Bʋribig kun o ba' yir nɛ nɔbkɔɔg daar

Bʋʋg

organisms known by a particular common name

Subclass of	domesticated mammal, productive animal
Has use	meat, milk
This taxon is source of	goat milk, goat meat, goat hair
Found in taxon	Capra
Unicode character	🐐
Category for the view of the item	Category:Views of goats

Bʋribig kun o ba' yir nɛ nɔbkɔɔg daar anɛ gbauŋ kanɛ pian'adi pa'an nimbanɛ ka Wina'am maali ba sʋm la, ban dimi yɛt ye bam mi'inɛ gati ba taaba la. Sida, ala ka dunia la aɛn pin'ilʋgin sa ka ka' zinaa.

Mba'ami' anɛ ninsʋŋ ka mɔr o mɛŋ yiri zin' on nɛ o pu'a nɛ o biis. O bikpɛɛm la yʋ'ʋri aan Abɔɔdkʋʋnr ka onɛ paas ayi' la yʋ'ʋr mɛ buonnɛ Apʋsiakid, ka onɛ paas atan' la yʋ'ʋr aan Akpɛlimbɔɔd. Ba ma yʋ'ʋr da anɛ Asʋmbʋn. Mba'ami' an ninsʋŋ la zugɔ, sɔ' wʋsa onɛ bɛ teŋin la mi' o nɛ. O pu'a Asʋmbʋn nɛ o bikpɛɛm Abɔɔdkʋʋnr nɛ Akpɛlimbɔɔd anɛ banɛ mɔr suguru ka na'asidi ba du'adib nɛ nidib wʋsa ka nidib pian'adi ba yɛla sʋm ka kaanbid nɔsʋŋʋ tisidi ba. Amaa Apʋsiakid on ba' kae, bɔzugɔ, o gban'anɛ ye ninsaal anɛ ninsaal, alazugɔ, li pʋ nar ye sɔ' sie o mɛŋi o tiraan tuonnɛ. Apʋsiakid anɛ onɛ kpiisid ka Wina'am sʋŋ o ka o mɔr ligidi n gati ba yidim la wʋsa, hali la'an nɛ o saam. Amaa o kɔbir pʋ lut teŋin ka sɔ' pi'igida. Wina'am n sʋŋ ka laafi bɛ o la, ka o bas o ba' yir la ka keŋ tempʋʋginɛ di'e dɔɔgʋ bɛ anina onɛ o zuanam. On bɛ tempʋʋgin ka kpiisid ka ligidi bɛ la, o tam o du'adib yɛla nɛ. Ka pu'asada ken o san'an ka ba sɔnsid. Daar yinne ka o sabua kɛn o san'an na ka o yɛl o ye on bɔɔdi o kena ɛl o ka ba la'am bɛ. Ka o sabua la pʋ ki'isɛ ka lɛɛ yɛl o ye o ya'a bɔɔd ala, on kem yin na ka o ba' nɛ o ma baŋ o ka ya'a ka' ala ba kʋ siakɛ.

