AZAYA 58

Sida nɔlɔɔr
1 Zugsɔb la yɛl ye,
“Tansim agɔla, ka da sinna!
Dʋ'ʋsimi fʋ kʋkɔr wʋʋ na'atannɛ.
Yɛlimi m nidib la ban ki'isi m nɔɔr la yɛla
ka yɛl Jakob yidimi ba tʋʋmbɛ'ɛd la yɛla.
2 Daar wʋsa ba ieedim nɛ;
ka niŋid wʋʋ ba mu’oinɛ nif ye ba baŋi m pa'ala la;
ba niŋidnɛ nwɛnɛ ba anɛ buudbanɛ tʋm linɛ an sʋ'ʋŋa
ka pʋ basi ba Wina'am nɔɔr zi'elʋgɔ.
Ba yɛtim ye ba bɔɔd gban'ar linɛ an sida
ka nwɛnɛ ba bɔɔd nɛ ba sʋnf wʋsa
ye Wina'am li'eli ba nɛ.
3 Ba yɛti ye, ‘Bɔ ka ti lɔɔd nɔɔr
ka fʋ pʋ nyɛta?
Bɔ ka ti sie ti mɛŋ
ka fʋ ba'a mɛ kae?’
Nɛ wala, daakanɛ ka ya lɔ nɔɔr la,
ya maannɛ linɛ malisi ya,
ka mugusidi ya tʋmtʋmnib.
4 Ya ya'a lɔ nɔɔr, li ba'asʋg anɛ nɔŋgbannwa'ar nɛ zaba,
ka nwɛ'ɛd taaba tampian'as nɛ ɛndʋg.
Ya kʋ nyaŋi lɔ nɔɔr wʋʋ yanamɛ niŋ si'em zina la,
ka bɔɔd ye m wʋmi ya winsɔsʋgɔ.
5 Nɔlɔkaŋa taaba ka mam bɔɔdaa?
Li anɛ nidi na sie o mɛŋ daar yinne ma'aa la zugɔɔ?
Li anɛ nidi na sʋ'ʋnnɛ o zug wʋʋ mɔɔg nɛ
ka dig bɔto fuudin nɛ tampɛligiminɛɛ?
Lin la ka ya buon nɔlɔrɛɛ?
Ya tɛn'ɛs ye m sʋnf na malis nɛ nɔlɔkaŋa buudii?
6 Ayei, li ka' nɔlɔkaŋa buudi ka mam bɔɔda.
Amaa lɛɛ yisimi bana nwiis linɛ an ziri la
ka tʋk zitɛbisa nidib zugin,
ka kɔ'ɔg yu'asindaug linɛ an zitɛbisa la,
ka tis banɛ ka ba mugusidi ba la yɔlisim.
7 † Li pʋ nar ye ya pʋdigi ya diib nɛ banɛ kɔ'ɔm zabid la
ka tis nɔŋ dim banɛ ka' gbɛɛnsa la gbɛɛnb zin'igaa?
Ya ya'a nyɛ sɔ' ka o ken biel yanam yɛɛlim o fuug,
ka da zan'asi ya nidib sʋŋirɛ.
8 Ala ka ya nɛɛsim na nie nwɛnɛ bɛogʋ nie nɛ,
ka ya laafi nyɛɛb na kɛn tɔ'ɔtɔ na;
ka ya pʋpielim la na kɛ ka ya keŋ tuon,
ka Zugsɔb na'am paŋ la na guri ya.
9 Ya na buoli ya Zugsɔb la ka o siak;
ya na kaasi bɔɔd sʋŋir, ka o na yɛl ye, ‘Manɛ nwa'!’
Ya ya'a yis mugusʋg linɛ nwɛnɛ yu'asindaug la,
ka bas nu'ubibis tiesʋg nɛ pian'abɛ'ɛd,
10 ka tis banɛ ka kɔ'ɔm mɔri ba la diib
ka tis banɛ bɛ mugusʋg pʋʋgin yɔlisim,
ala ka ya nɛɛsim na nie likin,
ka ya yʋ'ʋŋ na nwɛnɛ nintaŋ nɛ.
11 Zugsɔb la na guri ya saŋa wʋsa;
o na tisi ya yanamɛ bɔɔd si'el teŋ kanɛ ka nintaŋ tʋʋlʋg bɛ hali la
ka tɛndigi ya paŋ.
Ya na nwɛnɛ lɔmbɔn'ɔg kanɛ ka ba dɔn'ɔsid saŋa wʋsa,
ka nwɛnɛ bulkanɛ ku'om bun ka pʋ naada.
12 Ya nidib la na lɛbisi mɛ' dabɔɔd banɛ da bɛ kʋdimin sa la
ka na dʋ'ʋs ɛɛnb kʋda la;
ba na buonnɛ ya ye, ‘Banɛ Mɛɛd Zaŋguom nwa'alima’,
nɛ ‘Banɛ Lɛbisid Suoraad’,
nɛ ‘Banɛ Maan Zin'ikanɛ ka Nidib Bɛ la’.
13 Dɔlisimi Vʋ'ʋsʋm Daar la sʋ'ʋŋa
ka da tʋm ya ya'amin dabiskanɛ an kasi la daarɛ.
Mɔri sumalisim Vʋ'ʋsʋm Daar la yɛla
ka na'asi Zugsɔb dabiskanɛ an kasi la.
Na'asimini li ka da tʋmmi ya mɛŋ bɔɔdim
bɛɛ pian'ad yɔɔg-yɔɔg dabiskan la.
14 Ya ya'a niŋ ala, ya na nyɛ sumalisim Zugsɔb la san'an
ka m na kɛ ka ya mɔr na'asi teŋgbauŋ la ni.
M na kɛ ka ya dii ya yaab Jakob faar la.”
Man Zugsɔb mɛŋi yɛli li.