Wina'am Gbauŋ:Nɔnaar Kʋdʋg:Jona

Gbauŋ nwa' yɛla

Wina'am nɔdi'es Jona gbauŋ la bigisidnɛ dinɛ da maal o, on da mɔɔd ye o zan'as Wina'am yɛlʋg la. Jona da pʋ bɔɔd ye o mɔr Wina'am labaar la keŋ tu'as Ninive nidib la, bɔzugɔ ba da anɛ Israel dim dataas ka o mi' ye ba ya'a tiak ka yii ba tʋʋmbɛ'ɛdin la Wina'am kʋ tɛɛgi ba tʋbirɛ. Din nya'aŋ on keŋ pian' tisi ba la, ba sid da tiakya, ka Wina'am pʋ lɛn namisi ba. Ka Jona yʋ'ʋn nyɔn Wina'am. Wina'am da pa'al ye o ba'a bɛ nɛ dunia la wʋsa ka o bɔɔd ye ba tiak ka yi bɛ'ɛdin ka lɛb o san'an na, ka da nyɛ namisʋgɔ. O anɛ nɔŋilim nɛ nimbaanlzɔɔr Wina'am ka tʋm on bɔɔd si'em.

Jona 1

Jona zɔɔ yi Zugsɔb la san'an

1 Zugsɔb la pian'ʋk da kɛn Jona onɛ an Amitai biig la san'an na ye,

2 “Kem Ninive linɛ an teŋ tita'ar la nii mɔɔli tisi ba ye, ‘Man nyɛti ya tʋʋmbɛ'ɛd la wʋsa.’”

3† Amaa Jona da duoe zɔti ken Tarsis teŋin ye o zɔɔ yi ka bas Zugsɔb la. O da zɔɔ sig Joppa tempʋʋgin linɛ bɛ Atɛuk nɔɔrin la ka nyɛ anrʋŋ linɛ wa'ae Tarsis. Ka o yɔ ka kpɛn' ye o dɔlli ba keŋ Tarsis teŋin, dinɛ na kɛ ka o zɔɔ yi ka bas Zugsɔb la.

4 Ka Zugsɔb kɛ ka sisi'etita'ar kɛɛn Atɛukʋn la na. Sisi'em la da mɔri paŋ hali da'adi Atɛuk ku'om la ka anrʋŋ la bɔɔd ye li kɔ'.

5 Ka dabiem kpɛn' nimbanɛ tʋm anrʋŋ tʋʋma la ka sɔ' wʋsa nwɛ'ɛd kuŋi buon o win. Ka ba vaae anrʋŋ la la'adi lɔbi bas Atɛuk la pʋʋgin ye li faki tisi ba. Amaa ka Jona on gaadi sig anrʋŋ la teŋiri digi gbisid.

6 Ala ka anrʋŋ la kpɛɛm keŋ o san'anɛ bu'os o ye, “Bɔ ka fʋn digi gbisida? Duom ka buoli fʋ win, ka daasi'erɛ o na zɔɔ ti nimbaanlig ka faaɛn ti bas.”

7 Ka banɛ gɔsid anrʋŋ la yɛl taaba ye, “Kɛlli ka ti maal bʋgʋlʋm-bʋgʋlʋm baŋ onɛ zug ka yɛltɔɔg kaŋa paadi ti!” Ka ba maal bʋgʋlʋm-bʋgʋlʋm ka li gban'e Jona.

8 Ka ba bu'os o ye, “Yɛlimi ti, anɔ'ɔn zug ka yɛlbama nwa' paadi ti? Fʋ tʋʋma an bɔ? Fʋ yi yaanɛ? Fʋ teŋ yʋ'ʋrɛ? Fʋ an buudkanɛ nida?”

9 Ka o lɛbisi ba ye, “M anɛ Hibiru nid, ka pʋ'ʋsid Zugsɔb onɛ an Arezana Wina'am ka maal Atɛuk nɛ teŋgbauŋ la.”

10 Ka nɛ'ɛŋa kpɛn'ɛs nidib la dabiem pamm ka ba bu'os ye, “Bɔɔ nwa' ka fʋ niŋɛ?” (Nidib la da baŋ ye Zugsɔb la yɛla ka Jona zɔti yit o san'an, bɔzugɔ o pʋn yɛli ba nɛ ala.)

11 Ka Atɛuk la zan'as ka gudigid, ka ba bu'os o ye, “Ti na niŋif wala ka Atɛuk nwa' ma'ae tisi ti?”

12 Ka o lɛbisi ba ye, “Ʋkiminimɛ lɔbi bas Atɛuk la pʋʋgin ka li na ma'ae tisi ya. M mi' ye li anɛ m taal, linɛ kɛ ka pɛbistita'ar nwa' da'ad.” 13 Amaa nidib la da kpɛ'ɛŋidi ba mɛŋ ye ba mɔr anrʋŋ la lɛb gʋʋr ka pʋ nyaŋɛ, bɔzugɔ Atɛuk la maligim zan'as nɛ ka mɔɔd nɛ paŋ.

