Sɔlima: Pua' Paadif Nɛ

Akɔra da bɛɛ mɔr ligidi pamm ka Asumbul mɛ bɛ ka nɔŋ mɔr o. Daar yinne ka Asumbul isigi keŋi Akɔra yir ye o bɔɔdnɛ ligidi ye o pɛ'ɛŋ, ka Akɔra pʋ ki'isɛ ka pɛ'ɛŋ o ligidi la. Ka li yuug hali ka Asumbul pʋ yɔɔ, ka Akɔra sʋnf pɛlig ka o isigi keŋ Asumbul yin ye o bu'os o sam la. O paae ya ka li nam pʋ nie naae ka Asumbul nam pʋ yi gbɛɛmin naa ka o sɔnsig ka o yina n uungi o nindaa ka yina n pʋ'ʋs o ken-ken. Ka Akɔra yɛl o ye, o sam la ka o kena ye o di'e, ka o ye awoo, ka lɛɛ ye, amaa, on nam pʋ nyɛɛ, ye o kulim ka o lɛdigi ia ligidi la. Ka Akɔra ye, on kun la, o ya'a ti lɛb daasi'er na ka pʋ lɛm nyɛɛ, o mi on na niŋ o si'em, ka lɛbi kul, ka zi'el o ye daar o na leb na.

Ka bɛug nie Asumbil isigi zaŋ o zan'anɛ yii kpɛn' mɔɔgin niŋ ieeb tap n ti keŋ nyɛ ka kɔɔʋng kpii ɔdig ka nya'al kɔnba nɛ o iila ka li kpɛlim nan dig sʋga. Ka o kpɛ'ɛŋ o mɛŋi vaae li wʋsa wʋsa paae o samanin n maal sʋ'ʋŋaa digil.

Haya, ka daar la paae, ka Akɔra lɛn lɛb ye o bu'os o sam la yɛla. Ka Asumbul pʋn dɛŋi yina n dɛll o dala ni samanin, ka o sɔnsig ka Asumbul siak ka pʋ'ʋs o ye o kenken. Ka Akɔra siak ka nyɛ ka kɔɔʋng la kɔnba nɛ iila la dig la, ka o nan gi'ig ka pʋ bu'os o sam la. Ka Asumbul yʋ'ʋn pin'ili yɛti Akɔra ye, on di nɛ tiim, ka daa dii Akɔɔʋng sam ka o ken daar woo bu'osid o sam la yɛla, ka on sʋnf pɛlig, linɛ an on kpɛn yɛl o ye, Pua'  nannanna, nannanna nwa, ka o kpi ka o kɔnba nɛ o iila nwa dig la. Ka yɛli Akɔra ye o zin'i ala ka o kpɛn' zakin la'aŋ o tabaruk ka yina, ka o lɛdigi zin'i. On kpɛn' la'aŋ tabaruk la n nuti yi ti paae yaŋirin la ka taba fʋrigi kpɛn' o nɔɔrin ka o fʋoi tabaruk la nɔɔrin ka yit samanin la ka tʋbis taba la yis o nɔɔrin ye Pua' la, ka Akɔra tɛn'ɛs ye o tiim la la ka o ya'an niŋ, ka kpɛlim va' babab ka yɛl ye, Pua'  pʋ paadi ma, ye fʋ nyɛ ka m bu'os sam la nɛ bɛɛ? Ka Sumbul mɛ kpɛlim dɔl ka yɛt yee, Pua' paadifnɛ, ka on mɛ zɔt ka yɛt yee Pua' pʋ paadima. Ka kpɛlim zɔɔ kul ka pʋ lɛm lɛbi bu'os sam la ya'asɛ ka li kpi.

Lin ka ba ye Asumbul mɔr yam hali la.