AZAYA 62

Zion yʋ'ʋpaal la yɛla
1 Zion zugɔɔ m kʋ sinni m nɔɔrɛ;
Jerusalem yɛla m kʋ an baanlim nɛ,
hali nɛ o pʋpielim na ti nie nwɛnɛ bɛogʋ nied si'em la
ka o nyɔvʋr kanɛ ka' naar la nie wʋʋ bugum nɛ.
2 Tɛɛns la wʋsa na nyɛɛ fʋ pʋpielim,
ka na'anam wʋsa nyɛɛ fʋ girima;
ba na buonif nɛ yʋ'ʋpaal
linɛ ka Zugsɔb la mɛŋ na pʋdif la.
3 Fʋ na an wʋʋ sanlima zupibig Zugsɔb la nu'usin
nɛ na'am laukʋ fʋ Wina'am la nu'usin.
4 Ba kʋ lɛn gɔtif wʋʋ onɛ ka ba kadi basɛ,
bɛɛ buonnɛ fʋ teŋ la ye zin'ikanɛ ka ba tami ba yɛlaa.
Amaa ba na buonnɛ fʋ yʋ'ʋr ye Hefiziba
ka fʋ teŋ la yʋ'ʋr buon ye Beula;
Bɔzugɔ fʋ na ma'ae Zugsɔb la sʋʋnr,
ka teŋ la na an nwɛnɛ pu'a tis Zugsɔb la.
5 Wʋʋ dasaŋi dit pu'asadir si'em la,
ala mɛn ka onɛ maalif la na diif;
pu'apaal sid sʋnfʋ ma'ae nɛ o pu'a yɛla si'em la,
ala mɛn ka ya Wina'am la sʋnf na malis nɛ ya.
6 Jerusalem dima, m zi'el banɛ gur teŋ la ya zaŋguoma la nya'aŋ;
yʋ'ʋŋ nɛ nintaŋ wʋsa ba yɛtnɛ linɛ maan ka kʋ sinni ba nɔɔrɛ.
Yanam banɛ buon Zugsɔb la bɔɔd sʋŋir la,
mid ka ya gɛn ka bas,
7 ka mɛ da basin o sɔsʋg baa bi'elaa,
nɛ on na ti kɛ ka Jerusalem zi'en,
ka an teŋ kanɛ ka dunia wʋsa na na'asid.
8 Zugsɔb la kaanbi zi'el
Ka na nɔk o paŋ la kɛ ka li sid tʋm ye,
“M kʋ lɛn kɛ ka ya dataas la faaɛn ya ki,
ka teŋ sieba dim mɛ kʋ lɛn nuu ya danpaalig
linɛ ka ya namisi paam la;
9 Amaa yanam banɛ bun la na dii li
ka zun'e Zugsɔb la yʋ'ʋr,
ka banɛ ku'on daam tiwala la na nuu li daam la
man Pʋ'ʋsim Yir la za'as pʋʋgin”
10 Dɔlli gaad, dɔl yaŋirin la gaad!
Maalimi suori tis nidib la.
Wɛdigim, wɛdigim suoraug la!
Yisimi kuga suor la zug.
Maalimi tuuta zi'el ka dunia wʋsa nyɛ.
11 † Zugsɔb la mɔɔli tis dunia bɛn wʋsa:
“Yɛlim Zion dim ye,
‘Gɔsimi, ya faangid la kenna!
Gɔsimi, o yɔɔd la bɛɛ o san'an,
ka o na yɔ sɔ' wʋsa samme lɛbis.’”
12 Ba na buonnɛ ba ye nimbanɛ an kasi,
banɛ ka Zugsɔb la faaɛn;
ka na buonif ye teŋ kanɛ ka Zugsɔb la nɔŋ,
nɛ tempʋkanɛ ka Zugsɔb la pʋ tammi li yɛlaa.