Wina'am Gbauŋ:Nɔnaar Kʋdʋg:Hagai
Gbauŋ nwa' yɛla
[dɛmisim gbɛlima | dɛmisimi din yi zin'isiana]Ban da gban'e Jerusalem dimi keŋ Babilon ka ba ti lɛb na la, Hagai da mɔr Wina'am labaar la keŋ tisi ba. Ba da maligim mɛɛ ba ya' ka yʋ'ʋn mɔr kpan'am, amaa Wina'am Yir la da nan kpɛn anɛ dabɔɔd. Hagai labaar la da kpɛmis nidib la ka ba duoe maligim mɛ' Pʋ'ʋsim Yir la ka zun'od Wina'am ani. Wina'am na niŋi ba bareka ka o na'am pipilim pɛ'ɛl Pʋ'ʋsim Yir la.
Hagai 1
[dɛmisim gbɛlima | dɛmisimi din yi zin'isiana]Ban gban'e ye ba mɛ' Wina'am Pʋ'ʋsim Yir la
[dɛmisim gbɛlima | dɛmisimi din yi zin'isiana]1 Na'ab Darius na'am la yʋma ayi' saŋa, li nwadis ayuobʋ la dabisir yinne daar, ka Zugsɔb da pian' tis o nɔdi'es Hagai ka yɛl o ye o mɔɔlim tis Juda gɔmena Zerubabɛl, onɛ saamme an Sealtiel nɛ maanmaan kpɛɛm Josua, onɛ saamme an Jehozadak la
2 ye, “Zugsɔb Wina'am Paŋtita'ar Sɔb la yɛl ye, ‘Nimbama yɛt ye saŋa nam pʋ paae ye ba mɛ' Zugsɔb la Pʋ'ʋsim Yirɛ.’”
3 Ani ka Zugsɔb tis o nɔdi'es Hagai labaar ye o tisi ba ye,
4 “Saŋa nam pʋ paae, ka bɔ ka yanam mɛɛdi ya mɛŋ ya' sʋma, ka mam Yir lɛɛ kpɛlim dabɔɔgɔ?”
5 Nannanna Zugsɔb Wina'am Paŋtita'ar Sɔb la yɛl ye, “Maligin tɛn'ɛsi sʋ'ʋŋa!
6 Ya kuod bɛdegʋ ka lɛɛ bʋn fiin; ya dit ka pʋ tigida, ya nuud ka ku'onuud nam kpɛm mɔri ya; ya yɛɛd fuud ka waad kpɛm kpɛn'ɛdi ya; ya tʋmnɛ vaad yɔɔd ka li nwɛnɛ ya ligidi buoris la mɔri vɔnya ka li litnɛ.”
7 Zugsɔb Wina'am onɛ an Paŋtita'ar Sɔb la yɛl ye, “Maligin tɛn'ɛsi sʋ'ʋŋa!
8 Kemi zuoya la zuti nwa' daad na mɛɛ m Yir la ka li paae m ya'am ka m yʋ'ʋr paam girima.
9 Ya tɛn'ɛsid ye ya na paam bɛdegʋ, amaa gɔsima li anɛ fiin; yanamɛ mɔr si'eli kul na la, m kɛya ka sisi'em widigi li. Bɔzug ka li aan ala? M Pʋ'ʋsim Yir la an dabɔɔg ka yanam lɛɛ bɛɛ anina mɛɛdi ya mɛŋ ya' nɛ nimmua la zug.” Zugsɔb Wina'am onɛ an Paŋtita'ar Sɔb la pian'ʋkʋ la.
10 “Yanam zug ka saa pʋ lɛn niida ka zʋʋd mɛ pʋ lɛm maana.
11 Manɛ kɛ ka sawak bɛɛ ya pɔɔdin nɛ zuoya zut nɛ ya zʋʋd nɛ ya vain tiis nɛ ya kpaam tiis pɔɔdin wʋsa. Ka linɛ wʋsa ka ya kua la kʋ maalɛ, hali nɛ ya ninsaalib nɛ bʋnkɔnbid nɛ ya nu'ug tʋʋma wʋsa na an zaalim.”