14 Ka ba nwɛ' kuŋi tis Zugsɔb la ye, “Zugsɔba, da kɛ ka ti kpi dau nwa' nyɔvʋr yɛlaa! Dau nwa' ya'a ka' taalɛ, da kɛ ka o ziim yɛla dɔlli tii, ka li anɛ fʋn Zugsɔb bɔɔdim ye li aan ala.”

15 Ka ba ʋk Jona lɔb o Atɛuk la pʋʋgin ka Atɛuk la nyaan lɛbi ma'ae baanlimm.

16 Nɛ'ɛŋa da kɛ ka dabiem kpɛn' nidib la, Zugsɔb la yɛla. Ka ba maal maannɛ tis Zugsɔb la, ka pɔɔ zi'el o.

17† Amaa Zugsɔb la da tʋm ziiŋ tita'ar na ka o vɔl Jona. Daba atan', yʋ'ʋŋ nɛ nintaŋ wʋsa, ka o bɛ ziiŋ la pʋʋgin.

Jona 2

Jona winsɔsʋg

1 Ka Jona naam ziiŋ la pʋʋgin ka sɔs Zugsɔb Wina'am ye,

2 “M yɛlpakir pʋʋgin ka m kaasi buol Zugsɔb la ka o wʋmi m sɔsʋg. Yaʋg pʋʋgin ka m buol ye fʋ sʋŋim, ka fʋ wʋmi m kaasig.

3 Fʋ nɔkimi lɔb Atɛuk ku'ozuluŋin pʋʋgin, zin'ikan ka ku'onwiis la giligim ka ku'opila la pilim.

4 Ka m tɛn'ɛs ye fʋ kadim nɛ yisi fʋ san'an, amaa m na lɛn gɔsi kpa' fʋ Pʋ'ʋsim Yir kanɛ an kasi la.

5 Ku'om la paae m niŋgɔɔnr bɛn, ka m sim ku'ozuluŋin ka kɔlgʋʋma vili m zug.

2 M sim nɛ sigi paae zuoya teŋir. Ka teŋ la yɔɔ m, saŋa linɛ ka' bɛnnɛ, Amaa, m Zugsɔb Wina'am, Fʋ yisi m nyɔvʋr bʋmbɔkin la na.

3 Zugsɔba, din daa kpɛlim bi'ela ka m kpi la, M daa tiɛn fʋ yɛla; Ka m winsɔsʋg dʋ fʋ san'an na; Ti paae fʋ Yikanɛ an Kasi pʋʋgin.

4 Banɛ dɔl bada dinɛ ka' nyɔɔd la kɔ'ɔŋ yɛlsʋm linɛ aan ba din la.

5 Amaa mam na yʋ'ʋm bareka pʋ'ʋsʋg yʋʋma, Ka maal maannɛ tisif. Mam pɔ nɔɔri zi'el si'em la, Ka sid na maali li.

Faangir yit nɛ Zugsɔb la san'an na.”

6 Ka Zugsɔb la kɛ ka ziiŋ la tin Jona basi Atɛuk la gbɛog.

7 Zugsɔba, din daa kpɛlim bi'ela ka m kpi la, M daa tiɛn fʋ yɛla; Ka m winsɔsʋg dʋ fʋ san'an na; Ti paae fʋ Yikanɛ an Kasi pʋʋgin.

8 Banɛ dɔl bada dinɛ ka' nyɔɔd la kɔ'ɔŋ yɛlsʋm linɛ aan ba din la.

9 Amaa mam na yʋ'ʋm bareka pʋ'ʋsʋg yʋʋma, Ka maal maannɛ tisif. Mam pɔ nɔɔri zi'el si'em la, Ka sid na maali li. Faangir yit nɛ Zugsɔb la san'an na.”

10 Ka Zugsɔb la kɛ ka ziiŋ la tin Jona basi Atɛuk la gbɛog.

Jona 3

Jona keŋ Ninive

1 Zugsɔb la pian'ʋk da kɛn Jona san'an na ya'as

2 ye, “Kem Ninive teŋ tita'ar la nii mɔɔl labakan ka m tisif la.”

3 Jona yʋ'ʋn da siak Zugsɔb la nɔɔr ka keŋ Ninive. Ninive da anɛ teŋ tita'ar, ka li na nɔk wʋʋ daba atan' ka nid na keŋ paae li bɛn.

