Kuda'ar

Kusaasi daꞌar ba kυυr siꞌem anɛ nwa, kɔbid nwɛꞌɛb yimbɛog la puꞌatanp na kuanꞌa kudaꞌar daam. Kudaꞌar daam kuaꞌ yimbɛogυn nɛ an biꞌisig la, puꞌatanp la na gilig buudi la ni diꞌes muꞌe, bɛꞌɛŋa, nwangɛ nɛ kpaam naamɛ mɔri lɛp dabɔɔgυn la ka gbiꞌe bɛꞌɛŋa la fuu maal kɔɔsɛ bɛɛ kamisa ka dυg sunzɛnꞌυg zangυυm kanɛ ka ba bul nɛ li yɛ zangυυm biꞌa la ni. Zaam yaꞌa maꞌe siak nɔɔs nwɛꞌɛb, dabɔɔg biigs la na bu nuꞌa dɛꞌɛυg nɛ pɛꞌɛυg raaŋ. Baꞌ biigi kuud nɔr kan la ka onɛ wυsa mɔri o nuꞌa na mɛ tuon ku, din yaꞌa nae ba na ziꞌen ka baꞌ biig la diꞌe sunzɛnꞌυg la ka bul biis ka ba zɛ bas tɛŋ nɔɔra ata, dinɛ pasida anaasi la ba pu lɛm bata ba ɔnbiti. Ka puꞌatanp la nyaan gbiꞌesi tis kpɛɛmnam la nɛ banɛ bɛ la wυsa ka ba ɔnb. Ba yaꞌa nae din la, ba na dυg nuꞌa la digil ka li yimbɛog kikiꞌυg ka baꞌ biig la isigi ɔnb nuꞌa la ka nidib nyaan laꞌas na ka ba pun pukυυra zυŋ. Fu puꞌa yaꞌa pu kpii fu pu pun pukυυrɛ sɛɛ onɛ puꞌa kpi onɛ pun pukυυr. Ba yaꞌa nae din la ba na kɛ ka puꞌatau nɛ dɔɔg nid mɔr nwana yi keŋ kɔlυgυn nɛ gbiꞌe kuꞌom nwan yinne ka nɔk nwan yinne pibil kuꞌom la mɔra ziꞌel zaŋgυυm kanɛ ka ba bul nɛ li yɛ zaŋgυυm biꞌa la ni ka bɔ yυri su saꞌakɔd kuꞌom nɛ yɔaꞌ vaad. Ba yaꞌa nae din la ba na yis puꞌatanpa yi ka mɛ yis dɔɔg nidiba yi, ba na kɛ ka dɔɔg nid bɛɛ puꞌatau yinne zi kuꞌom la nɛ nwan la, ka dɔɔg nid bɛɛ puꞌatau yinne mɛ zi yura nɛ kuꞌom la mɛn, Ka bɔ muusi kɔɔ-kɔɔ ba gima-gima yis ata tis puꞌatau la ka yis anaasi tis dɔɔg nid la mɛn. ka ba nɛ ziid la yaꞌa buꞌes kuꞌom la yinne ka banɛ mɔr muus la mɛ tɔꞌ ba na maala la nɔɔra ata, puꞌatau la bun la na nae ka dɔɔg nid la bun nan kpɛlima yinne ka o gɔsi o dakiigi tɔꞌ Ba yaꞌa nae din la, ba nyuꞌon na nɔk dabɔɔg la sɔb banaa bɛɛ o fuug lɛbigi yɛɛl biribig kpɛɛm la, ka nɔk pɛꞌɛg la ka ba sa ku la gbaugυ maal fuugu yɛɛlυ pas, ka bɔ kenkaꞌari maal nwɛꞌɛfu tisu ka o baꞌan nɛ lυꞌad nam ka o kɔɔr. Ba yaꞌa yɛ ba kaar dabɔɔg la, ba na siꞌeg samanin nɛ pɔꞌ nwɛꞌɛnɛ nidiba ata ka nyaan yυυm zυwalυg ka kaad dabɔɔg la. Ba yaꞌa kaae paae pukυυra yampυυn, ba na lɛn ziꞌena ni pɔꞌ nɔɔra ata mɛn, ba na maala la gilig dabɔɔg la nɔɔra ata ka nyaan daꞌae kυυra, ba yaꞌa nae kυdaꞌara dabɔɔgura na yɛꞌɛŋ laꞌaban ka ba pa zangi yɛɛl biribig kpɛɛm la ka zaŋ kur nɛ liꞌig tis biribig kpɛɛm la ka ye o diꞌem nɛŋa kuur diisi o pitip nɛ o maꞌ bɛɛ o manam la. Ba yaꞌa nae din la, ba na yɛ ba kpɛ daꞌ ka bɔ maꞌasim bɛɛ tiig zinꞌigi keŋ. Ba wae la siꞌeba na mɔr niꞌim ka siꞌeba mɔr daam nɛ nuꞌa ka sɔ mɛ mɔr gυlυgυŋ, ba yaꞌa bɛɛ ni did daꞌa la ka onɛ mɔr gυlυgυŋ la kena nwɛn ba tɛŋsυg la bυb ka ba yɛ daꞌ buya. Ka lɛp samanin na ka dabɔɔg biig la yis daam na ka ba nu ka widig. Ba yaꞌa nae yimbɛogυn la, dabɔɔgura na mɔr pukυυra nɛ biis la kɛŋ tis buudi la kpɛɛm ka yɛ kυυra nae nyaan din kam mɔri ba na. kpɛɛm la na diꞌeba ka pυꞌυs dabɔɔgυra nɛ on gɔsiba ka kυυra kena nae nɛ alaafi la. Buudi la kpɛɛm mɛ na yɛl dabɔɔg biribig kpɛɛm la yɛ mɔri fu pitip nɛ fu maꞌ bɛɛ fu manam la lɛbi kul gɔsiba