Sɔlima: Apʋzɔt Yɛl

Dau da bɛ mɔri o biribiŋ, ka biig la yʋ’ʋr buon ye Apʋzɔtyɛl. O saam la biig da anɛ Apʋzɔtyɛl ma'aa. Ka daar yinne ka biig la nɛ o saam zin'i sɔnsid. Ka biig la ti yɛl o saam ye, on pɔya, ye on zin'i nwa, ye o ya'a ti kpi daasi'er, ye onɛ Apʋzɔtyɛl ye o kɛnɛ ka ba kʋk o nɛ sian'anaaf iill ka ba nyaan mum o. Ka o saam ye o tʋbisim ka li kis, ka ba pʋ yɛti alaa, ka o zan'as, ka ye onɛ yɛlɛ, ka li anɛ sɔ'ɔ yɛlii tis o bɛɛ?

Ka li bɛɛ bɛ, li pʋ paae nwadisa atan'a, o saam on vɔn' o kpiya. Biig di’e o saami digil ka nidib la'as na, ka o yɛli ba ye, o daa pɔnɛ nɔɔri zi'el ka o saam nam voe ye, o saam ya'a ti kpi ka o pʋ kʋk o nɛ sian'anaaf iilɛ, ba kʋ mum oo, dinzugɔɔ, ba mɔdigim ka li sɔb ka o keŋ mɔɔgin n kʋ na ka ba kʋk o ka ba nyaan mum o.

Ka zaam ma'ae ka o yi mɔr ken n ti paae mɔɔg sʋʋgin sa, kpikpalig gbinnin zin'ikan ka sian'aniigi la gbɛɛnd la. O paae tiigin la zaŋi o duori ti'il tiig la ka dʋʋ agɔla ya'ae baanlim, ka li sɔbi yuug bi'ela ka o sin ka nan kpɛlim ya'ae baanlim.

O ti nyɛnɛ sian'anaaf onɛ mɔr iil yiuŋɔ paana nyɛ duor la ka bu'os tiig la ye, Kpardaana, anɔ'ɔnɛ ti'il duor la, ka Kpardaan ye onɛ ka ba buon o ye Apʋzɔtyɛl la, onɛ ti'il duor la, ka o ye, atɔ, ti zan'a na nyɛɛ Apʋzɔtyɛl mɛŋim zina, ka gaadi keŋ digin. Ka iila ayi daan paana nyɛ duor la ka bu'os illyiuŋdaan la ye illyiuŋdaana, anɔ'ɔnɛ ti'il duor la, ka illyiuŋdaan ye on bu'osi Kpardaan ka Kpardaan, ye Apʋzɔtyɛli ti'il duor la, ka o ye atɔ, ti zan' na nyɛɛ Apʋzɔtyɛl mɛŋim zina, ka mɛ gaadi keŋ digin.

Ba da kennɛ ala, ka onɛ paasi atan' kena bu'os ka digin, ka anaas-daan kena bu'os ka digin, ka nu-daan kena, ka ayuobu-daan kena, ka ayɔpɔi-daan kena, ka anii-daan kena, ka awai-daan kena, ka piiga-daan mɛ yuolim paana nyɛnɛ duori ti'i kpikpalig, ka o bu'osi, awai-daan, ye anɔ'ɔnɛ ti'il duor la? Ka awai-daan pin'ili kaan ye, mam bu'osi anii-daan, ka anii-daan bu'os ayɔpɔi-daan, ka ayɔpɔi-daan bu'osi ayuobu-daan. Ka ayuob-daan bu'osi anu daan, ka anu-daan bu'osi anaasi-daan, ka anaasi-daan bu’osi atan’-daan, ka atan’ bu’osi ayi-daan ka yi-bu’osi ayinne-daan ayinne-daan bu'os Kpardaan, ka Kpardaan ye Apʋzɔtyɛli n ti'il du'or la, ka o yɛl ye, atɔ, ti zan'a na nyɛɛ Apʋzɔtyɛl mɛŋim zina, ka gaadi ba wʋsa wʋsa teŋsʋkʋ digin gantalaam. Ka Apʋzɔtyɛl mɔdig ka ba wʋsa gbisi ma'ae ka ba sɔ'ɔ sɔ pʋ lɛn nɛi la ka o niŋ sigib-sigib n signa zaŋi o duor la n niank baanlim n kpɛn' niigi la sʋʋgin n nwɛ’ onɛ mɔr illa piiga la illa fʋki zaŋi zɔɔ kpɛn' mɔɔg ka niigi la wʋsa wʋsa va’ widig yaaŋ-yaaŋ, ka Apʋzctyɛl zɔɔ kpɛn mɔɔg, ka ba niŋo ieb pira mɔɔgin la maki gʋ’ʋŋ. Ka Apʋzɔtyɛl mɔr iila la zɔɔ paae yir ka li wʋm banɛ bɛ yin la, ka mɛ wʋm o hali. Ka ba yʋ’ʋn zaŋ iila la n kʋk o saam la ka nyaan mum o.

Ala zug ka ba ye, fʋ ya'a ye fʋ maal si'el ka fʋ saam pʋ siakɛ fʋn siakimɛ o nɔɔr, ka li ya'a ka’a alaa, o ya’a ti kpi, asɛɛ ka fʋ niŋi li bʋn ka li nyaan maalif sʋ’ʋŋa la, ka ya'a ka'a alaa li tun’e sa'amif, ka san'auŋ kan mɛ ka'a sʋ'ʋm.