AZAYA 60

Zion girima la
1 † Zugsɔb la yɛl ye,
“Jerusalem, duom ka nie nyain ka fʋ nɛɛsim kena,
ka Zugsɔb girima la nie fʋ ni.
2 Gɔsima, dunia la anɛ lik
ka saalib wʋsa mɛ bɛ likin biridi,
amaa Zugsɔb la nɛɛsim na nie fʋ ni
ka o girima mɛ nie fʋ nidib wʋsa san'an.
3 † Tɛɛns na kɛɛn fʋ nɛɛsimin la na
ka na'anam mɛ kena ye ba nyɛ girimkanɛ tansidi fʋ ni
ka li nie wʋʋ bɛogʋn sɔɔnrim la.
4 Ʋkimi fʋ nindaa gɔsi gilig ka fʋ na nyɛ bʋn dinɛ niŋid:
Fʋ nidib la la'asid nɛ taaba kunna;
fʋ biribis la naam lalli kunna,
ba na zii fʋ bipumis la na.
5 Fʋ na gɔsi nyɛ ka fʋ sumpielim galis,
fʋ sʋnf na ma'ae
hali ka fʋ zig ye fʋ gban'e fʋ mɛŋi gʋ'ʋŋ.
Ba na zi tembanɛ bɛɛ atɛuk lɔ'ɔm la la'adi mɔr na tisif,
ka mɔr tɛɛns la kpan'am wʋsa kɛɛn fʋ san'an na.
6 Yʋgʋma bɛdegʋ na yi Midian nɛ Efa tɛɛnsini
kena pɛ'ɛli ya teŋ la.
Banɛ bɛ Seeba teŋin wʋsa na kena
ka ziid sanlima nɛ bʋnnyubisa na.
Ba na dʋ'ʋsid Zugsɔb la yʋ'ʋr ka pʋ'ʋsid o bareka.
7 Ba na mɔr Kedar nɛ Nebaiof pɛ'ɛs la wʋsa
kɛɛn fʋ san'an na maal malʋŋʋ tisif;
ba na di'e ba niŋi m malʋŋ daka la zug,
ka m na kɛ ka m Pʋ'ʋsim Yir la pɛ'ɛl nɛ girima.
8 Ka anɔ'ɔnamɛ nwa' ukid ililili wʋʋ saŋgbana,
ka nwɛnɛ dawana ian'adi kpɛn'ɛdi ba tɛɛdinɛ?
9 Ya'a an sida, tembanɛ ka ku'om lɔbi gilig la tɛn'ɛsidnɛ mam yɛla;
Tarsi teŋ anrima la gaad tuonnɛ mɔri fʋ biribis la yi lalli kunna,
ba mɔri anzurifa nɛ sanlima
ye ba kena na'as Zugsɔb onɛ aan fʋ Wina'am la,
On kanɛ an Kasi Tis Israel la,
bɔzugɔ, o kɛ ka dunia wʋsa na'asidif.
10 Saam na maali fʋ zaŋguoma la mɛ',
ka ba na'anam tʋmmi tisidif.
La'an nɛ m sʋʋnri daa duoe ka m nwɛ' fɔ bas la,
m na zɔɔ fʋ nimbaanlig ka li anɛ m mɛŋ ya'amlɛog zug.
11 Yʋ'ʋŋ nɛ nintaŋ wʋsa fʋ za'anɔya na yɔ'ɔg,
ba kʋdim kʋ yɔɔ baa.
Ala ka na'anam na gaadi ba nidib tuonnɛ
mɔri ba kpan'am na tisif.
12 Teŋ bɛɛ sʋ'ʋlim kanɛ pʋ siak ye li tʋmm tisi fɔ
li teŋ na san'am yɔri-yɔri.
13 Ba na mɔr tisʋma nɛ tivɛnla wʋsa daad na,
Dasʋma nwa' yinɛ Lebanon sian'arin na.
Ba na mɔri ba na maali mɛ' m Pʋ'ʋsim Yir la;
ala ka m nɔba zi'esim na an girima zin'ig.
14 Banɛ mugusidif la biis na kena igini fʋ tuon;
banɛ gɔs ka fʋ an zaalim la na igini fʋ nɔba ni
ka buolif ye, ‘Zugsɔb la Teŋ’,
Zion linɛ ka Israel dim Wina'am Onɛ An Kasi sʋ'oe li la.
15 La'an nɛ ban pʋn kisigif hali ka yaaf
ka nid baa yinne pʋ dɔlli gati fʋ baba la,
m na maalif ka fʋ lieb teŋ kanɛ ka sɔ' wʋsa nif na tig
ka zʋmaana wʋsa na mɔr sumalisim fʋ zug.
16 Tɛɛns nɛ ba na'anam na gɔsidi ya sʋ'ʋŋa
wʋʋ bimaa mu'asid o biig si'em la.
Ala ka ya na baŋ ye man Zugsɔb la aan ya Faangid
nɛ ya Sʋŋid Onɛ an Paŋtita'ar Sɔb la.
17 Man naan tisini ya kʋntzɛn'ug la, m lɛɛ na tisi ya sanlima,
man naan tisini ya kʋnt la, m lɛɛ na tisi ya anzurifa.
Man naan tisini ya daad la, m lɛɛ na tisi ya kʋntzɛn'ug.
Man naan tisini ya kuga la, m lɛɛ na tisi ya kʋnt.
Banɛ sʋ'oe ya kʋ lɛn namisidi yaa,
M na kɛ ka ba gɔsidi ya nɛ sida nɛ sumbʋgʋsʋm.
18 Ya kʋ lɛn wʋm zaba nyuugʋ ya teŋgbauŋʋn la,
bɛɛ san'auŋ bɛɛ sapu'adi ya teŋ la babaa.
M na guri ya wʋʋ zaŋguom kpi'euŋ nɛ
Ka ya pian' m yʋ'ʋr man faaɛn ya la zug.
19 † Winnig kʋ lɛn an nɛɛsim tisi ya nintaŋa,
bɛɛ nwadig an nɛɛsim tisi ya yʋ'ʋŋɔ,
bɔzugɔ, Zugsɔb la na an nɛɛsim linɛ pʋ kpiigidi tisi ya,
ya Wina'am la girima na bɛ nɛ ya.
20 Ya sʋnsa'aŋ dabisa la na gaad.
Man onɛ aan ya Zugsɔb la na aan ya nɛɛsim linɛ pʋ kpiisida
Ka na bɛɛ yuugi gaad winnig nɛ nwadig.
21 Ala ka fʋ nidib la na lieb pʋpielim dim
ka na sʋ'ʋg teŋ la saŋa kanɛ ka' naarɛ.
Ba anɛ tiig ka m sɛ,
ka an banɛ ka m maal ye ba pa'alim paŋ la zem si'em.
22 Yir kanɛ pɔɔd hali la na nɔbigi paae tusir,
ka banɛ ka ba ziem la nɔbigi kilim teŋ.
Man Zugsɔb la yɛl,
ka li saŋa ya'a ti paae li na niŋ tɔ'ɔtɔ.”