Azaya 8

Asiria anɛ Zugsɔb tʋʋma lauk 1 Zugsɔb la yɛlim ye, “Nɔkim si'eli sɔb lina niŋ ani ye, Mahesialalhasbaz.a 2 Ka m da buol Uria onɛ da an maanmaan la, nɛ Jeberekaya biig Zakaria banɛ an sida dim la ye ba dii m kasɛt.” 3 Ka m da digin nɛ m pu'a onɛ an nɔdi'es la ka o tʋk pʋʋg ka du'a biribiŋ, ka Zugsɔb la yɛlim ye, “Pʋdim biig la yʋ'ʋr ye Mahesialalhasbaz. 4 Saŋkanɛ ka biig la nam pʋ siak on na nyaŋi buol ye, ‘M ba',’ bɛɛ ‘M ma,’ la, ka Asiria na'ab pʋn kena faaɛn Damaskus teŋ nɛ Samaria la'ad la wʋsa zii lɛb o teŋin.” 5 Ka Zugsɔb la lɛn yɛlim ye;

6 “Nimbama zan'as Siiloa ku'okanɛ pʋbid bi'el-bi'el la
ka lɛɛ maan sumalisim nɛ Rezin nɛ Remalaya biig la zug,
7 Zugsɔb la na kɛ ka Asiria na'ab kɛɛn ba san'an na
ka on nɛ o zabzabidib la zab nɛ ba.
Ba na kena nwɛnɛ Efiritis kɔldaug
linɛ pɛ'ɛli pʋbid nɛ paŋ ka badigi li' ku'osuoya wʋsa si'em la.
8 Li na yadig hali pil Juda teŋ la
ka di saalib nɛ linɛ bɛɛ anina wʋsa keŋ.
Li na yadigi nwɛnɛ kpʋkpama nɛ tiig Immanuel teŋ la wʋsa.”
9 Tɛɛns wʋsa nidiba, wɔɔlimi zaba wɔɔlʋg,
amaa ba na nwɛ' nyaŋi ya.
Kɛlisimi, yanam banɛ bɛ lalli la!
Ti'ebimi zaba
amaa ba na nwɛ' nyaŋi ya.
Ɛɛn, ti'ebimi zaba
ka ba na nyaŋi ya!
10 Gban'ami gban'e paala,
amaa li na ba'as yɔri,
Niŋimi yanamɛ gban'e si'em la,
amaa li na anɛ zaalim.
Bɔzugɔ, Wina'am bɛ nɛ ti.
Zɔmi Wina'am
11 Zugsɔb la pian' tisim, ka o paŋ tita'ar la bɛɛ m san'an, o sa'alim nɛ nimmua ye m da niŋid nwɛnɛ nimbama niŋid si'em la. O yɛl ye,
12 “Linɛ ka nimbama buon gban'abɛ'ɛd la,
fʋn da buonnɛ li ye gban'abɛ'ɛdɛ,
mɛ da zɔt ban zɔt si'el la
ka kɛ ka li kpɛn'ɛsif dabiem.
13 Zugsɔb Paŋtita'ar Sɔb la ma'aa ka fʋ na gɔs o ka o an kasi.
On ka fʋ na zɔt,
on ma'aa ka fʋ na zɔt dabiem.
14 † O na an wʋʋ pʋ'ʋsim dɔkanɛ an kasi,
amaa Israel nɛ Juda sʋ'ʋlim dim wʋsa san'an,
o na anɛ kugkanɛ na kɛ ka nidib tu'usid,
ka an tampinkanɛ na kɛ ka ba lu.
O na anɛ baŋi bɛnd Jerusalem dim la
ka na gban'e ba.
15 † Ba bɛdegʋ sid na tu'usi li.
Ba na lii widigi yaam.
Ba sid na bɛndi gban'e ba.”
16 Lɔɔmi kasɛta gbauŋ la, ka maali m wada la pɔnbil
ka kɛ ka m pa'ala la bɛɛ m nya'andɔlib la san'an.
17 † Mam na mɔdigi gu'us Wina'am,
la'an nɛ on su'ad o mɛŋ Jakob yidimin la.
On ka mam na ti'e.
18 Manɛ nwa' bɛ nɛ biis banɛ ka Zugsɔb tisim la. Ti anɛ zanbina tis Israel dim la yi Zugsɔb onɛ an Paŋtita'ar Sɔb la san'an na, Zugsɔb onɛ bɛ Zion zuor zug la.
19 Ba ya'a ti yɛli ya ye ya kem bu'osi kikiris sɔb, bɛɛ ba'abʋgʋdib bɛɛ banɛ gɔsidi nyɛt kpi'imnam ka yɛt, yanam da siakɛ. Ya na niŋ wala bu'osid banɛ kpi la banɛ vʋe yɛla? Li nar ye nidib keŋ bu'osi ba Wina'am. 20 Nɔkimi wada la nɛ kasɛta yɛla pʋʋginɛ zamis nimbama yɛt si'em la, ka ba ya'a pʋ pian' wʋʋ lin nar si'em, li pa'an ye bɛog nam pʋ nie ba san'anɛ. 21 Ba na gɔɔnd teŋin la nɛ kɔ'ɔm nɛ sʋnsa'aŋ, kɔ'ɔm ya'a ti wʋmi ba, ba sʋʋnr na duoe hali ka ba gɔ'ɔni gɔs agɔla, ka pɔɔd nɔɔri tisidi ba na'ab nɛ ba Wina'am. 22 Ba mɛ na su'uni gɔs teŋin ka nyɛ sʋnsa'aŋ nɛ lik nɛ dabiem ma'aa, ka ba na nɔki ba lɔbi bas lik tita'arin.