Kʋda'ar

Kʋda'ar anɛ kʋʋr malima ka ba maan kʋʋr la naar daar. Kusaasi daꞌari ba kυυr siꞌem anɛ nwa, kɔnbid nwɛꞌɛb yimbɛog la puꞌatanp na kuanꞌa kʋdaꞌar daam. Kʋdaꞌar daam kuaꞌ yimbɛogυn nɛ an biꞌisig la, puꞌatanp la na gilig buudi la ni diꞌes mui, bɛŋa, summɛŋa nɛ kpaam namɛ mɔri lɛp dabɔɔgυn la ka gbiꞌe bɛŋa la fuu maal kɔɔsɛ bɛɛ kamisa ka dυg sunzɛnꞌυg zangυυm kanɛ ka buon nɛ li yɛ zangυυm biꞌa la ni. Zaam yaꞌa maꞌae siak nɔɔs nwɛꞌɛb, dabɔɔg biis la na bu nuꞌa dɛꞌɛsυg nɛ pɛꞌɛυg raaŋ. Baꞌ biigi kʋʋd nɔkan la ka onɛ wυsa mɔri o nuꞌa na mɛ tun'e kʋ, din yaꞌa naae ba na ziꞌen ka baꞌ biig la diꞌe sunzɛnꞌυg la ka bul biis ka ba zɛ bas tɛŋ nɔɔra atan', dinɛ pasida anaasi la ba pu lɛm bata ba ɔnbiti. Ka puꞌatanp la naan gbiꞌesi tis kpɛɛmnam la nɛ banɛ bɛ la wυsa ka ba ɔnb. Ba yaꞌa naae din la, ba na dυg nua la digil ka li yimbɛog kikiꞌυg ka baꞌ biig la isigi ɔnb nua la ka nidib naan laꞌas na ka ba pʋn pukυυra zug. Fʋ puꞌa yaꞌa pʋ kpii fʋ pʋ pʋn pʋkɔɔrɛ sɛɛ onɛ puꞌa kpi on pʋn pʋkɔɔnr. Ba yaꞌa naae din la ba na kɛ ka puꞌatau nɛ dɔɔg nid mɔr nwana yi keŋ kɔlυgυn nɛ gbiꞌe kuꞌom nwan yinne ka nɔk nwan yinne pibil kuꞌom la mɔra ziꞌel zaŋgυυm kanɛ ka ba buonnɛ li yɛ zaŋgυυm biꞌa la ni ka bɔ yυri su saꞌakɔd kuꞌom nɛ yɔaꞌ vaad. Ba yaꞌa nae din la ba na yis puꞌatanpa yi ka mɛ yis dɔɔg nidiba yi, ba na kɛ ka dɔɔg nid bɛɛ puꞌatau yinne zi kuꞌom la nɛ nwan la, ka dɔɔg nid bɛɛ puꞌatau yinne mɛ zi yura nɛ kuꞌom la mɛn, Ka bɔ muusi kɔɔ-kɔɔ ba gima-gima yis ata tis puꞌatau la ka yis anaasi tis dɔɔg nid la. ba nɛ ziid la yaꞌa buꞌes kuꞌom la yinne ka banɛ mɔr muus la mɛ tɔꞌ ba maala la nɔɔra ata la, puꞌatau la bun na nae ka dɔɔg nid la bun nan kpɛlim ka o gɔsi o dakiigi tɔꞌ Ba yaꞌa nae din la, ba nyuꞌon na nɔk dabɔɔg la sɔb banaa bɛɛ o fuug lɛbigi yɛɛl biribig kpɛɛm, ka nɔk pɛꞌɛg la ka ba a ku la gbaugυ maal fuugu yɛɛlυ ka bɔ kenkaꞌari maal nwɛꞌɛfu tisu ka o baꞌan nɛ lυꞌad nam ka o kɔɔr. Ba yaꞌa yɛ ba kaar dabɔɔg la, ba na siꞌeg samanin nɛ pɔꞌ nwɛꞌɛnɛ nidiba ata ka nyaan yυυm zυwalυg ka kaad dabɔɔg la. Ba yaꞌa kaae paae pukυυra yampυυn, ba na lɛn ziꞌena ni pɔꞌ nɔɔra ata mɛn, ba na maala la gilig dabɔɔg la nɔɔra ata ka nyaan daꞌae kυυra, ba yaꞌa nae kυdaꞌara dabɔɔgura na yɛꞌɛŋ laꞌaban ka ba pa zangi yɛɛl biribig kpɛɛm la ka zaŋ kur nɛ liꞌig tis biribig kpɛɛm la ka ye o diꞌem nɛŋa kuur diisi o pitip nɛ o maꞌ bɛɛ o manam la. Ba yaꞌa nae din la, ba na yɛ ba kpɛ daꞌ ka bɔ maꞌasim bɛɛ tiig zinꞌigi keŋ. Ba wae la siꞌeba na mɔr niꞌim ka siꞌeba mɔr daam nɛ nuꞌa ka sɔ mɛ mɔr gυlυgυŋ, ba yaꞌa bɛɛ ni did daꞌa la ka onɛ mɔr gυlυgυŋ la kena nwɛn ba tɛŋsυg la bυb ka ba yɛ daꞌ buya. Ka lɛp samanin na ka dabɔɔg biig la yis daam na ka ba nu ka widig. Ba yaꞌa nae yimbɛogυn la, dabɔɔgura na mɔr pukɔɔnr la nɛ biis la kɛŋ tis buudi la kpɛɛm ka yɛ kυυra nae nyaan din kam mɔri ba na. kpɛɛm la na diꞌeba ka pυꞌυs dabɔɔgυra nɛ on gɔsiba ka kυυra kena nae nɛ alaafi la. Buudi la kpɛɛm mɛ na yɛl dabɔɔg biribig kpɛɛm la yɛ mɔri fu pitip nɛ fu maꞌ bɛɛ fu manam la lɛbi kul gɔsiba.