banɛ bɛ Jerusalem nɛ Juda,
kadimi mam nɛ m vain tiis pɔɔg la saria.
4 Bɔ ka m naan maalinɛ m tiis pɔɔgin la
gat mam maal si'el la?
Man daa tɛn'ɛs ye li na wal walsʋma la,
li niŋ wala wan walbɛ'ɛdnam ma'aanɛ?
5 Nannanna, m na yɛli ya mam na niŋi m pɔɔg la si'em;
m na yis linɛ ka m maali gu' li lɛbis la
ka kɛ ka li san'am.
M na nwa'ae li zaŋguom la
ka bʋnkɔnbid kpɛn' nɔɔ li.
6 M na bas ka mɔɔg yi li pʋʋgin.
M kʋ pɛsi li maal sʋ'ʋŋa
bɛɛ m kua pɔɔg la,
ka na kɛ ka tutubɛ'ɛd nɛ gɔn'ɔs tiis yii ani.
M mɛ na yɛl saŋgbana la
ye ba da kɛ ka saa ni anina.’
7 Zugsɔb onɛ an Paŋtita'ar Sɔb la pɔɔg anɛ Israel,
ka Juda dim nwɛnɛ o lɔmbɔn'ɔg nɛ.
O bɔɔdi sida
amaa on nyɛt si'el anɛ ninkʋʋr ma'aa,
O ieedi pʋpielim nɛ sumalisim
amaa o lɛɛ wʋmnɛ banɛ namisid la kaasig nɛ sʋnsa'aŋ ma'aa.”
Tʋʋmbɛ'ɛd sa'alʋg
8 Tɔɔg bɛ yanam banɛ ɛɛnti mɛ' yir
ka lɛn tɔlisi mɛ' yisi'a,
ka ɛɛnti kua pɔɔg ka lɛn tɔlisi kua pɔsi'a,
ka teŋ la wʋsa liebi ya sʋ'ʋlim
ka sɔ' kʋ lɛn nyɛ paalʋʋ mɛ' bɛɛ kua la,
ka ya yʋ'ʋn bɛɛ ya kɔn'ɔkɔn' teŋ la zugin.
9 Zugsɔb onɛ an Paŋtita'ar Sɔb la pian' ya ka m wʋm. O yɛl ye,
“Sida, ya' titada la na lieb dabɔɔd
ka ya' vɛnla la na zi'e ka sɔ' kʋ kpɛn' li pʋʋginɛ.
10 Vain tiis pɔɔd piiga linɛ ka ba sɛ la,
ba na nwiak daam pɛ'ɛl danyʋʋr yinne ma'aa.
Pɔkanɛ ka ba zaŋ bʋmbʋʋda bɛdegʋ bʋd la,
ba na buni li paam bi'ela.”
11 Tɔɔg na paae banɛ ɛɛnti isig bɛkɛungʋ
zɔti ieed daam zin'ig la,
nɛ banɛ ɛɛnti zin'in daamin ka yʋ'ʋŋ ti sɔbi sʋdig
ka ba nuu kʋʋl ka ba niŋgbina wʋsa lieb daam la.
12 Ba ya'a la'as ye ba di,
ba kɛti ka googinam nɛ siyada nwɛ'ɛd,
ka wiis piebid,
ka galana nɛ piris nwɛ'ɛd ka daam zi'e.
Amaa ka ba ba'a kae nɛ Zugsɔbi tʋm si'el la,
ka mɛ pʋ na'asid Zugsɔb la maal si'el la.
13 Dinzugɔ, m na kɛ ka ba gban'e m nidib la keŋ teŋ zʋŋ
ka ba an sankpan'asnam,
ban pʋ gban'ad yɛla gbin la zug.
Kɔ'ɔm na kʋʋ ba kpɛɛmnam la,
ka ku'onuud kʋʋ ba tadimnam la wʋsa.
14 Alazug, Ayaʋg mɔri ya ya'amlɛog hali bɔɔd ye o vɔli ya,
ka ya'ae o nɔɔri gur.
Ani ka ya kpi'emnam la nɛ tadimnam la wʋsa na sig
la'an nɛ nimbanɛ maan tʋkpiidʋg ka aan m ba'akae dim la.
15 Ba na ti kɛ ka ninsaalib sig teŋin,
ba na sie saalib la wʋsa;
ba na diis tita'alim sɔb nyan.
16 Amaa Zugsɔb onɛ an Paŋtita'ar Sɔb la ka ba na dʋ'ʋs
o ya'a namisi ba wʋʋ din nar si'em.
Wina'am Onɛ An Kasi la na pa'al ye o sid an kasi
ka li yinɛ o pʋpielim tʋʋma ni na.
