Anyɛ kʋdim an kpɛɛm
Amusbibis nɛ kubibisi da bɛ, bɛog ya'a nie wʋsa ba bɛnɛ sian'arinɛ di'emid nɛ taaba. Daar yinne zaam ka Amusbibis paae yɛli ba ma ye tinam nɛ kubibis di'em zina hali ka li malis. Bɛogɔɔ tinam lɛbidi anina. Di'ema la malis woo. Ala ka ba ma nɛ ba saam wʋsa tans ye fa'. Wina'am bɛ ka ya saa lɛb ka kena. Ba ya'a saa kenaa, yanam on pan'asi ba kul na ka ba anɛ zɛɛndi tisi ti. Yanam zi' ye tinam pʋ nyɛti ba kpɛɛmnam nifɔɔ?
FOTONAM
Maalimi paŋ ka saa dɛŋi keŋi ka mɔri yalimnam na ka ti paam ni'im, Wina'am bɛ. Haya, Akubibis mɛ paae yɛli ba ma ye tinam nɛ Amusbibisi di'em zina. Waii bɛogɔɔ ti saa na dɛŋ ken. Di'ema la malis nɛ galis. Ba ma bu'os ye yanam nɛ anɔ'ɔn namaa? Ka biis laye tinam nɛ Amusbibis. Bɛogɔɔ ya mit ka ya saa lɛb ani ka tinam nɛ ba kpɛɛmnam pʋ nyɛt taaba nifɔ.
FOTONAM
Taare, bɛog nienya ka Amusbibis pʋn isigi bɛ anina ka gur kubibis la. Ba ti nyɛnɛ ka kubibis bɛ kpɛ' sa ka pʋ siak ye ba paae ba, ka amusbibis la yʋ'ʋn buon ye m zuanam kemi tɔ' na ka ti di'emi, zɔminɛ. Yanam ya'a na nyaŋi paae ti? Tinami nwa. Ka kubibis mɛ bɛ kpɛ' sa ka yɛt ye tinami nwa, ti kʋ paae ya. Ya ma n sa yɛli ya si'el la tinam ma mɛ sa yɛli ti nɛ ala, ti kʋ kenaa. Ka amusbibis niŋ zua kpa'adi ba san'an, ka akubibis mɛ niŋ zua zɔti kunnɛ ba yin. Anwana ka
Amusbibis ti kadi ba kɔ'ɔŋ ka kuli yɛli ba ma nɛ ba saam. Ka ba saam ye akuus mɛ wa'ae ya ka ti kʋ paami ba? Kɛli ka ti pigimi baanlim ka ti na gban'e ba nɛ ba kpɛɛmnam la wʋsa. Zi' ka Amusnami tɛn'ɛs si'el la Akuus mɛ baŋi li. Ba ya'a wʋm ka si'el dam karʋ, ka ba pʋn bɛnɛ zɔɔgin. Daar yinne ka saa kʋʋ an ilililil, ka Amusnam duoe niŋ labisʋg ka tɛn'ɛsid ye saa la na kɛ ka ba paam yalimnam. Ban ti tu'ae Akuusnam la abaa, m zuanam gaad ya ka kɛ ba zi'el ka Amus daug la yʋ'ʋn gʋ'ʋŋ ka ye, miau miau ka bʋn nya'aŋ la mɛ ye miau miau ka ba yʋ'ʋ bɛ ani nɛ ba biisi ied ka bu'osid taaba ye, ba liya? Ba liya? Ba liya? Dinɛ an miau miau la.
FOTONAM
Daar yinne ka Akuus na'ab la'asi ba ye ba nwɛ' sɔɔra gɔs ye ba na niŋ wala nɛ Amusnam la bɛ. Ba mɔri sɔnsʋg la hali ti zi' ban ye ba niŋ si'em, ka yinne ye, si'el kɛɛn m pʋtɛn'ɛrin na ka m ye ti gɔs ye li an sʋm bɛɛ? Ti ya'a lɔb ligidii da' lummiri kɔlli ba ka ba ya'a ti kennaa li na dammid ka ti wʋm ka dɛŋi zɔ? Ka na'ab la ye, fa' fʋ naae yɛla, zaŋi la. Maalimi paŋ ka bɛog ma'aa ka ya la'as ligidi la naae ka ti da' lummir la, ka ya'a ka' wala, ti kʋ nyɛ vʋ'ʋsimm. ka kubil yinne ye, gaafara ka m bu'os si'el. Ka ba tans o ye, kpɛɛmnam ɛɛnti pian'ad si'el ka biig mɛ lɛbisʋg an bɔ? Kemsa ka m na duoe fiebi ya ka ya lalig. Mɛ yanami zi yɛlkaŋa na? Ka kpɛɛm yinne ye kɛli, ka biis la mi' gati ti. M dakɔɔnrɛ, fʋ mɔr bɔ? Ka kubil la ye naa, mam mɔr si'eli nwa. Tina la'as ligidi la, ti na da' lummir la, ka anɔ'ɔnɛ na mɔr lumma la keŋ kɔlli ba? Ya'a an man ya'aminɛɛ, man na yɛl ye ya kɛ ka ti nya nvɔt ka ti ya'a ɛɛnti wʋm dammirɛɛ ti na zɔɔ kpɛ'. Ka na'ab tans ye, Falaambuda! Ya nyɛ yaa? Kɛli ka ti nyaae nvɔt. Haya, ka ba bas ligidi la la'asʋg ka yʋ'ʋn duoe nɛ nvɔt nyaab. Din ka kuus bɛ nvɔttin hali nɛ zina la.
BU'OSA:
[dɛmisim gbɛlima | dɛmisimi din yi zin'isiana]- Anɔ'ɔn nam yɛla ka ya karim la?
- Anɔ'ɔn ka Amusbibis ye ban di'em zina?
- Ka ba di'ema la an wala?
- Akuus yɛl ye ba da' bɔ tis Amusɛ?
- Anɔ'ɔn nam ka Amus pʋ nyɛti ba nifɔ?
- Kuus nɛ musnam la'am bɛnɛ nvɔttin. Sida bɛɛ ziri?
- Yimbɛogʋn la Sida bɛɛ ziri?
- Kuus ye Amus pʋ kɔrid lummirɛ. Sida bɛɛ ziri?
- Kuus zua anɛ Amus. Ɛɛn bɛɛ ayei?
- Ti pʋ karim si'el yɛlaa. Ɛɛn bɛɛ ayei.