AZAYA 51
Pian'azug
AZAYA 51
Zion na nyɛ faangir linɛ ka' naarɛ 1 “Kɛlisimi, yanam banɛ bɔɔd pʋpielim ka ieed Zugsɔb la. Tɛn'ɛsimi tampinkanɛ ni ka ba kpi'e ya yis na la nɛ kugkanɛ ka ba ki'e yisi ya la. 2 Tɛn'ɛsimi Abraham onɛ aan ya yaab la nɛ Sara onɛ du'a ya la yɛla. Man da buol Abraham la ka o anɛ o kɔn'ɔkɔn', ka m niŋ o albareka ka kɛ ka o nɔbig. 3 Zugsɔb la na bʋgʋl Zion sʋnf ka zɔɔ o nimbaanlig san'auŋ linɛ paae o la zug; o na maal o pipiris zin'ig la ka li nwɛnɛ Eden teŋ vɛnliŋ la nɛ. O na nɔk o zin'ikanɛ pʋ maan si'el-si'el la ka kɛ ka li lieb wʋʋ Zugsɔb lɔmbɔn'ɔg la nɛ. Sumalisim na bɛɛ o san'an, li na an bareka pʋ'ʋsim nɛ yʋ'ʋma ma'aa. 4 M nidiba, kɛlisimi; yanam banɛ aan m buudi la, wʋmmi! M na nɔki m wada la tis tɛɛns la wʋsa; ka m sida la na lieb nɛɛsim tisi ba. 5 M pʋpielim la li'en tɔ'ɔtɔ na, ka m faangir la bɛ suor. M paŋ la na mɔr yɛlsida kɛn buudi wʋsa ni na. Tɛɛns banɛ ka ku'om gilig la na gɔsid mam ka mɔr ti'ir ye m paŋ la na faaɛn ba. 6 Gɔdigim gɔs agɔla ka su'uni gɔs teŋin. Saŋgbana la na mɛlim nwɛnɛ nyɔ'ɔs nɛ, ka teŋgbauŋ la aaɛn wʋʋ kparikɛɛnd nɛ ka nidib la kpi nwɛnɛ pʋmpɔɔs nɛ. Amaa m faangir la na bɛ saŋa wʋsa, ka m pʋpielim la kʋ gʋ'ʋŋɛ. 7 Wʋmmi, yanam banɛ mi' linɛ dɔl suor la, yanam banɛ mɔri m wada la ya sʋnya ni la: Da kɛ ka nidib zɛrigir paki yaa bɛɛ zɔti ba tʋ'ʋd la. 8 Muak na mu'a ba wʋʋ fuug nɛ; zʋnzʋnya na dii ba wʋsa. Amaa m pʋpielim la na bɛ saŋa wʋsa, m faangir na paae zʋmaana wʋsa.” 9 Duom, duom! Zi'enim nɛ paŋ! Zugsɔba, pa'alimi fʋ paŋ! Duom, nwɛnɛ dabisbanɛ gaad la, nwɛnɛ zʋmaʋŋ kʋdig saŋa la. Ka' fʋnɛ da kie Rahab n zɔri zɔr ka kʋns bʋnzɔtir linɛ bɛ ku'otita'arin la tɔligɛɛ? 10 Ka' fʋnɛ da kɛ ka atɛuk la ku'om kpiɛn ka ku'ozulima kʋdigɛɛ? Ka maal suor atɛuk zulʋŋ pɔɔgin ye banɛ ka fʋ faaɛn la dɔlli gaadɛɛ? 11 Nannanna banɛ ka Zugsɔb faaɛn ba la na lɛb na.
Ba na yʋʋm kpɛn' Zion tempʋʋgin;
ba na mɔr sumalisim linɛ ka' bɛnnɛ. Ba sumalisim na tʋʋgi li bɛn, sʋnsa'aŋ na gaad ka basi ba. 12 “Mam mɛŋi bʋgʋnnɛ ya sʋnya. Bɔzug ka ya zɔt ninsaalib banɛ nwɛnɛ mɔɔd ka pʋ yuugid la? 13 Bɔzug ka ya tam Zugsɔb onɛ maali ya ka tiɛn saŋgbana ka ɛɛnb dunia ɛɛnbir la? Bɔzug ka ya zɔt banɛ mugusidi ya la dabiem daar wʋsa, ban banɛ ti'eb ye ba san'ami ya yɛla la? Ba sʋnpɛɛn la kʋ nyaŋi niŋi ya si'el si'ela. 14 Li kʋ yuugɛ ka banɛ bɛ sanrega ni la paam yɔlisim. Ba kʋ kpi bʋmbɔkin la, bɛɛ ba kɔ'ɔŋ diibɔ. 15 Manɛ aan ya Zugsɔb Wina'am onɛ gudigid atɛuk ka li ku'opila duosid agɔla. M yʋ'ʋri an Paŋtita'ar Sɔb. 16 M niŋi m pian'adi ya nɔɔrin ka nɔki m nu'ug ma'asim lusi ya. Manɛ an onɛ zi'el saŋgbana la ba zi'esigin, ka an onɛ ɛɛnb dunia la ɛɛnbir, ka an onɛ yɛl Zion dim ye, ‘Ya anɛ m nidib.’” Wina'am sʋnpɛɛn bʋtiŋ Duom, duom! O Jerusalem, duom, Zugsɔb la sʋnf daa duoe nɛf; fʋ namisʋg daa nwɛnɛ daam dinɛ bɛ bʋtiŋin nɛ. Zugsɔb la daa kɛ ka fʋ nu dankan la; fʋ daa nu daam la wʋsa hali bugi gɛnnim. 18 Jerusalem da mɔr nidib bɛdegʋ, amaa tuongat da kae na gaad o tuonnɛ. Nimbanɛ da duoe ani la wʋsa, sɔ' da kae na gɔs oo. 19 Yɛltɔɔd ayi' nwaa la'asi bɛɛ fʋ zugin la, anɔ'ɔn na nyaŋi bɛlisi fɔ? San'auŋ nɛ kɔ'ɔm nɛ zaba bɛɛ fʋ zugin la, anɔ'ɔn na bʋgʋli fʋ sʋnfɔ? 20 Fʋ biis la nwi'enɛ ba dignɛ suor wʋsa ni, nwɛnɛ walig ka baŋ gban'e o nɛ. Zugsɔb la sʋnpɛɛn bɛɛ ba zug ka ba Wina'am la zɛrigi ba hali. 21 Dinzugɔ fʋn kanɛ namisida, kɛlisim sʋ'ʋŋa, fʋ kʋʋlnɛ ka lɛɛ pʋ nu daam. 22 Fʋ Zugsɔb onɛ an Paŋtita'ar Sɔb la yɛl si'eli nwa', fʋ Wina'am kanɛ zabidi sʋŋid o nidib la: “Gɔsima, m di'e bʋtiŋ la fʋ nu'ugin, bʋtiŋ kanɛ kɛ ka fʋ kennɛ gɛnnim la; bʋtiŋ linɛ an tɔɔg ka an m sʋnpɛɛn la, fʋ kʋ lɛn nuu li ya'asɛ. 23 M na nɔki li niŋ banɛ namisidif la nu'usin, ka ba nɔɔdif wʋʋ titan la.”