Sɔlima: Asumbul Nɛ Akunduŋ
Asumbul nɛ Akunduŋ n da bɛ. Ka pu’asadir mɛ bɛ. Ka Asumbul kennɛ li'ad ka Akunduŋ mɛ kennɛ li'ad ka gbi'id taaba. Ka Asumbul ye on ya'a pʋ di pu’a laa, Akundʋŋ on buol o tampiinr, ka Akunduŋ mɛ ye on ya'a pʋ dii, Asumbul on mɛ buol o Babil.
Tɔ', ka Asumbul due keŋi o sabua la yiri yɛl o ye, o ku'am daam ka daam la daar ka o kɛ ka o sabua Akunduŋ kilim wief ka o ban' o n kena nuu o daam la ka o baŋ ye dau bɛ ka dau bɛ. Ka pu’a la lɛbis ye, Asumbul ya'am ma'a ya. Ka Asumbul ye, asida, ka pu’a la sid zi'el o daam la dabisir ka o lɛbi kul. Ka Asumbul paae tɛn'ɛs tat-tat-tat ka daam la saa na bɛ wʋʋ bɛug la, ka o zaŋ barigi nwaa-nwaa o nɔba ka li an bar-bar-bar. Ka niŋtaŋ-tisʋʋs ka o due kpɛ'ɛsi paae Akunduŋ yiri m pʋ’ʋs o, ka ye, Hmmmm! Ka Akunduŋ bu'os o ye bɔ? Ka o ye, fʋnɛɛ, mam nyɛnɛ diib zin'isia hali ka nɔbir kae paada, ka mam mɛ zi' mam na niŋ si'em ka ti nyaŋi paae diib laa. Ka Akunduŋ ye o da fabilɛ, ka diib ya'a bɛ, on mɛ bɛ. Ye on na kilim wief ka o ban' o ka ba keŋ di. Ka Asumbul ye, li na tu’al. Ka ye alaa, Akunduŋ bɔɔm wiedla'ad n ti'ebi o mɛŋ sʋ’ʋŋa ka bɛug sa'akʋdiisir saŋa ka o kena ka ba keŋ. Ka Akunduŋ lɛdigi bɔ, ga'ar, ku'ombaŋ, salibir, nɛ kiiba nɛ wiedkɔn nɛ la'ad wʋsa digil n guri Asumbul. Ka Asumbul mɛ kuli ti'ebi n pie o bana-piel tita'ar, nɛ kurlan nɛ ta'ada, nɛ o papafʋ nɛ o ligidi.
Ka bɛug sid nie ka li paae sa'akudiisir saŋa, ka Asumbul ti'ebi paae ka Akunduŋ mɛ ti'eb nɛ o wiedla'ad wʋsa. Akunduŋ igin nɛ naa, ka Asumbul ianki ban' ka ba mɔr ken nɛ ken n ti pɔnri ba sabua la yir la, n basi li kpɛla nɛ kpɛla, ka Akunduŋ mɛ yʋ'ʋm lik ye o mɔr o wa'anɛ ba sabua la yir ka ananiŋ si'em mɛ lɛm kae. Haya, ka Asumbul yu'um kuns o nɛ kiiba ka Akunduŋ dɛɛ paae bas nidib la kpɛla nɛ kpɛ, ka guoe, puun. Ka Asumbul lɛn dɛɛ o lɛb ka lɛbna, nɔɔra atan' ka kpɛlim dɛɛ o mɔri sig bɔn'ɔgin kpa'a o basi anina ka gaanli, gaanli lɛbna nuu o daam tigi o ya'amin ka li sɔb ka o mɔri o pu'a kul.
Ka Akunduŋ gbɛn bɔn'ɔgin la daba ayɔpɔi ka pʋ nu ku'om ka yɛtnɛ diibɔ. Lini aan Asibigi dɛn'ɛdi anina baba gat, ka pʋ'ʋs o, ka o buoli Asibig ka yɛl o ye, “Asumbuli tʋm man hali kali paae m, kpɛ'ɛŋimɛ fʋ mɛŋi n kena mua' nwiig la kɛnsigi tisi m.” Ka Asibig ye dʋnna nidib kae sʋ'ʋm, ye o ya'a sʋŋ o, ye on ka o na kʋ yiiga. Ka Akunduŋ pɔ' lini pʋ pɔɔda, ye o ya'a sʋŋ o, ye on, kʋlʋm kʋ mi'i tamm.