On yɛl ala naae la ka bu'os Apʋsiakid ye, ka fʋm ba' nɛ fʋ ma on bɛ yaanɛ ka man ken saŋa wʋsa ka pʋ nyɛti ba? Ka o lɛbis ye ba bɛnɛ teŋkpɛŋ. Ka o bu'os ye si'eli bɛ bɛɛ? Ka o sabua la lɛbis ye ayei, ka zin'in bi'ela ka yɛl o ye, dinɛ kɛ la anɛ on pin'ili baŋ o ka ken o san'an la, on nan zi' kena ka o pa'al o ye o du'adibi nwana, din ka on bu'os. Ka o lɛbis ye, man anɛ biig ka fʋ tɛn'ɛs ye m na kpɛm bɛ nɛ m saam nɛ m maa, ye o ya'a bɔɔdi si'el on yɛl ka o na tis o. Ka bipuŋ la pʋ lɛbis si'ela ka kɛɛs o ye on kunnɛ, ka o duoe zi'el o ka o kul. Daba atan' daar ka Apʋsiakid yɛl o zua yinne ye biel o ka o keŋ o sabua la yin. Ka o zua la sid pʋ ki'isɛ ka duoe dɔl o ka keŋ paae sɔnsig ka yisɔb la siak ka pʋ'ʋsi ba ken-ken, ka buol zakin ye ba mɔr ku'om na tis saam. Ban nu ku'om la naae la, o bu'osi ba suor zug labaar ka ba lɛbis ye ba sabua bɛ kpɛla ka ban kena ye ba sɔns. Ka sisɔb la lɛbi sin. Ka ti bu'osi ba ye, m biisɛ, ya sabua la an anɔ'ɔnɛ? Ka ba lɛbis ye Amɔryam. Ka o lɛm bu'osi ba ye ka yanam yi yaanɛ na? Ka ba yɛl o ban yi si'el na ka yɛl o ba saam yʋ'ʋr, ka dau la ye ya'a anɛ Mba'ami' biiga, yɛl kae ka ye ba ya'a kul ban kɛ ka kpɛɛm kena. Ka Apʋsiakid nɛ o zua la ye ba wʋmya. Ba kɛɛs o ye ba na kul ka ba sabua Amɔryam yina zi'eli ba suor. Ban sɔnsi naae ka kun la ka Apʋsiakid bu'os o tiraan la ye, ka bɔ ka ba kennɛ li'adi ba sabua ka o ye ba kɛl ka sɔ' kena? Ka o zua la lɛbis ye li yɛlli la, ye fʋ ya'a keŋ pu'aliak ka yidim la ye fʋ kɛl ka sɔ' kena, din pa'al nɛ ye yin la dim bɔɔdi fʋ pian'ad. Ka Apʋsiak ye din ka' sidaa, ye li ka' dʋnna ka ba ken pu'aliaki dɔl kpɛmma. Dau la bɔɔdi diid ka kʋ nyaŋi kpɛm kpa' yɛl vikkii, ye on na bɔ sɔ' ka tis o ligidi ka o keŋ tisi ba. Haya, ka yʋ'ʋn keŋ tʋm dau sɔ' ka tis o yɔn kɔbisyi'. Dau paae sɔnsig ka yisɔb yina n pʋ'ʋs o ye ken-ken ka o siak ka yisɔb la lɛbi kpɛn' zakin yɛl ye ba mɔr ku'om na tis saan. Ka Amɔryam mɔr ku'om yina n tis o ka o nuu naae ka yʋ'ʋm pʋ'ʋs yisɔb la ka yisɔb la bu'os o suor labaar ka o ye labaar kae ka on zua mɔr o gɔɔndim kpɛla ka tʋm on na. Ka o bu'os o ye o zua la an anɔ'ɔnɛ? Ka o lɛbis ye o anɛ Apʋsiakid, ye o anɛ Mba'ami' dakɔɔnr. On tiɛn Mba'ami' yʋ'ʋr la ka yisɔb la tiɛn ye sida ka ye ba anɛ Mba'ami' biis. Ani ka yisɔb la bu'os dau la ye ka Mba'ami' an wala? Ka o lɛbis ye laafi bɛ o. O lɛm bu'os saan la ye biis la daa kena ka o yɛli ba ye ba kulim ka kɛ ka kpɛɛm kena, ye din la ka o kena bɛɛ? Ka saan la lɛbis ye ɛɛn, ka yisɔb la ye alaa o maal sʋ'ʋŋa nɛ on kena ka ba na sɔns ka maligin baŋ taaba sʋ'ʋŋa la. Yisɔb la daa pin'ili yɛt saan la ye dinɛ kɛ ka on buol la, on pʋ bɔɔdi o biig bɛ sɔ' san'an ka daar wʋsa anɛ bʋ'ʋd nɛ pian'abaalʋg la, on pʋ bɔɔd ala. Dinɛ lɛm paas anɛ o pʋ bɔɔdi o ti nyɛ o biig la ka o milig ka pʋʋr tabin ka li anɛ kɔm yɛllɛ. Amaa ye on mi' ye Mba'ami' kʋ siaki maal on biig bɛ'ɛdɛ. Ya'asɛ, ye on wʋm ye sieba kuosidi ba biis nɛ di'esid ligidi ka ba buon ye talima, Mam mi' si'el anɛ m niigi. M ya'a ti tʋm biis na ka m sʋnf da san'am, m buolʋg la gbinnɛ an si'em la. Dau la yʋ'ʋm baŋ ya ye ba sabua la saam la pʋ bɔɔd ligidi la, ka zaŋ o yɔn kɔbisyi' niŋ fɛnp ka paae yɛli Apʋsiakid ye on keŋ la ye yɛl la maal ya. Ye ligidi la ka on yisi tis o la ye li kpɛn kʋ pian'ad la nɛ giŋa.