4 Dabismum ka Jona zaŋi tu'as labaar la ye, “Li kpɛlim dabpisnaasi ma'aa ka Ninive na san'am.”

5† Ninive dim la da niŋ Wina'am yadda. Ka sɔ' wʋsa lɔ nɔɔr. Ba biis nɛ ba kpɛɛmnam wʋsa, ka ba yɛ bɔto fuud linɛ pa'an ye ba tiakya.

6 Ninive Na'ab la da wʋm labaar la, o duoe o na'am gbauŋ zug ka yɛɛg o na'am kparib ka yɛ bɔto fuugʋ zin' tampɛligimin ye o pa'al o sʋnfʋ san'am si'em ban tʋm tʋʋmbɛ'ɛd la zug.

7 O da tʋm ye ba mɔɔli tis Ninive teŋ dim wʋsa ye, “Na'ab nɛ o na'ayikpɛm kʋkɔri nwa' ye, ninsaalib nɛ niigi nɛ pɛ'ɛs nɛ bʋʋs, lɔɔm nɔɔr; da kɛ ka ba ɔnb bɛɛ nuu.

8 Amaa kɛl ka nidib nɛ bʋnkɔnbid wʋsa yɛ bɔto fuud. Kɛl ka sɔ' wʋsa sɔs Wina'am nɛ nimmua. Kɛl ka sɔ' wʋsa bas o tʋʋmbɛ'ɛd nɛ bugusim itʋŋ.

9 Ka daasi'erɛɛ, Wina'am na zɔɔ ti nimbaanlig ka dii ti suguru, ka o sʋnf lu ka ti da bɔdigɛ.”

10† Wina'am da nyɛ ban niŋ si'em la, nɛ ban tiak ka basi ba tʋʋmbɛ'ɛd la, o da zɔɔ ba nimbaanlig ka pʋ kɛ ka san'auŋ la kena wʋʋ on dɛŋi gban'e si'em la.

Jona 4

Jona sʋnfʋ duoe la yɛla

1 Amaa Jona sʋnf da san'amnɛ hali ka o gɛn',

2 ka sɔs Zugsɔb ye, “Zugsɔba, ka' man daa pʋn bɛ yin ka yɛl si'em la nwaa? Nwa' zug ka m daa zɔti wa'ae Tarsis teŋin la. M pʋn mi' fʋ yɛla, ye fʋ anɛ Wina'am kanɛ zɔt nimbaanlig ka dit suguru, fʋ sʋʋnr pʋ duod tɔ'ɔtɔɔ, ka fʋ nɔŋilim bɛ saŋa wʋsa; fʋ anɛ Wina'am onɛ pʋ bɔɔd ye fʋ san'am nida.

3 Alazug Zugsɔba, di'emi m nyɔvʋr, bɔzugɔ, m kum sɔn'oe m vʋm!”

4 Amaa Zugsɔb la lɛbis ye, “Fʋ mɔr suor kanɛ ka fʋ sʋʋnr na pɛligɛɛ?”

5 Ka Jona yʋ'ʋn yi kpikpɛŋ, teŋ la ya-nya'aŋi ti' sʋgʋri zin' ani gur ye o gɔs linɛ na maal teŋ la.

6 Ka Zugsɔb Wina'am kɛ ka tuŋ yii nɔbigi lus sʋgʋr la tis Jona ma'asim. Ka o niŋgbina ma'ae ka o sʋnf ma'ae tuŋ la yɛla.

7 Amaa bɛogʋ nie la ka Wina'am kɛ ka zʋnzʋnr kena ɔnb tuŋ la nya'a ka li zɛndigi kʋdig.

8 Ka nintaŋ dʋ ka Wina'am kɛ ka sisi'etʋʋlʋg yi ya-nya'aŋ na da'ad, ka nintaŋ tʋʋlʋg nwɛ' Jona zupaasʋʋg, ka o ligi bɔɔd kum, ka yɛl ye, “M ya'a kpi li sɔn'oe mam vʋe nwa'!”

9 Amaa Wina'am yɛl Jona ye, “Fʋ mɔr suor, ka fʋ gɛn' tuŋ la kum yɛlaa?” Ka o lɛbis ye, “Ɛɛn m mɔr suor, m sʋnf pɛlig nɛ hali ka li siak mam na kpi.”

10 Amaa ka Zugsɔb lɛbis ye, “Tuŋ la yɛla pakif hali, la'an nɛ fʋn pʋ bʋdi li ka mɛ pʋ gɔsi li ka li nɔbig la. Li yinɛ nɔbig yʋ'ʋŋ yinne ka lɛn kpi yʋ'ʋŋ yinne.

11 Amaa Ninive teŋ la mɔr nidib ka li gat tusa kɔbiga nɛ pisi banɛ zi' ba datiuŋ nɛ ba dagɔbʋgɔ, hali la'an nɛ niigi. Li pʋ sʋm ye man kɛ ka teŋ tita'ar kaŋa yɛla paki maa?”