Ka Asibig sid sʋŋ o mua' kpa'ar la nɛ nwiig la sa'am ka Akunduŋ nyaan nyaŋi paam suor. Ka pʋ’ʋsi Asibig pamm, ka ye Asibig ya'a kul ka on mɛ kul, ka li niŋ daba ayi, on kena gɔs o, ka nyɛ on na maal o sʋm si'em ka nyaan baŋ on an si'em. Ka ba zan'a sid widi kuli ba yaani ba yaan. Ka li niŋ daba ayi, zi' ka Asumbul wʋmi Akunduŋɔ yɛli Asibig si'el la. Daar yinne ka o yeli o pu'a ye on na keŋ ma'a Akunduŋɔ di'e kpan'auŋ na ka ba ɔnb. Ka o pu'a la kad o gʋ'ʋŋ. Ka saa kʋʋd za-nɔɔr ka Asumbul n keŋi Akunduŋ yin ka o zin' i o zɔŋin ka li a biridi.
Ka Asumbul paae tiaki Asibig kʋkɔri n pʋ'ʋs ye, ya Kabiriya, ka ba siak ka bu'os ye, m zua Asibigi Kabiridaa? Ka Asumbul tiaki Asibig kʋkɔri lɛbis ye, ɛɛnn, o zua Asibigi n kabirid. Ka o tansi o pu’a ye o duom tɔ'ɔtɔ n dɔllo kpɛn' o dɔɔgin saa piis ka yadigi o sɔŋ-paal la n tis o ka o zin'in ka o kena n pʋ'ʋs o ka saa galisya. Ka o pu'a dɔl o kpɛn'ɛ o dɔɔgin la, ka Akunduŋ due kpɛn' bʋlʋʋgin n gban'ɛ kpan’auŋo kʋʋ tis o pu'a ka o di'e mɔnɛ tis o ka o di ka nya'al kpan'auŋ mum la suu o kɔlʋgin. Ka Akunduŋ nam pʋ baŋ ye li anɛ Asumbulɛ, ka yɛl o ye, o kpɛn'ɛmi o diem sa'an ka ba gbɛn'. Ka o sid dɔlli kpɛn'ɛ anina. Zi' ka Asumbul gbisi dadignɛ, ka bɛug nie o, ka Akunduŋ pu’a nyɛ ka li anɛ Asumbul ka ka'a Asibiga, ka o zɔ yi baanlim kpɛn'ɛ yɛli o sid ye, saan la sa anɛ Asumbul, fʋ data la, ka ka'a fʋ zua Asibiga.
On yɛl o la ka o kpɛlim due kpɛn'ɛ o pu'a dɔɔgin la baanlim n tipi-tipi ɔnbigo sʋ'ʋŋa n mɔri yina ye, Bʋnna anɛ man na nyu'e bugum lɔs o ka o kpi. ka Asumbul yel o ye, m sɛ-sɛɛ, m sɛ-sɛ, li gbin anɛ ye, o bɔɔdim la. Ka o yee, m na nwɛ'ɛ o nɛ kugir la ka o kpi, ka o lɛn ye – m sɛ-sɛɛ, m sɛ-sɛ, ka o gʋ'ʋŋ ka ye o na lɔs o nɛ mɛligim nwa ni.
Ani ka Asumbul ye, aain, ye o ba'a dua o daare, on kis si'eli la, o ya'a si'is si li, o kpɛlim kpinɛ nannanna, nannanna nwa, ka Akunduŋ tɛn'ɛs ye amɛŋa ka zaŋ o lɔb mɛliŋimin la ka o va fʋrib lɛb kpɛ, ka Akunduŋ bibig tɛŋ, ka o lɛn va fʋrib, ka Akunduŋ bibig tɛŋ. O niŋ nɛ ala ye o bibiga Asumbuli gʋ'ʋŋ ka o faaɛn zɔɔ paae yinɛ tu'asi o p’ua li wʋsa wʋsa ka kɛ ka ba yʋ'ʋn ɔnb kpan'auŋ mum la.
Lin ka ba ye Asumbul mɔr ya'am gat si'el wʋsa la.