Azaya 21

Zugsɔb la pian' Babilon yɛla
1 Labakaŋa anɛ pipiris teŋ linɛ bɛ atɛuk nɔɔrin ka li yʋ'ʋr buon Babilon la yɛla.
Nwɛnɛ sisi'epiliŋi na yi ya-dagɔbʋg baba piisid teŋ si'em ken la,
ala ka nidib na yi pipiris teŋ kanɛ ka nidib zɔti li la kena.
2 M nyɛ nier si'a ka li mɔr dabiem.
Teŋgbi'idim sɔb la gbi'i ya,
ka faaung sɔb la faaɛn ya.
Elam dima, duom zabi!
Media dima, duomi keŋ giligi tempʋʋg la!
M na kɛ ka on namisid nidib
ka ba kaasidi fabin si'em la wʋsa naae.
3 Nɛ'ɛŋa ni ka m nyɛ, ka dabiem kpɛn'ɛm pʋʋgin
ka m niŋgbina pin'ili zabid,
ka li zabir la nwɛnɛ pu'a na sa'ae nɛ.
Ka m kennɛ gɛrid man wʋm si'el la yɛla,
ka m ya'am fɛndig man nyɛ si'el la zug.
4 M ya'am iank nɛ ka dabiem kɛ ka m kirid,
ya'amlɛog kanɛ ka m pa'a mɔr ye zaam ma'ae la
liebnɛ dabiem tisim.
5 Ba maal diibi zi'el,
ba yadig sɔna,
ka ba di, ka nu!
Zaba tuongatiba, duomi,
ka ti'ebi nɛ ya zaba la'ad la!
6 Zugsɔb la yɛlim si'eli nwa';
“Kem bɔ sɔ' ka o gur teŋ la,
ka kɛ ka o yɛl on nyɛ si'el wʋsa.
7 O ya'a nyɛ zaba tɛrekonam
ka ba kenna nɛ widi,
bɛɛ ba ban'ad bʋmis
bɛɛ yʋgʋma ka ba ban'adi kenna,
asɛɛ ka o ti'eb amɛŋa mɛŋa.
Ɛɛn, o ti'ebim sʋ'ʋŋa.”
8 Ka onɛ gur la yʋ'ʋn tans ye,
“M zugdaana, m bɛnɛ dɔwɔk la zugʋ gur yʋ'ʋŋ nɛ nintaŋ wʋsa,
m bɛnɛ zin'ikanɛ ka m na zi'e,
ka nyɛt zin'ig wʋsa la.
9 † Gɔsima, dau sɔ' nwana kenna nɛ zaba tɛreko,
ka dɔl nidib ka ba ban'ad widi!”
Onɛ gur la lɛbisi yɛl ye,
“Babilon teŋ la luya, li lu ya!
Ka ba lugi ba bada banɛ ka ba ya'ab la
ka li widigi yaam-yaam dig teŋin”
10 M nidiba, ba bʋ' ya zieŋin wʋʋ ki nɛ, ka yɛligi ya;
man wʋm si'el Zugsɔb onɛ an Paŋtita'ar Sɔb
ka an Israel Wina'am la san'an
la ka m mɔɔli tisi ya.
Zugsɔb la pian' Edom yɛla
11 Labakaŋa anɛ Duma yɛla.
Sɔ' buon Seir teŋin yɛt ye,
“Fʋn teŋ gura, yʋ'ʋŋ la na gaad saŋkanɛ?
Teŋ guraa, yʋ'ʋŋ la na gaad saŋkanɛ?”
12 Onɛ gur la na lɛbis ye,
“Bɛog na nie, amaa yʋ'ʋŋ na lɛn sɔb.
Fʋ ya'a bɔɔd ye fʋ bu'os ya'as,
fʋn lɛm na bu'os.”
Zugsɔb la pian' Arabia yɛla
13 Labakaŋa anɛ Arabia yɛla.
Yanam suokennib banɛ yi Dedan teŋin la,
yanam banɛ la'asi bɛ Arabia mɔɔgin la,
14 mɔri ku'om yina tis banɛ ka ku'onuud mɔri ba la.
Yanam banɛ bɛ Tema sʋ'ʋlimin la,
mɔri diib na tis banɛ an zɔɔma la.
15 Ba zɔnɛ zaba sʋ'ʋs la yɛla,
ba zɔnɛ sʋ'ʋg kanɛ ka ba fuoe la yɛla,
nɛ tiraug kanɛ ka ba gɔnd la yɛla,

nɛ zaba la muk si'em la. 16 Zugsɔb la yɛlim si'eli nwa': “Yʋʋm yinne pɔɔgin, nwɛnɛ onɛ kpɛn' tʋʋma na kaan dabisa si'em la, Kedar dim yʋ'ʋri dʋt si'em la mɛ na naae. 17 Banɛ tɔnd tiraad ka an zabzabidibi bɛ Kedar teŋin la kpii naae, ba bi'ela ma'aa kpɛlim.”