Sɔlima: Asumbul nɛ Ayalsuŋ

Asumbul ya'an da bɛ ka daar yinnɛ ka o duoe zaamnɔɔre zaŋi o gɔŋʋ keŋ siind taabʋg. On paae tɛ'ɛgin la, ka nɔki o nu'ugu tʋm tiyɔkun la ka tɛ'ɛg la gban'e o nu'ug la, ka o bu'os ye. Anɔ'ɔnɛ gban'e m nu' ugɔ, ka li lɛbis ye, mana Ayulugum lɔb, ka o yɛl ye, o yulugum lɔb ka o gɔsɛɛ, ka tɛ'ɛg yulugu fuu bas puabpi, ka o duoe zɔɔ kuli yɛli o pu’a nɛ o biis.

On baŋi ala la, daar woo ka o ma'ad sian'ar bunkɔnbidi ken. O ya'a wa'ae la, o zaŋidnɛ piim banɛ mɔr yabidi m paae sɛɛli sɛɛl tɛ'ɛg la gbinin, ka ma'a o ka o dʋʋ tum tiyɔkun la ka tɛ'ɛg la gban'e o nu'ug. Ka o bu'os ye ano'ɔnɛ gban'e o nu'ugɔ, ka tɛ'ɛg la ye, onɛ Ayulugum lɔb. Ka o ye, alaa, o yulugum lɔb ka o gɔs. Ka tɛ'ɛg yulugu lɔb piima zug sagiliga ka o kpi ka Asumbul zaŋi kul ka on nɛ o pʋ'a nɛ o biis dʋgi ɔnb. on niŋidi ala, ka Ayalsʋŋ mɛ ti baŋ o yam la. 

Ka daar yinnɛ, ka o tum buoli Ayalsʋŋ ye o kena, ka ba keŋ zin'isi'a, ka yɛl o ye ba kem ka siind bɛ kpɛ taab. Ka Ayalsʋŋ ye atɔ, ye ba kem. Ban keŋ la, Asumbul ya'an zaŋi o piima la nɛ n paae sɛɛli-sɛɛl tɛ'ɛg la gbinin gilig, ka naam teŋin pa'ali Ayalsʋŋ tiyɔk la, ka ye o dʋm tʋmi anina n taab siind la na ka ba di, ka on lɛɛ zi'e teŋin. Ka Ayalsʋŋ dʋʋ nwɛ' pip-pip-pip-pip n gilig tiyɔk la ka ye mam pʋ nyɛɛ, mam pʋ nyɛɛ. Ka Asumbul tiesi bigis ka ye o gɔsim sʋ’ʋŋa. Ka Ayalsʋŋ lɛm niŋi ala nɔɔ, ka ye mam pʋ nyɛɛ, mam pʋ nyɛɛ. Ka Asumbul sʋnf pɛlig ka o tam piima la ka o sɛɛli-sɛɛl la yɛla, ka kpɛlim dʋʋ agɔla ye o pa'ali Ayalsʋŋ, on tiel nu'ug tiyɔkʋn la, nu'ug on fanrid li kpɛn' tiyɔkʋn la ka tɛ'ɛg gban'e. Saŋkan ka Asumbul yʋ'ʋn sunni gɔs piima la n sɛ tɛ'ɛg la gbinin la ka buoli Ayalsʋŋ yɛl o ye, o gɔsim tɛ'ɛg la gbin la n fʋosi-fʋos linnamɛ sɛ sabila-sabila la n lɔb lalli sa. Ka Ayalsʋŋ ma'a ianki nwɛ' pip-pip-pip-pip n gilig tiig la gbin wʋsa wʋsa ka yɛl Asumbul ye, ‘mam pʋ nyɛɛ, mam pʋ nyɛɛ’. Anina ka Asumbul nu'ug mun'oe ka o tansi tʋ' Ayalsʋŋ ye, zulammir, zupi'igilif, zubu'arʋg fʋ pʋ nyɛtaa? Fʋ pʋ nyɛ ban sɛɛ-sɛɛ ya?

Ka li yʋ'ʋn wʋmi Asumbulli galis ka o gʋ'ʋŋi bu'os baanlim ye, anɔ'ɔnɛ gban'e m nu'ugɔ? Ka tɛ'ɛg lɛbis ye, mana Ayulugum lɔb. Ka o lɛbi an baanlim, ka li nyaŋ o galis, ka o ye, atɔ', ka yulugum lɔb ka m gɔsɛɛ. Ka o yulug o fuu – piima zug sagiliga, daar sa ka Asumbul pʋn kpi.

Ka Ayalsʋŋ yɛl o ye, baaga nwa, ka mɛ pi'ig o n paae maal zɛɛnd ka on nɛ o pu’a nɛ o biis mɛ di.

Lin ka ba ye, fʋ ya'a su'a maal si’el, ba mɛ na su'a baŋ la.