AZAYA 57

1 Pʋpielim dim kpiid,
ka sɔ' pʋ gban'adi li gbin bɛɛ tɛn'ɛsidi ba yɛllɛ.
Banɛ siaki zaŋi ba mɛŋi pɛsig ye ba tʋm dinɛ nar la
ya'a kpi, sɔ' pʋ gban'adi li gbin
ye ba faaɛn ba nɛ yis tʋʋmbɛ'ɛd kanɛ na paae ba.
2 Banɛ bɛllim an sʋ'ʋŋa la
na zin'in nɛ sumbʋgʋsʋm;
ba ya'a kpi ba na nyɛ vʋ'ʋsʋm.
3 “Amaa yanam banɛ an ba'abʋgʋdib biisɛ,
kemi kpɛla na!
Ya saamnam anɛ dap banɛ san'amid pu'ab
ka ya manam mɛ an pu'agɔɔnda.
4 Anɔ'ɔn ka ya la'ada?
Anɔ'ɔn ka ya man siaa ka mi'ed nɔɔrɛ?
Ya ka'anɛ banɛ ki'isid
nɛ banɛ an faad dim la biisɛ?
5 Ya bɛ nɛ tʋtʋga nɛ tibɛda gbina ni maannɛ ya teŋgbana la
ka ya pʋtɛnda wʋsa bɛ pu'abɔɔsimin.
Ya mɔri ya biisi maan maana bɔn'ɔfalisin
nɛ tampinlɛma ni.
6 Ya nɔk kugbanɛ bɛ bɔn'ɔgin saalim la ka ba aan ya wina;
ka ya maannɛ ba, ka tisidi ba bʋnnuuda nɛ zʋʋd maana.
Fʋn nyɛ nɛ'ɛnam wʋsa la,
M na nyaŋi mɔdig ka nan kpɛm mɔr suguruu?
7 Ya maali ya digisa zuotitada zug;
ka dʋt ani maannɛ ya maana ka tʋm tʋʋmyaalis.
8 Ya nɔki ya bada la
su'a ya dalamma nya'aŋ.
Ya tam mam yɛla, ka pʋ'ʋsidi ba.
Li nwɛnɛ pu'asan'auŋ tʋʋma nɛ.
Ya dɔl bada la ka li nwɛnɛ nidi na dig nɛ pu'agɔɔndir nɛ.
9 Ya suoɛn olif kpaam ka niŋ tudaari
keŋ maan maannɛ tis Molek.
Ya tʋm nidib lalli ye ba iee bada,
hali la'an nɛ kpi'im teŋ!
10 Ya suoya la wʋsa kɛ ka ya gɛn,
amaa ya pʋ siak ye, ‘Li ka' gbinnɛ.’
Ya nyɛ paŋ paalig,
linɛ kɛ ka ya pʋ vibɛ.
11 Anɔ'ɔn ka ya zɔt ka ya ya'am ian'ad
ka ya ma'adi ma?
Ya pʋ tiɛn m yɛla
bɛɛ tɛn'ɛsi m yɛla ya sʋʋnrinɛ.
Li ka'anɛ man sin baanlimm ka li yuug la zug
ka ya pʋ lɛn zɔti maa?

12 Ya tɛn'ɛs ye yanamɛ tʋm si'em la dɔl suor,

amaa m na viigi ya nyan
ka ya bada la kʋ nyaŋi sʋŋi yaa.
13 Ya ya'a ti kaasidi bɔɔd sʋŋir,
yanam kɛl ka ya bada banɛ ka ya la'as la faaɛnnɛ ya!
Ayei, sisi'em na zii ba gaad,
pɛbisʋg bi'ela ma'aa na mɔri ba keŋ.
Amaa ninkanɛ su'a o mɛŋ man san'an
na sʋ'oe teŋ la
ka na pʋ'ʋs mam m Pʋ'ʋsim Yin la.”
Wina'am na bʋgʋl banɛ sʋnya san'am la
14 Ka ba na yɛl ye,
“Maalimi suor la uusi sʋ'ʋŋa!
Yisimi linɛ vi'idi m nidib la suor.”
15 Onɛ bɛ agɔla, ka gaad si'el wʋsa la yɛl si'eli nwa',
on kanɛ bɛ saŋa wʋsa, ka o yʋ'ʋr an kasi la:
“M bɛ nɛ zin'ikanɛ bɛɛ agɔla ka an kasi la,
amaa m mɛ bɛ nɛ onɛ sied o mɛŋ ka siakid tiakir.
M kɛ ka banɛ ka' ti'ir la paam ti'ir
ka kɛ ka banɛ sʋnya san'am la nyɛ sumalisim.
16 M kʋ zɛrigi m nidib la
bɛɛ m sʋʋnr pɛlig nɛ ba saŋa wʋsaa.
M ya'a niŋ ala, ninsaal vʋ'ʋsʋm dinɛ ka m maal la na yi ka o kpi,
ka o siig lɛbi m san'an na.
17 M sʋnfʋ daa duoe nɛ o tʋʋmbɛ'ɛd la,
m daa namis o ka keŋ ka bas o nɛ sʋnpɛɛn,
la'an nɛ wala, o nan kpɛn dɔl nɛ o ya'amlɛog bɔɔdim.
18 M nyɛɛ o suoya la, amaa m na tis o laafi;
M na gur o ka bʋgʋl o sʋʋnr,
19 † ka kɛ ka banɛ kaasid Israel teŋin la yʋ'ʋm zʋn'or yʋʋma.
Sumbʋgʋsʋm sid bɛɛ tis banɛ bɛ lalli nɛ banɛ bɛ yammin.”
Ala ka Zugsɔb la yɛl. Ka mɛ lɛn ye, “M na tisi ba laafi.”
20 Amaa bugusim dim la nwɛnɛ atɛuk ku'opila
linɛ kʋ nyaŋi an baanlimm nɛ,
ka gudigid dian'ad nɛ bian'ar. \v 21 M Wina'am la yɛl ye,
“Bugusim dim kʋ maligin nyɛ sumbʋgʋsʋm.”