Maal-Sʋm Nɛ Baꞌasid Siꞌem

Saŋa siꞌa da bɛ ka ba kena bɔɔd ye ba baŋ maal-sʋm nɛ baꞌasid siꞌem. Ban vɛɛnsid bɔɔd ye ba baŋ maal-sʋm nɛ baꞌasid siꞌem la, ba keŋɛ pinꞌil nɛ Anua sanꞌan, ka buꞌos o ye, “Anɔnyaꞌaŋa, maal-sʋm baꞌasidi bɛꞌɛdi bɛɛ li basꞌasidi sʋm?”

Ka Anɔnyaꞌaŋ lɛbis yɛli ba ye, “Maal-sʋm basꞌasidi bɛꞌɛdin”. Ka ba buꞌos o ye, “Bɔɔ kɛ ka maal-sʋm baꞌasid bɛꞌɛdin nɛ?”

Ka o lɛbis ye, “M daa kena nyɛꞌ m gɛla wiak biis, ka ba nɔk kpanꞌaʋŋ gɛla paꞌalim ka m wiak kpinꞌini tisi ba. Ka kpinꞌini la ti nɔbig ka ba nɔk kpinꞌini la kuos daꞌ kɔnbid, ka kɔnbid la ti kena lieb niigi. Ka ba di puꞌab ka nɔk niigi la sʋl puꞌab, ka gbanꞌe kɔnbid la sʋl puꞌab, ka gbanꞌe mam Anɔnyaꞌaŋ biis paas sʋl puꞌab. Ka li ti kena ka m tadig ka pʋ lɛm mɔr paŋ yaꞌasa. M nɛ pʋ lɛm mɔr paŋ yaꞌas la, sɔꞌɔsɔ pʋ lɛm tɛnrim yɛla yaꞌasa. Ba yaꞌa ye ba bas ki, ba basidi kpinꞌini nɛ nɔbanɛ mɔr paŋ la ka ba daꞌadim ka guꞌod ki la wʋsa. Dinzug maal-sʋm baꞌasidi bɛꞌɛdin.” Ka ba ye awɔɔ.

Haya, ka ba keŋɛ Abʋnyaꞌaŋ sanꞌan buꞌos o ye, “Maal-sʋm baꞌasid bɔ ni?” ka Abʋnyaꞌaŋ lɛbis ye, “Maal-sʋm baꞌasidi bɛꞌɛdin.” Ka ba buꞌos o ye, “Bɔ yɛla ka maal-sʋm baꞌasid bɛꞌɛdinnɛ?” ka Abʋnyaꞌaŋ lɛbis ye, “M duꞌa biis ka ba nɔkim biis la tiak niigi sʋl puꞌab, ka ba duꞌa biis. Ka man ti kena kʋdʋg la, ba pʋ lɛm tɛnrim yɛlaa, amaa ka lɛɛ tiɛnd bʋpaalis nɛ niigi banɛ ka ba tiak la ka tamim yɛla. Hali ka mɔrim ken mɔɔgin kpaꞌad, ka nintaŋ nwɛꞌɛdim ka sɔꞌɔsɔ pʋ tɛnrim yɛla, baa nɛ kuꞌom, ba pʋ tisidim ka m nuuda. Dinzug maal-sʋm baꞌasidi bɛꞌɛdin.” Ka ba ye awɔɔ.

Ka ba lɛn keŋ ti buꞌos Anaꞌanyaꞌaŋ ye, “Maal-sʋm baꞌasid bɔ ni?” ka Anaꞌanyaꞌaŋ lɛbis ye, “Maal-sʋm baꞌasidi bɛꞌɛdin” ka ba buꞌos o ye, “Bɔ ka maal-sʋm baꞌasid bɛꞌɛdinnɛ?” ka Anaꞌanyaꞌaŋ lɛbis yɛli ba ye, “Mam kena duꞌa biis ka ba nɔki ba wʋsa sʋl puꞌab, ka kɛɛ nɔk sieba daꞌ wiidi. Ka ban daꞌ wiidi la mɔr paae na la, ba kennɛ kied yaama tisid wiidi la, ka gbinꞌisid kuꞌom nulisidi ba ka lɛɛ bas man, baa daar yinne, ba pʋ tisim kuꞌom ye m nuuma. Ala ka m ye maal-sʋm baꞌasidi bɛꞌɛdin la.” Ka ba ye awɔɔ.

Ka ba lɛn keŋɛ Apuꞌanyaꞌaŋ sanꞌan n buꞌos o ye, “Maal-sʋm baꞌasidi bɛꞌɛdin bɛɛ sʋm ni?” ka Apuꞌanyaꞌaŋ lɛbis ye, “Maal-sʋm baꞌasidi bɛꞌɛdin” ka ba buꞌos o ye, “Bɔ ka maal-sʋm baꞌasid bɛꞌɛdinnɛ?” ka o lɛbis ye, “Man daa mɔr paŋ saŋa siꞌa la, m daa wiid kuꞌom ka duꞌad biis ka gɔsidi ba sʋꞌʋŋa, ka ba ti kena zuꞌoe. M daa miꞌ saŋa kanɛ nar ye biis di diib ka maannɛ ala tisidi ba tituaa. Amaa ban ti kena zuꞌoe saŋkanɛ ka m paŋ naae la, ka ba di puꞌab duꞌa biis la, ba kʋ maal diib ka m dii, amaa banɛ ieedi ala ti paae saŋa kanɛ ka ba kɔꞌɔm zabid la ka ba nyaan maal diib ka tisim. Saŋa kanɛ ka ba yaꞌam bɔɔd ka ba tisidim diib ka m nyaan di, mam pʋ lɛm mɔr paŋ la zug. Dinzug ka m ye maal-sʋm baꞌasidi bɛꞌɛdin” Ka ba ye awɔɔ.

Ala ka ba lɛn keŋ buꞌos Abʋdanyaꞌaŋ ye, “Maal-sʋm baꞌasidi bɛꞌɛdin bɛɛ sʋm ni?” ka o lɛbis ye, “Maal-sʋm baꞌasidi bɛꞌɛdin” ka ba buꞌos o ye, “Bɔ ka maal-sʋm baꞌasid bɛꞌɛdinnɛ?” ka o lɛbis ye, “Man daa duoe m biilimin kena kua di puꞌa duꞌa biis, ka kua ugu ba sʋꞌʋŋa ka biis la ti kena nɔbigɛ. Ka biis la zuꞌoe la, ba keŋɛ dii ba puꞌab na. Ban di ba puꞌab la saŋa siꞌa la ka m kʋdig nɛ, ka paŋ naae. Amaa saŋa kanɛ sʋm ye ba tisim diib ka m di la, ba pʋ tisidimaa, ka m kɔꞌɔm zabid hali asɛɛ sankanɛ ka ba ti maali ba yaꞌam nɛ bɔɔd siꞌem la ka nyaan tisim diib. Saŋa kanɛ ka ba ti bɔɔd ye ba di la, saŋkan ka m nyaan nyɛt diibi dit. Man kʋdig paae saŋa siꞌa la, m yʋꞌʋn liebi biig ka li nar ye ba gɔsim nwɛnnɛ ban gɔsidi ba biis la siꞌem la, amaa ba pʋ maannɛ alaa. Dinzug ka m ye maal-sʋm baꞌasidi bɛꞌɛdin”