AZAYA 50

Israel tʋʋmbɛ'ɛd nɛ Zugsɔb tʋmtʋm la siakir
1 Zugsɔb la yɛl si'eli nwa':
“Ya tɛn'ɛs ye m kadi m nidib la nɛ bas
nwɛnɛ dau na kad o pu'a lɛbisɛɛ?
Ka li ya'a pʋn aan ala, li kasɛt gbauŋ bɛ ya?
Ya tɛn'ɛs ye m kuosi ya nɛ yɔ sam
nwɛnɛ ninkanɛ kuos o biisi tis sankpan'asim?
Li anɛ ya tʋʋmbɛ'ɛd zug ka m kuosi ya;
ya tʋʋmbɛ'ɛd zug ka m kadi ya maa lɛbis.
2 Man kɛɛn na la, bɔ ka sɔ'ɔsɔ ka'anɛ?
Ka man buol la, bɔ ka sɔ' pʋ siakɛ?
Anɛ m nu'ugʋ gim hali galis nɛ mam na nyaŋi faaɛn yaa?
Bɛɛ m paŋi pɔɔd nɛ mam na yisi ya?
M pian'ʋk bi'ela da kɛ ka atɛuk kpiɛn kʋdig,
ka m kɛ ka kɔldaad lieb pipiris;
ka zimi la kpi nɛ ku'onuud ka pun'oe.
3 Mam pil saŋgbana la nɛ lik,
wʋʋ sʋnsa'aŋ dimi yɛ fusabila si'em la.”
4 Zugsɔb onɛ an Paŋtita'ar Sɔb la tisim baŋir ka m na nyaŋi pian',
ka pian'ad linɛ na kpɛ'ɛŋ banɛ tadig la.
O niedim bɛkɛung wʋsa,
o yɔ'ɔgidi m tʋba ka m kɛlisid wʋʋ onɛ ka ba pa'an.
5 Zugsɔb onɛ an Paŋtita'ar Sɔb la yɔ'ɔgi m tʋba
ka m pʋ zan'asɛ;
M pʋ bid o kudugɔ.
6 † M basim nya'aŋi tis banɛ bʋ'ʋdim la,
ka basim tieŋgu'ori tis banɛ vɔɔndim tieŋ la;
m pʋ su'a m nindaa nɛ banɛ la'adim
ka tʋbisid nintɔɔndi niŋidim la.
7 Zugsɔb onɛ an Paŋtita'ar Sɔb la sʋŋidim la zug,
m kʋ di nyannɛ.
Alazug ka m mɔdigid,
ka mi' ye nyan kʋ dii ma.
8 On kanɛ zi'e m nya'aŋ la bɛ yammin,
dinzug, anɔ'ɔnɛ na zi'enɛ tu'a nɛ mam?
Kɛl ka ti kpa' taaba!
Anɔ'ɔnɛ na nyaŋi yɛl ye, man tʋm bɛ'ɛdɛ?
Kɛl ka on sɔb kena bu'osim!
9 Zugsɔb onɛ an Paŋtita'ar Sɔb la sʋŋid mam la,
anɔ'ɔnɛ na kʋʋs man yɛla bɛ'ɛdɛ?
Ba wʋsa na aans nwɛnɛ fuud
ka muak mu'a ba.
10 Anɔ'ɔnɛ bɛɛ ya sʋʋgin zɔt Zugsɔb la
ka siakid o tʋmtʋm nɔɔr pian'adɛ?
Onɛ ken likin ka pʋ mɔr nɛɛsim la,
kɛl ka o niŋ Zugsɔb la yʋ'ʋr yadda
ka nɔk o ti'iri niŋ o Wina'am la san'an.
11 Amaa nannanna, yanam banɛ mɔ'ɔsid bugum
ka nyɔ'ɔdi ya mɛŋ bugum la,
kemini ya mɛŋ nɛɛsimin la,
amaa baŋimi ye yanamɛ na di'e si'eli nwa':
ya na dig nɛ namisʋg.