Wina'am sʋŋ ya ka Apʋsiakid nɔk o sabua la ka ba keŋ nwɛ' nu'ug ka maal dinɛ bɛ. Saŋa daa kena ka Apʋsiakid diem la bɔɔd o niigi ka tʋm biis ye ba kemi Mba'ami' yiri bu'os. Bam paae la ka Mba'ami' ye on mɛ mɔr kpɛɛm ka tiesi pa'al biis la yikanɛ bɛ yampʋʋn la, ye o saampit yiri la. Biis la daa pʋ ki'isɛ ka duoe keŋ bʋŋkʋdʋg la yiri pʋ'ʋs o ka zaŋi tiɛn o. Bʋŋkʋdʋg la daa buol o kpɛɛmtaaba la la'as ka zaŋ biis la ken kibari yɛli ba. Ba daa nwɛ' sɔɔra ka Mba'ami' ye biig la anɛ bibɛ'ɛd ka on di pu'a la o pʋ mɔr o na pa'al onɛ, ye on pa'a ye o yɛl biis la nɛ ye ba kulim ka on biig pʋ di pu'a, ka kpɛɛmnami bɛ la on kʋ tun'e kpɛm pian' ala ka ba zi' ti'irɛ. Kpɛɛmnam la da yɛli Mba'ami' ye o kɛl ka baa pʋ dum o biigi paad kɔnbirɛ, ye ba yɛlim biis la ye ba kulim ka ba na kpɛlim ia niigi la ka buoli ba ka ba kena n di'e. Ba daa buol biis la yɛli ba ye din sadigin anɛ zina ka ba kena la, ba kulim ka ba na lɛdigi ia niigi la ka buoli ba n tis. Din pʋn aan ba yiiga ken la ba daa pʋ nwa'asɛ ka duoe kul. Biis la daa kul la ka kpɛɛmnam la yɛli ba ye ba buolimi Apʋsiakid la na ka ba sa'al o ka o yʋ'ʋr la sid bɔɔdi di o nɛ. Ba sid buol o ka bu'os o ye on maal si'em la an sʋm? Nɛ'ɛŋa ka o pʋn gban'e la o lɛn zi' ye nid bɛ yinnɛ, ka yɛti kem gɔsi ba niŋgbina an si'em. Dinɛ paas ayi' la, on di o pu'a la o pʋ mɔr o na pa'ali ba, ye on gɔs la, onɛ du'a o mɛŋ bɛɛ banɛ du'a o ka o zi' ye nid mɔr zuobʋg bam banɛ zin' nwa sʋʋginɛ? Ka o lɛbis ye ba ya'a kʋ sʋlɛɛ ban kɛ ka on pʋn tun'e sʋli o pu'a, ka duoe lɛbi o tempʋʋgin la. Ka zaam ma'ae ka o duoe keŋ o diem la yiri yɛl o ye bɔ ka o bɔɔd o niigi ka pʋ yɛl on kanɛ sʋ'ʋe pu'a la ka keŋ yɛt banɛ ka ba nu'ug kae on pu'adiir la pʋʋginɛ? Ka o diem la bu'os o ye o saamnam la nu'ug pʋ paas o pu'a la nii? Ka o lɛbis ye dinɛ kɛ la on mɔr ligidi na da' niigi la sʋl ye ka o saam la ka' la'af bɛɛ naafi na paasɛ. Ka o diem la ye on ya'a da baŋ ye o saam nu'ug pʋ paas pu'a la nii, on da kʋ kɛ ka o biig la kul oo, ka ye Mba'ami' anɛ onɛ ka on baŋ ka li ka' zinaa ye din zug ka on ya'a da baŋin ye o anɛ nimpʋnannaa on biig da kʋ kul o. Ka o sʋnf pɛlig nɛ o diem la pian' si'em la ka o duoe kul. On paae yin la o yɛl o pu'a ye onɛ o saam la niŋ nɔɔr yinne ka bɔɔdi ba pa'al ye ban nini nieya on kʋ lɛn sʋl ya'asɛ. Ka o pu'a ye o ya'a gɛn'ɛd nɛ ba saamnam la o na ti kɛ ka ba pian'ad pian'abɛ'ɛdi tisidi ba. Ka o lɛbis ye o ya'a mi' ye o na di'e bʋnkʋt la nɔɔri gat on kanɛ an o sid la on yɛlim. O ya'a pʋ lɛm bɔɔd o ka bɔɔda on yim ka on na lɛn di pu'a ya'as. Ka o pu'a gʋ'ʋŋ ka lɛbi sin.