Nidib la siak Wina'am nɔɔr la yɛla
[dɛmisim gbɛlima | dɛmisimi din yi zin'isiana]12 Ka Zerubabɛl onɛ an Sealtiel biig, nɛ Josua onɛ an Jehozadak biig ka an maanmaan kpɛɛm la, nɛ nidib la wʋsa da siaki ba Zugsɔb Wina'am la nɛ Wina'am nɔdi'es Hagai nɔɔr, bɔzugɔ ba Zugsɔb Wina'am la tʋm o ba san'an na; ka nidib la wʋsa mɛ zɔt Zugsɔb la.
13 Hagai onɛ an Zugsɔb tʋmtʋm la da mɔɔl Zugsɔb la labaari tis nidib la ye, “M na bɛ nɛ ya.” Zugsɔb la pian'ʋkʋ la.
14 Ka Zugsɔb da kpɛ'ɛŋ Zerubabɛl onɛ an Sealtiel biig ka an Juda gɔmena la sʋnf nɛ Josua onɛ an Jehozadak biig, ka an maanmaan kpɛɛm la, ka mɛ la'am kpɛ'ɛŋ nimbanɛ kpɛlim la wʋsa sʋnya. Ba da kena yʋ'ʋn pin'ili mɛɛdi ba Zugsɔb Wina'am onɛ an Paŋtita'ar Sɔb Pʋ'ʋsim Yir la. 15 Li da anɛ Na'ab Darius n da di na'am la yʋma ayi' la ni li nwadis ayuobʋ la dabpisi nɛ anaasi daar.
Hagai 2
[dɛmisim gbɛlima | dɛmisimi din yi zin'isiana]Wina'am Pʋ'ʋsim Yir la na paam girima si'em
[dɛmisim gbɛlima | dɛmisimi din yi zin'isiana]1 Li da anɛ nwadis ayɔpɔi la dabpisi nɛ yinne daar, ka Zugsɔb da lɛm pian' tis o nɔdi'es Hagai ka yɛl o ye,
2 “Tu'asim tis Zerubabɛl onɛ an Sealtiel biig ka an Juda gɔmena la, nɛ Josua onɛ an Jehozadak biig ka an maanmaan kpɛɛm la, nɛ nidib la wʋsa. Bu'osimi ba ye,
3 ‘Anɔ'ɔnɛ bɛɛ ya sʋʋgin kpɛla ka da nyɛɛm yikʋdʋg la vɛnlim an si'em? Ka nannanna yir la vɛnlim an wala? Li pʋ nwɛnɛ zaalim bɛɛ?
4 Amaa nannanna nwa' Zugsɔb la yɛt Zerubabɛl ye o kpɛmisimim o mɛŋi zi'en kiŋ-kiŋ, ka Josua onɛ an Jehozadak biig, ka an maanmaan kpɛɛm la nɛ nidib la wʋsa mɛ kpɛ'ɛŋi ba mɛŋ ka zi'en kiŋ-kiŋ ka tʋm ka m bɛ nɛ ya. Mam Zugsɔb Wina'am yɛl ala.
5 ‘Da zɔti dabiem, nɛ'ɛŋa anɛ nɔnaar kanɛ ka m da zi'eli tisi ya, yanamɛ da yi Egipt teŋin na la, ye m siig la na kpɛm bɛ nɛ ya.’
6 Zugsɔb onɛ an Paŋtita'ar Sɔb la yɛl si'em nwa' ye, ‘Li kʋ yuugɛ ka m na mi'im agɔl nɛ teŋgbauŋ wʋsa, lin yi Atɛukʋn hali ti paae zin'ikanɛ ka ku'om kae la wʋsa.
7 M na mi'im tɛɛns wʋsa nidib, ka kɛ ka ba mɔr la'asʋma linɛ kpɛn' ba ya'am la wʋsa kena tis yikaŋa ni, ka pɛ'ɛli li nɛ m girima.’ Zugsɔb Wina'am onɛ an Paŋtita'ar Sɔb la pian'ʋkʋ ala.
8 ‘Anzurifa la anɛ mam din, ka sanlima la mɛ an mam din.’ Zugsɔb onɛ an Paŋtita'ar Sɔb la pian'ʋkʋ la.
9 ‘Yipaal kaŋa na mɔr girima gaad yikʋdʋg la,’ man Zugsɔb onɛ an Paŋtita'ar Sɔb la yɛl ye, ‘M na kɛ ka sumalisim nɛ sumbʋgʋsʋm bɛ teŋin la.’ Zugsɔb onɛ an Paŋtita'ar Sɔb la pian'ʋkʋ la.”
