AZAYA 56

Buudsieba mɛ na paam faangir
1 Zugsɔb la yɛl si'eli nwa':
“Tʋmmi linɛ an sida
ka niŋi linɛ dɔl suor,
ka m faangir la pʋ lal la;
m pʋpielim la kʋ yuugɛ ka nie.
2 Yɛlsʋm bɛ nɛ dau kanɛ gban'e li sʋ'ʋŋa
ka dɔlisid Vʋ'ʋsʋm dabisir la ka pʋ san'ami li,
ka yis o nu'ug bɛ'ɛd pʋʋgin.
3 Da kɛ ka saan onɛ kɛn Zugsɔb la san'an na yɛl ye,
‘Zugsɔb la kʋ paas mam o nidib la kallinɛ.’
Da kɛ ka onɛ ka ba zan' o la nyɔn ye,
‘Mam kʋdim nwɛnɛ tikanɛ kʋdigɛ.’”
4 Zugsɔb la yɛl si'eli nwa',
“Yanam banɛ ka ba zan' ya la ya'a dɔlisidi m Vʋ'ʋsʋm dabisir la,
ka tʋm linɛ malisim
ka gban'e m nɔnaar la yɛla sʋ'ʋŋa,
5 ba na tɛnri ya yʋda m Pʋ'ʋsim Yin la
gat yanamɛ naan mɔrin biribis nɛ bipumis;
ka ya yʋda la kʋ kpiis bɛɛ bɔdigɛ.”
6 Saam banɛ nɔki ba mɛŋi tabil nɛ Zugsɔb la
ka tʋmmi tisid o, ka nɔŋ o yʋ'ʋr ka pʋ'ʋsid o,
ka dɔlisid Vʋ'ʋsʋm Daar la ka pʋ san'ami lii,
ka mɛ gban'e o nɔnaar la yɛla sʋ'ʋŋa la,
7 † bama ka m na mɔri kɛɛn m zuokanɛ an kasi la ni na
ka tisi ba sumalisim m winsɔsʋg yin la.
Ba nyu'or maana nɛ maana banɛ ka ba maan
bimbimin la, m na di'e li.
Bɔzugɔ ba na buonnɛ m yir la ye
buudi wʋsa winsɔsʋg yir.
8 Zugsɔb onɛ an Paŋtita'ar Sɔb
ka la'asid Israel dim banɛ zɔɔ widig la yɛl ye,
“Banɛ ka m pʋn dɛŋi la'as la,
m na lɛn la'as sieba na m paasi ba.”
Wina'am zɛrig banɛ an bugusim dim la
9 Yanam mɔɔgin bʋnkɔnbid
nɛ banɛ bɛ sian'arin nɛ, kemi na vɔli ba!
10 Banɛ gur Israel dim la wʋsa zu'om nɛ,
ba wʋsa ka' ya'am;
ba wʋsa anɛ bagigis,
ba kʋ nyaŋi wɛsɛ;
ba la'as nɛ digi zaansim,
ba nɔŋnɛ gbɛɛm ma'aa.
11 Ba anɛ baas banɛ ka ba nɔya malis hali;
si'el nan zi' sia'ali baa.
Ba anɛ kɔnbkemnib banɛ pʋ gban'ad si'el gbinnɛ;
ba wʋsa fɛndigi dɔlli ba mɛŋ suor,
sɔ' wʋsa ieed o mɛŋ din.
12 Ba wʋsa yinne-yinne kaasidi buon ye, “Kɛlli ka m iee daam na!
Kemmi na ka ti nu daam tig!
Ka bɛog na nwɛnɛ zina,
bɛɛ li na gaad ala.”