Ba ye bin bɛ baa zugin ka o zi' ka nyuusid teŋ teŋ. Apʋsiakid n daa gɛn' pian'ad yɔɔg yɔɔg la li pʋ yuugɛ ka o duoe ye o wa'ae nɛ Kʋmasi ye o da' la'ad na kuos. On keŋ kpɛn' lɔr la ba daa pʋ laligɛ ka lɔr la lu ka o nɔbir kɔ'ɔg ka o zuanam wʋm ka keŋ nɔk o mɔri keŋ sibiti ni ka du'ata la di'e o digil ka ba keŋ yɛl o pu'a nɛ o saamnam. Ka o saam yɛl ye, "o daa yɛl ye sɔ' da pian' o yɛllɛ, dinzugɔ on ba'a ka' o san'anɛ". Ka o zuanam la lɛbi yɛl o pu'a ye o saam ye on kʋ kenaa, ka kɛ ka pu'a la nɛ o zuanam la ma'aa gɔsid o sibiti la ni. Din daa yuug hali la ka o zuanam la ti gɛn' bas ka pʋ lɛn ken ya'asɛ ka kɛnɛ pu'a la ma'aa. Ligidkanɛ daa bɛ o nu'ugin la wʋsa daa naae ka on na niŋ si'em lɛn kae, ka o mak wʋsa gʋ'ʋŋ ka yɛl o pu'a ye bʋn la paae si'em la o kem yɛl o zuanam la ye ba kpɛ'ɛŋim sʋŋ o ka on ya'a tiligɛ, sam la ya'a zɛm si'em wʋsa on na yɔ. Ka o pu'a yɛl o ye o dim sʋguru ka tʋm nwɛ' o saam la nu'ug ka ba na sʋŋ o hali ka sam kʋ maligin zu'oe. Hali ye o ya'a ti pʋ nyɛ yɔɔ, ba kʋ mugus o. Ka o gʋ'ʋŋ ka yɛl o pu'a ye on pʋn dig la on gɛn o mɛŋɛ, ye o gɔsim on na niŋ si'em ka on lɛn zi' on na yɛl si'ela. Pu'a la sid daa duoe kpɛ'ɛŋ o mɛŋi tʋm nu'ugʋ o saam la san'an ka o saam la bɔɔd ye o zan'as ka nidib banɛ an o du'adib la yɛl o ye o pi'im bin ka di dɔɔnd. O saam la daa di'e nu'ug la ka keŋ sɔs o sibiti la ni ka zi'enɛ gɔs o ka o ti paam laafi ka o yɔ sam la wʋsa ka mɔr o kul yin. Apʋsiakid n daa mɔr laafi la o daa zi' yirɛ, amaa on daa lieb tadim la o zuanam wʋsa daa widig nɛ ka bas o ka o lɛn ka' gban'arɛ. Apʋsiakid kul yin yʋ'ʋs, saŋkan la hali bibanɛ an bibaanlʋg la wʋsa daa lɛm mɔr zugʋ gat Apʋsiakid. Ala ka ba yɛt la, Sɔ' da zaŋ yʋ'ʋbɛ'ɛdi tis o biiga ka sansi'a bɛ ka yʋ'ʋbɛ'ɛd dit o daana. Alazugɔ, baŋim ye siiliŋ kaŋa sid tu'as nɛ yɛlsida. "Bʋribig kun o ba' yir nɛ nɔbkɔɔlʋŋ daar".

