Asumbul nɛ namis

Naꞌabi da pʋꞌʋs o kuob ka nidib wʋsa keŋ ye ba kua sʋŋ o ka Asumbul nɛ namis nɛ sianꞌarin bʋnkɔnbid bɛdegʋ mɛ bɛ. Ba da kua kuob la ka nintaŋ ti muꞌoe biꞌela ka naꞌab kɛ ka ba mɔr zɔꞌɔm na tisi ba. Ban keŋ ye ba di zɔꞌɔm la ka Asumbul nyɛ ka li pʋ zuꞌoe ka o gbanꞌe ye asɛɛ on maal siꞌel ka paam zɔꞌɔm la dii gaad o taaba la. O da ianki keŋ digin passi ka midig o nini ka kpaadib la zɔ ka o duoe di zɔꞌɔm la o kɔnꞌɔkɔnꞌ. Kpaadib la zɔɔ paae naꞌayin ka naꞌab buꞌosi ba dinɛ maal ka ba taꞌan duoe kuobin la ka ba lɛbis ye amidig-nifʋ kadi ba ka naꞌab ye ba lɛm kua ka on ziꞌ amidig-nifɔ. Ba da lɛbi paae nyɛ ka Asumbul bɛ anii kuod ka ba mɛ kpɛn pinꞌil kuob yaꞌas. Naꞌab da kɛya ka ba mɔr walisa keŋ ka Asumbul lɛn niŋ ala ka ba zɔ ka o lɛn di o kɔnꞌɔkɔnꞌ. Ba da lɛn lɛbi kua ka zaam maꞌae ka ba yʋꞌʋn duoe kuobin la ka ba tisi ba saꞌab nɛ niꞌim bɛdegʋ ka ba wʋsa di saꞌab la naae; ban yʋꞌʋn ye ba pʋdig niꞌim la ka Asumbul lɛn midig nini ka ba duoe ka bas ka o ɔnbi li yaꞌas. Tɔ, naꞌab yʋꞌʋn da yɛli ba ye asɛɛ ka ba gbɛn ka bɛog ka ba saa lɛb. Ban keŋ digini ti gbisid la ka Asumbul keŋ digini kpiꞌen nɛ naꞌab puꞌabil la ka ti duoe yʋꞌʋŋ tisʋʋs ye o bɔ naꞌab puꞌabil la ka o pʋ siakɛ ka o midig nini ka puꞌa la zɔ dabiem ka o bɔ o. Naŋ da pʋ gbisɛ ka baŋ dinɛ maal la wʋsa ka Asumbul yʋꞌʋn ti gbis ka naŋ keŋ kpɛnꞌ Asumbul tʋbirin ka dam ka Asumbul nie gbɛɛmin ka ye o yim ka o ye Asumbul yaꞌa diꞌemmaa o na tɔn o. Bɛog da nieya ka ba keŋ ye ba pʋꞌʋs naꞌab ka nyaan lɛb kuobil la ka naŋ yɛl Asumbul ye o yɛlim naꞌab ye on sa pʋ bas o puꞌabil la ka on sa sanꞌam o; ka Asumbul ye oh, fʋ bɔɔdi naꞌab kʋʋ maa? Naŋ da naan tʋbirin la yɛl Asumbul ye alaa m tɔɔnfɔ? Asumbul da gʋꞌʋŋ ya ka yɛl naꞌab ye naa, tinamɛ sa kpɛnꞌ gbɛɛm la man sa pʋ basi fʋ puꞌabil la, man sa sanꞌam o. Naꞌab la sʋnf da duoya hali ka o tans ye naꞌakim diya? Ye ba da kɛ ka Asumbul pɔnsɛ. Ka ba niŋ Asumbul kadib diin ka o zɔ hali ti gɛn ka nyɛ mɔgbɛuŋ ka ianki kpɛnꞌ ani lɛbigi digin ka midig o nini la ka biis la zɔɔ paae na ka buꞌos ye, “ya pʋ nyɛ amidig-nif kpɛlaa”? Ka naŋ yɛl o ye o yɛlim ye manɛ nwana; ka o ye oi, fʋ bɔɔdi ba kʋʋ maa? Ka naŋ ye alaa m tɔɔnfɔ? Ka Asumbul gʋꞌʋŋ ka ye manɛ nwana yei ka va zuaa ka mɔr o kadib ka o ti lɛn zɔɔ keŋ suꞌa ka ba lɛn paae na ka buꞌos ka naŋ la lɛn yɛl o ye o yɛlim ye onɛ nwana ka o ye ow, fʋ bɔɔd ye ba kʋʋ maa? Ka naŋ ye alaa m tɔɔnfɔ? Ka o gʋꞌʋŋ ka yɛl ka lɛn va zuaa. Asumbul da zɔnɛ alaa yʋꞌʋn ti lɛꞌɛgi kpɛn luu kpi ka naŋ la sɔligi yi ka bas o ka biis la paae na nyɛ ka o digi ka ba nɔk o. Din ka nidib pʋ nyɛt Asumbul nifɔ ka naŋ mɛ labisidi suꞌad saꞌadin la.