Azaya Zut 64

1 Zugsɔba, aansim saŋgbana la ka sig na ka zuoya mi'imi fʋ tuon! 2 Nwɛnɛ bugum ɛɛn la'aŋ daad si'em ka kɛ ka ku'om lɛ'ɛg la, ala mɛn, sigim na ka kɛ ka fʋ dataas baŋi fʋ paŋi zem si'em ka buudi wʋsa kiridi fʋ tuon nɛ dabiem! 3 Fʋ daa tʋm tʋʋm nyalim sieba ka li lidigi ti. Fʋ daa sig na ka zuoya mi'imi fʋ tuon. 4 Kʋdimin sa, sɔ' pʋ wʋm Wina'am si'a yɛla ka li ya'a ka' fʋʋ. Tʋbsi'a nam pʋ wʋm, ka nif si'a mɛ nan zi' nyɛ sɔ' ka li ya'a ka' fʋn ma'aanɛ. Fʋnɛ sʋŋid banɛ ti'ef la. 5 Fʋ kena sʋŋid banɛ ka tʋʋm sʋma yɛla malisi ba ka ba tɛnri fʋ suoya la. Amaa tinamɛ daa nan kpɛn tʋm tʋʋmbɛ'ɛdi pɔ'ɔgi fʋ zi'ela la, fʋ sʋnf daa pɛlig nɛ ti. Ti na niŋ wala nyɛ faangirɛ? 6 Ti wʋsa yʋ'ʋn nwɛnɛ onɛ an dian'ad sɔb nɛ, ka ti pʋpielim tʋʋma la wʋsa nwɛnɛ kparikɛnmilisa; ti wʋsa gɔbilim nɛ nwɛnɛ vankpi'emis, ka ti tʋʋmbɛ'ɛd la mɔri ti ken wʋʋ sisi'em. 7 Sɔ' pʋ buonnɛ fʋ yʋ'ʋr bɛɛ mɔɔd ye o li'eli fɔ; bɔzugɔ fʋ bidi ti kʋdig ka kɛ ka ti gɛɛn ti tʋʋmbɛ'ɛd la yɛla. 8La'an nɛ wala, m Zugsɔba, fʋ anɛ ti ba'. Tinam anɛ ya'ad ka fʋ an onɛ ya'abid; fʋ nu'ugʋ maali ti wʋsa. 9 Da kɛ ka fʋ sʋnf duoe galisɛ; da tiɛndi ti tʋʋmbɛ'ɛd la yɛla baa bi'elaa. Wʋmmi ti sɔsʋg, ka ti anɛ fʋ biis. 10Fʋ tempʋbanɛ an kasi la lieb nɛ pipiris; hali Zion lieb nɛ pipirig, ka Jerusalem kilim dabɔɔd. 11 Ba nyu'oe ti Pʋ'ʋsim Yir linɛ an fʋ din ka vɛnl hali ka ti yaanam da zun'odif anina la, ka la'asʋma banɛ ka ti su'a anina la wʋsa san'am. 12Ti Zugsɔba, yɛlbama wʋsa paae ti nwa', fʋ na sin ka namisi ti ka li tʋʋgi li bɛnnɛɛ?