Ya'am malis

Pʋkɔɔnri da bɛ mɔr o bipuŋ yinne. Bipuŋ la yʋ'ʋri da aan Akɛlsa ka o ma yʋ'ʋr an Mba'abɔɔd. Mba'abɔɔd sid da kpinɛ ka kɛɛ o nɛ pʋʋg ka li an wʋʋ nwadig yinne. O da bɛnɛ ala tat-tat-tat nɛ ban ti kena maal o sid kʋʋr. Saŋkan la ka Mba'abɔɔd mɛ du'a ka o sidpit la pʋd biig la yʋ'ʋr ye Arabɔɔg. Li bɛnɛ wala ka yidim la yʋ'ʋn ti lia'ad pʋkɔɔnr la ka o pʋ siakɛ ka dap la wʋsa mɔ ti gʋ'ʋŋ. Pʋkɔɔnr la zan'as la, ka dap la mɛ gɛn' ka tam o yɛla. Dap la bas pʋkɔɔnr la, ba kpɛm bas Arabɔɔg yʋ'ʋr la nɛ ka yʋ'ʋn buon ye Akɛlsa. Ban ye ba di pʋkɔɔnr la ka o zan'as la zug ka ba ye ba kɛl o sa ka li kpɛn kilim biig la yʋ'ʋr. Daar yinne ka ba dii naae ka zin' ka Mba'bɔɔd bu'os Akɛlsa ye, “Biiga, li anɛ man nɛ fʋ ma'aa bɛ. Fʋ ka' saam bɛɛ taun ka yɛl ya'a paaf ka o na sʋŋi fɔ, li anɛ Wina'am ma'aa ka ti gɔsid. Nannanna, Wina'am ya'a ye fʋ gaŋim yɛla ayi' nwa; la'ad bɛdegʋ bɛɛ ya'am, fʋ na gaŋ bɔ?”

Ka Akɛlsa lɛbis ye, “Dunia nwa la'ad anɛ zaalim li kʋ tun'e sʋŋim si'ela, li anɛ gaamis. Wina'am ya'a lɛɛ tisim ya'am ka m mi' linɛ na maalim nɛ linɛ na san'amim, lin an sʋm gat la'ad.” Ka o ma ye, “Wina'am na tisif fʋn bɔɔd si'el.” Zi' ka pu'a la yɛl wala la Wina'am pʋn tis biig la ya'am sa. Haya, ka biig yʋ'ʋn biid ka ya'am mɛ paasid, o yʋ'ʋn ti bi' pu'asadir ka dap kennɛ lia'ad o. Daar yinne ka biribis ayi' la'as taaba kena. Yinne da anɛ bʋndaan hali ka yinne la mɛ an nɔŋdaan tapiif. Bʋndaan la la ya'a ɛɛnti paae wʋsa, o pian'adi on bɔɔd si'em ka yɛt ye ba da tɛn'ɛs ye on anɛ wʋʋ nɔŋdaan biiga, ka o ma ya'a bɔɔd si'el wʋsa on yɛlim ka o na sʋŋ o. Hali ka ye o na mɛ' yiri tis o ma la, ye o ya'a ɛl onɛ, o ma pʋʋg na piee.

