AZAYA 54

Zion n na ti an si'em
1 † Zugsɔb la yɛl ye,
“Jerusalem, yʋ'ʋm nɛ sumalisim,
fʋn kanɛ nwɛnɛ pu'a kanɛ nan zi' du'a la;
yʋ'ʋm ka tansid nɛ sumalisim,
fʋn kanɛ nan zi' sa'ae la;
bɔzugɔ pu'a kanɛ ka' sid la biis na zu'oe
gaad pu'a kanɛ mɔr sid la.”
Zugsɔb la yɛl ala.
2 Yaligimi fʋ Fuug Sʋgʋr la,
vɛ'ɛgim fubanɛ bɛŋ la tɔlis ka da basɛ;
yaligimi fʋ za'as,
ka maali fʋ kpada la ka li kpi'em.
3 Fʋ na yaligi keŋ datiuŋ nɛ dagɔbʋg;
fʋ yaas na kad buudi bɛdegʋ yis
ka zin'in tempʋbanɛ ka ba yi ka bas la.

4 Da zɔt dabiem ka fʋ kʋ di nyannɛ.

Da kɛ ka dabiem mɔri fɔ ka ba kʋ diisif nyannɛ.
Fʋ na tami fʋ pu'asatimin nyan la,
ka kʋ lɛn tiɛn fʋ pʋkɔntim saŋa sʋnsa'aŋ la yɛlaa.
5 Onɛ maalif la aan fʋ sid;
o yʋ'ʋri an Zugsɔb Paŋtita'ar Sɔb la.
Israel Wina'am onɛ an Kasi la aan fʋ Faangid;
o yʋ'ʋri buon Teŋgbauŋ Wʋsa Wina'am.
6 Zugsɔb la na lɛn di'ef ya'as
wʋʋ pu'a kanɛ ka ba bas o ka o sʋʋnr san'am.

Fʋ Wina'am la yɛl ye, “Fʋ nwɛnɛ pu'asadir kanɛ kul sid

ka o sid zan'as o.
7 M daa basif ka li pʋ yuugɛ
amaa m nimbaanlzɔɔri galis la zug
ka m di'ef ya'as.
8 M sʋnpɛɛnni daa zu'oe galis la zug
ka m basif saŋa bi'ela
amaa m pʋpielim linɛ ka' naar la zug,
m na zɔɔ fʋ nimbaanlig.”
Zugsɔb onɛ an fʋ Faangid la yɛl ala.
9 † “Mam san'anɛ, nɛ'ɛŋa nwɛnɛ Noa saŋa;
ka m da pɔ nɔɔr ye, Noa saŋa ku'om la kʋ lɛn san'am teŋgbauŋ ya'asɛ.
Ala ka m pɔ nɔɔr ye m sʋnf kʋ lɛm pɛlig nɛf ya'asɛ,
m mɛ kʋ lɛn tansif ya'asɛ.
10 Hali baa zuoya ya'a mi'im
ka kʋkʋna birid,
La'an nɛ wala, man nɔŋif si'em la,
bɛɛ m sumbʋgʋsʋm nɔnaar la kʋ naae.”
Zugsɔb onɛ zɔtif nimbaanlig la yɛti li.
11 “O Jerusalem teŋa,
fʋn kanɛ ka namisʋg paaf ka onɛ bɛlisidif kae,
m na mɛɛf nɛ kugbanɛ ligidi kpi'em
ka nɔk kugvɛnla ɛɛnbi fʋ ɛɛnbir.
12 M na mɛɛ ya zaŋguoma la ka li an sʋ'ʋŋa
ka ya za'anɔya vɛnl nwɛnɛ sanlima nɛ,
ka ya zaŋguoma la na an kuga banɛ ligidi kpi'em.
13 Zugsɔb la na pa'annɛ ya biis la
ka ba na mɔr sumbʋgʋsʋm bɛdegʋ.
14 Fʋ na zin' nɛ pʋpielim:
fʋ bi'emnam na lal nɛf
ka fʋ kʋ zɔt si'el-si'el dabiem.
Dabiem na yi nyain;
li kʋ li'eli fʋ babaa.
15 Sɔ' ya'a duoe ye o zab nɛf, li kʋ an ye manɛ tis o suorɛ;
onɛ zab nɛf, fʋ na nyaŋ o.
16 Gɔsima, li anɛ manɛ maal onɛ kʋnt la
nɛ onɛ zugid ka bugumsaana la'aŋid la
ka kʋnt zaba la'abanɛ wʋsa nar nɛ zaba tʋʋma.
Manɛ lɛm maal la'asan'auŋ sɔb ka o san'amid la'ad.
17 Zaba lauk kae ka ba maal ka ba na nyaŋi nɔki zab nɛ fɔ,
nɔkanɛ pian' pian'abɛ'ɛd wʋsa, li kʋ dɔlli fɔ.
Nɛ'ɛŋa an Zugsɔb tʋmtʋmnib la faar,
ka mɛ an nɔzi'elʋg linɛ yi man san'an na.”
Zugsɔb la pian'ʋkʋ la.