17 Din saŋa, pɛ'ɛs na ɔnbid yaama anina nwɛnɛ ba yam ɔnbsir zin'ig nɛ,
ka pɛbibis mɛ na ɔnbid yaama dabɔɔdin la.
18 Tɔɔg na paae yanam banɛ mɔr dama'am
ka vɛ'ɛd tʋʋmbɛ'ɛd nɛ bugusim mɔri kenna,
nwɛnɛ tɛreko ka ba vɛ'ɛd nɛ nwiis la.
19 Banɛ yɛt ye, “Wina'am, niŋim tɔ'ɔtɔ!
O gbirigim tʋm o tʋʋma ka ti nini nyɛ!
O kɛl ka li li'el na!
Israel Wina'am Onɛ An Kasi la
kɛl ka on gban'e si'em la nie ka ti baŋ!”
20 Tɔɔg na paae banɛ buon bɛ'ɛd ye sʋ'ʋm,
ka mɛ buon sʋ'ʋm ye bɛ'ɛd la,
ka zaŋ liki buon ye nɛɛsim
ka lɛɛ buol nɛɛsim ye lik la;
hali ba buon bʋmmalisiŋ ye bʋntɔɔg,
ka lɛɛ buon bʋntɔɔg ye bʋmmalisiŋ.
21 Tɔɔg na paae banɛ tɛn'ɛs ye ba mɔri ya'am,
ka nwɛ'ɛd nyɔ'ɔg ye ba mi' yɛla wʋsa la.
22 Tɔɔg na paae banɛ yʋ'ʋri yi
ka li anɛ ban nuud daam bugid hali la,
nɛ banɛ pa'annɛ ba gandaalim an si'em
ka li anɛ ban gɛndigid danma kɔn'ɔb kɔn'ɔbi nuud la yɛla.
23 Banɛ di'esid ligidi ka kɛt ka onɛ tʋm taal keŋ zaalim,
ka lɛɛ mɔŋid sida sɔb bʋʋd la.
24 Dinzugɔ, nwɛnɛ bugum dit kikan'a si'em la
bɛɛ lin lɛligid mɔɔd si'em la,
ala ka ba na an wʋʋ tiis ka ba nya'a pun'oe nɛ,
ka ba mɔpuum sʋʋg nwɛnɛ uusʋg
ka sisi'em da'adi ken nɛ.
Bɔzugɔ ban ki'is Zugsɔb Paŋtita'ar Sɔb la zi'elʋg
ka zan'as Israel dim Wina'am Onɛ An Kasi pian'ad la zug.
25 Alazug ka Zugsɔb la sʋnf la'aŋ wʋʋ bugum nɛ, o nidib la yɛla,
ka o zaŋ o mɛŋ-mɛŋ nu'ugʋ nwɛ' baa digil.
O kɛ ka zuoya dammid,
ka nidib kpii yadig suoya ni nwɛnɛ sa'ad nɛ.
La'an nɛ wala, o sʋnpɛɛn la kʋ tɔɔm ka basi baa,
li nan kpɛm bɛ nɛ ba zugin.
26 O na ʋk tuuta ye tɛɛns banɛ bɛ lalli la kena,
ka vʋʋli buol banɛ bɛ dunia kpikpɛmis la.
Banɛ nwa' zɔt tɔ'ɔtɔ kenna!
27 Ba sɔ'ɔsɔ pʋ gɛn bɛɛ tu'ugɛ,
ka sɔ' pʋ zɔɔnsim bɛɛ gbisɛ.
Ba sɔ' sɛnbidiŋ pʋ yu'as o sien
bɛɛ sɔ' ta'ada nwiis kɛnsigɛ.
28 Ba piema la pʋlimnɛ
ka ba tiraad la gʋdi gur tɔɔnb.
Ba widi tafɛɛd la kpi'emnɛ nwɛnɛ sataŋ nɛ,
ka ba zaba tɛrekonam la zɔti nwɛnɛ sisi'epiliŋ nɛ.
29 Ba ya'a kaas li nwɛnɛ gbigim nɛ,
ba ya'a nwa'am li nwɛnɛ gbigimbibis nɛ.
Ba nyuunnɛ wʋʋ bʋnyua na gban'e bʋnkɔnbʋgʋ
mɔri wa'ae ka sɔ' kae na faaɛn o basɛ.
30 Daakan la ya'a ti paae, ba na kaasi bas Israel zug
ka li vuudi nwɛnɛ atɛuk ku'opila vuud si'em la.
Ka nid ya'a gɔs teŋgbauŋʋn la, o nyɛti lik nɛ sʋnsa'aŋ,
hali ka saŋgbana la na vɔl nɛɛsim ka li lieb zibisʋg.