Mba'abɔɔd ye, “Waii, fʋ ya'a bas biribiŋ kaŋa fʋ liisi fʋ mɛŋ nɛ man wʋsa. Hali o yɛl ye o na mɛ' yiri tisim. Nid pʋ bɔɔd nwa' ka bɔɔd bɔ ya'asɛ? Gɔsim nɔŋdaan la ken daar wʋsa na la, o nam mi' tisif baa yɔlʋg ka kɛti o mɛ' yiri tis mam? Fʋ pʋn baŋ ka o mɔr yir kimm nɛɛ? Zan'asimi fʋ tɛn'ɛs sʋ'ʋŋa, ka ti keŋ ya'ali fʋ mɛŋ ka mam ba'a kae.” Ka Akɛlsa ye, “M ma, kɛl ka laafi gat diib, fʋ zi' ye ba nyɛt diib ka zan'asidaa?” Li nwɛnɛ nyalima nɛ ka biribis la ti lɛn sia'al taaba lɛbna ya'asi sɔns anwana sʋ'ʋŋa. Ka nɔŋdaan la ti kɛɛsi ba ye ba kpɛlim sʋm ka on na kul, ka Akɛlsa yii zi'el o suor ka yɛl o ye daar zaam on kidig o bɔn'ɔgʋn la na ka o dɔl o kul. On kɛɛs nɔŋdaan la ka lɛb la, ka bʋndaan la mɛ ye ba kpɛlim sʋm ka o lɛb sa. Ka bipʋŋ la mɛ lɛn yii zi'el o suor. On ye o lɛb la ka bʋndaan la ye on mi' ye zina yɛla naae nɛ. Lin la, o kɛl ka ba kpɛn keŋ ka li ya'a anɛ o ma la yɛlaa bɛogɔɔ o saa na lɛbna bu'os o on bɔɔd si'el wʋsa ka tis o. Ka Akɛlsa ye o wʋmya amaa o pʋ kan'as o la'adɛ, dinzugɔ o kulim ka daar zaam on kidig o bɔn'ɔgʋn la na.

Haya, daar zaam paae ya ka nɔŋdaa kidigi zin' tiig gbinnin, li pʋ yuugɛ ka bʋndaan mɛ paae na ka ba la'asi zin' tiigin la. Ba bɛnɛ wala hali ti paae tisʋʋs ka bipuŋ la paae na pʋ'ʋsi ba ka yɛl ye zina ka on na baŋ onɛ sid bɔɔd o amɛŋa. Din la, onɛ kirid pʋ dit na'anya'aŋ ɔɔnr bin'isim, ba gban'amɛ ba mɛŋ ka on kuli kan'as o la'ad wʋsa na. Ka zaŋ la'abanɛ ka o mɔr na la digil ka ye ba wʋsa gur o ka sɔ' da kulɛ. O mi' ye o ya'a pʋ yɛl wala, nɔŋdaan la na kul. O gban'e o suori lɛbi kuli diginɛ gbins sʋ'ʋŋa ka bɛog ti ba'asi nie.