Hagai nwɛ' maanmaannib sɔɔra
[dɛmisim gbɛlima | dɛmisimi din yi zin'isiana]10 Li da anɛ nwadis awai la dabpisi nɛ anaasi daar, Na'ab Darius n da dii o na'am la li yʋma ayi' saŋa, ka Zugsɔb la pian' tis o nɔdi'es Hagai ka yɛl o ye,
11 “Zugsɔb onɛ an Paŋtita'ar Sɔb la yɛl si'eli nwa' ye, ‘Bu'osim maanmaannib la ye wada la pʋʋgin yɛl ye bɔ?
12 Nid ya'a nɔk malʋŋ ni'im linɛ ka ba maali tis Zugsɔb ka li an kasi la pɔnbil o fuugin ka li si'is bodobodo, bɛɛ zɛɛnd, bɛɛ daam, bɛɛ kpaam, bɛɛ disi'a wʋsa, malʋŋ ni'im la na kɛ ka diib la lieb kasii?’” Ka maanmaannib la lɛbis o ye, “Ayei!”
13 Ka Hagai lɛm bu'os ye, “Ka nid ya'a si'is bʋnkpiilʋŋ ka li kɛ ka o lieb dian'ad sɔb, ka kena si'is la'abama, li pa'al ye la'ad la mɛ dian'anɛɛ?” Ka maanmaannib la lɛbis ye, “Ɛɛn, li lieb nɛ dian'ad.”
14 Anina ka Hagai lɛbis ye, “Ala ka Zugsɔb la yɛl ye, ‘Li anɛ ala tis nimbama, nɛ teŋgbauŋ la nɛ ban maal si'el wʋsa. Dinzugɔ, linɛ wʋsa ka ba tʋm bɛɛ maal anina anɛ dian'ad.
15 Tɛn'ɛsimi nɛ'ɛŋa yɛla sʋ'ʋŋa lin yi zinaa ken, lin daa an si'em tisi ya ka ya nyaan pin'ili ɛɛnb Zugsɔb Pʋ'ʋsim Yir la.
16 Ya sɔ' ya'a daa nyɛ ka zʋʋd dig dʋʋr, ka o tɛn'ɛs ye li ya'a vaae li na an bɔto pisi amaa ka vaae ka li an bɔto piiga. Ka nyɛ daam dʋk ka tɛn'ɛs ye ya na liie yʋya pisnu ka li an yʋya pisi ma'aa.
17 M kɛya ka sakuga nɛ ban'as san'ami ya zʋʋd linɛ ka ya kua la wʋsa; amaa la'an nɛ ala, ya pʋ tiaki ya sʋnya ka lɛb man san'an naa.’ Zugsɔb la pian'ʋkʋ la.
18 ‘Amaa lin yi zina, nwadis awai nwa' dabpisi nɛ anaasi daare mɔri ken la, tɛn'ɛsimi sʋ'ʋŋa; daakanɛ ka Zugsɔb Pʋ'ʋsim Yir la daa ɛɛnb la.
19 Diib lɛm bɛ bʋʋrinɛɛ? Lin yi saŋkan la keŋ paae zina, ya vain nɛ kekama tiis la pʋ wanna, pomanganɛt nɛ olif tiis la pʋ lɛn wanna. Lin yi zina wa'ae la m na niŋi ya wʋsa bareka.’”
Zugsɔb la zi'el nɔɔri tis Zerubabɛl si'em
[dɛmisim gbɛlima | dɛmisimi din yi zin'isiana]20 Ka Zugsɔb la lɛn yɛl Hagai nwadig la dabpisi nɛ anaasi daar ya'as, ye,
21 “Yɛlim Zerubabɛl onɛ an Juda dim gɔmena la ye, ‘M na mi'im agɔl nɛ teŋgbauŋ la wʋsa.
22 M na widig na'anam nɛ ba sʋ'ʋlim wʋsa paŋ. M na san'am teŋ zʋŋ dim na'am paŋ, nɛ ba tanp widi nɛ tɛrekonam. Ba na zabi kʋ taaba.’
23 Zugsɔb onɛ an Paŋtita'ar Sɔb la yɛl ye, ‘Daakan la m na zaŋ fʋn Zerubabɛl, onɛ an Sealtiel biig, ka aan m tʋmtʋm la kɛ ka fʋ liebi m zanbin linɛ aan m nu'ubil baŋ; bɔzugɔ, manɛ gaŋif.’ Zugsɔb la pian'ʋkʋ la.”