Sɔlima: Yiwiaa Kul Kpi'im

Pu’asadire da bɛ an yiwiaa, ka dap bɛdegʋ kennɛ li'ad, ka o ye on nam pʋ nyɛ onɛ kpɛn' o ya'am, ye banɛ ken la wʋsa wʋsa anɛ balɛrid.

Daar yinne, ka kpi'im naan yaugin yina giligi sɔs saalim. O sɔs nɛ saalimɛn, nɛ ma'antirauŋ, nɛ tɛ'ɛg vaandin tua ba gɛndigi bʋlig o mɛŋi lɛbi saalim bɔl-bɔli vɛnl hali an dasaŋ pɔl, ka zaam ma'ae ka o keŋ yiwiaa la yir. On paae sɔnsig la, ka dap siak, ka pʋ’ʋs o ken-ken, ka o mɛ siak ka zin'in. Ka ba buol ye ba mɔr ku'om na tis saan, ka bipʋŋ la tʋʋg ku'om mɔri yina. On kʋlim yina n nyɛ dasaŋ la, o ya'am kpɛn' o nɛ, ka o pʋ'ʋs o ka tis o ku'om la ka lɛbi kpɛn’ yɛli o ma ye on nyɛɛ o sid zina, ye tiim kae on kʋlim dɔll o nɛ yʋ’ʋŋa kun ka li lɛn ka'a ye anwa nɛ nwaa.

Ka tua pulisi dʋg zɛnki'ima n mɔn sa'ab sʋ'ʋŋaa tis o ka o dii naae. Ka bipʋŋ la keŋ o sa'an ka ba sɔns sʋ'ʋŋaa, ka li ti siaki o kulig, ka o kɛɛs bipuŋ la ba'anam nɛ o manam la ka yi suorin.

Haya, ka bipʋŋ lɛdigi kan'asi o la'ad wʋsa ka kɛɛs yin la dim, ka yina dɔlli o sabua la ka ba kul. O yina, ka ba niŋ ken hap, n tʋʋg zuoya, nɛ kɔdaad pamm, ka bipʋŋ ti bu'os o ye, o yir la nam pʋ paae? Ka o lɛbis o ye, li kpɛlim bi'ela nwa. Ka ba keŋ tat-tat-tat n ti paae tɛ'ɛg gbin, ka tɛ’ɛg ye, m zua fʋn nyɛnɛ pu’aa? Ka o ye ɛɛn. Ka tɛ'ɛg ye, kɛl ka ti pʋdigɛ? Ka o ye, pu’a anɛ ma'anɛ pʋdigidaa? Ka tɛ'ɛg ye alaa  ta'am m saalim na, on kanlo o tis ya, ka kɛɛ anina wii. Ka ba lɛm keŋ bi'ela paae ma'antirauŋin ka o pʋ'ʋs o ka bu'os ye o nyɛnɛ pu’aa? K o ye ɛɛn, ka o ye, ka kɛl ka ti pʋdigɛ, ka o ye pu’a anɛ ma'anɛ  pʋdigidaa? Ka ma'antiraung ye, ka ta'am m saalim na, on kanlo o tis ya. Ka nya'al niŋ wii. Ka ba lɛn mɔr ken n paae saalimin, ka o mɛ pʋ’ʋs o, ka bu'os o ye, m zua fʋn nyɛnɛ pu’aa?  Ka o ye ɛɛn. Ka o ye, ka kɛl ka ti pʋdigɛ? Ka o ye, pu’a anɛ ma'anɛ pʋdigidaa?

Ka on mɛ ye, ka ta'am m saalim na, on kanlo n tis o, ka o nigbina wʋsa an wiii yʋ'ʋs.

Ka bipʋŋ ya'am iank ka o dɔl ka kaasid. Ka ba mɔr ken tat-tat-tat ti paae zin'nsi’a ka yaad yʋ'ʋn dig mar-mar-mar, ka o bʋŋi keŋ teŋsʋk la n fik yʋʋr ka da'ae bipʋŋɔ kpɛn'ɛs, ka o kum ka nini wʋsa mɔt hali, ka o pʋ siakidi ditta ka yʋ'ʋn budim. Bipʋŋ la bɛnɛ yaadin la ala yuma si'em sa, ka o ba'anam nɛ o manam iee o gʋ'ʋŋ, ka samanin niiŋ wʋm ka ti gɔɔn-gɔɔn kena nyɛe o, ka kuli kaasi kumis ka ba baŋ ka ia tat-tat-tat n ti kena baŋi o baba, ka zaŋ o mɔr o kuli ti'ebʋ ka o nyaan lieb nid ya'as.

Din ka ba ye, fʋ ya'a nan an pu’asadpɔl, ka nɛ'ɛsid dap, fʋ ya'a pʋ gu'usi fʋ mɛŋa, fʋ ya'a pʋ kul tiiga, ka pʋ kul kugirɛɛ, ka pʋ kul kpi'ima, fʋ ti ba'asidi kunnɛ bʋnyalimbʋn la.