Winnig daa tans nɛ dʋ ka o yʋ'ʋn paae na ka ye, ya gaafara ka man sa lɛbnɛ ka m ma niŋgbina pʋ malisa, din ka m sa pʋ nyaŋi lɛbna. Wala, yanamɛ sa nyaŋi mɔdigi paae anwa la ya mɔnya. Yɛl yinne ka m ye m tisi ya ka onɛ na tun'e maali li la on sɔb ka m na dɔl. Yɛl la anɛ ye onɛ na siaki nɔk o fuug la lɔs ku'obɛ'ɛdin la nɔɔnɔ nɛ nɔba, on daan ka m na dɔlli kul. Yɛla paae na! Arizak daan la wʋm wala la o pʋm bɔɔdin ye o pa'al ye di bɛ. O kpɛn yɛɛg nɛ o fuug la tɔ’ɔtɔ lɔs ku'obɛ'ɛdin la ka sun'oe o kʋrlannɛ lɔsi paas ani nɔɔnɔ ka yɛl ye, “Li ya'a san'am, m na lɛn da'. Li bɛ ka bɔ?” Saŋkan la ka nɔŋdaan la zi'e nɛ o gbaʋŋ.

O pʋn ka' fuugɔ ka mɛ tɛn’ɛsi o sʋʋnrin sa ye pu'a la pʋn ka' o pu'a ka o namisid bɔ, ka kpɛn gban'e o suori kun baanlim ka Akɛlsa buol o ye o lɛm na. Ka o lɛb ka o bu'os o ye, fʋ baŋ ka fʋ gbaʋŋ la gat oŋa fuud la nɛ ko? Ka nɔŋdaan la zi'en kii ka yɛl o ye, “Li pʋ gata amaa m gbaʋŋ zaŋ, zaŋi nwa ka m saam da' tisim ka kpi, m ka' fuugɔ, alazug, m ya'a nɔ ka li aaɛn, m lɛn nyɛt yaanɛ?” Din ka m kun. Ka bipuŋ la ye ba sʋŋim o ka o ʋki o la'ad la paae na'ayin ka o gaŋ o sid. Ba zi la'ad la paae na'ayin ka na'ab tʋm buol o ma. Ka o ma paae na la, ka o ye, “Sida, biribimbama ayi' nwa bɔɔd man, lin ka m ye ti kɛn kpɛla na ka m gaŋi m sid.” Ka na'ab ye, fʋ mɛŋi na gaŋ fʋm bɔɔd sɔ' ka ti baŋ tinamɛ na niŋ si'em. Ka Akɛlsa ye, ya'a an sida, mam bɔɔdi ba wʋsa amaa pu'a kʋ tun'e kul sidiba ayi', ye on naan kulin bʋndaan la amaa yɛl yinne bɛ. Bʋndaan la pʋ zɔɔ o fuud la sa'aŋɔ ka ye li ya'a san'am on lɛn da' la, li bɔɔdi pa’al ye m ya'a kul o ka ti niŋ si'el bi'ela, o na bʋ'ʋm ka ye m ya'a bɔɔd man yim ka o na lɛn di pu'a. Li pa’al ye o pʋ zɔt si'el nimbaanliga. Ala mɛnɛ, on mi' ye nɔŋdaan la diti fara ka la'an nɛ wala on yɛl ye o saammɛ da' gbaʋŋ la tis o ka o ya'a san'am, o kʋ lɛn nyɛ la zug, on na kul nɛ on. Bɔzugɔ o mi’ ye o ya’a kul o ka ti niŋ si'ela o na yɛl ye, “M kʋ bʋ’ o bɔzugɔ m ya'a bʋ' o, na yi ka m kʋ lɛn nyɛ pu'a. Dinzugɔ, laafi gat arizak. Dabisa ala ka ti na bɛ dunia nwa ni?

Bu'osa

1.         Akɛlsa ma da mɔr sid. Sida bɛɛ faadɛ?

2.         Dap ala da lia'ada Akɛlsa?

3.         O ma da yɛl o ye o ɛlim anɔ'ɔnɛ?

4.         Akɛlsa da gaŋ bɔ? Ya'am bɛɛ arizaka?

5.         Bɔ yɛla ka Akɛlsa da zan'as ligidi daan la?