Wina'am Gbauŋ:Nɔnaar Kʋdʋg:Malakai
Gbauŋ nwa' yɛla
[dɛmisim gbɛlima | dɛmisimi din yi zin'isiana]Jerusalem nidibi da yi Babilon teŋin lɛb na maligim mɛ' Pʋ'ʋsim Yir la, ka Malakai mɔr Wina'am labaar na tisi ba. Saŋkan la, nidib la da pʋ lɛn dɔl Wina'am suor la tituaa nɛ. Malakai da kpɛmis nidib la ye ba lɛm na pʋ'ʋs Wina'am nɛ sida ka bɛ bɛllim linɛ dɔl o pa'ala la. O da yɛli ba ye Wina'am na kadi ba saria amaa o na lɛn zɔɔ ba nimbaanlig ka maali ba nyain. O na tʋm o tʋmtʋm ka o maal suor ka o nyaan kena (3:1) ka banɛ niŋ o yadda la, o na niŋi ba bareka.
Malakai 1
[dɛmisim gbɛlima | dɛmisimi din yi zin'isiana]1 Zugsɔb la labaar linɛ ka o tis Malakai ye o tis Israel dim la nwa'.
Zugsɔb la nɔŋ Israel dim si'em
[dɛmisim gbɛlima | dɛmisimi din yi zin'isiana]2 Zugsɔb la yɛl ye, “M nɔŋi ya. “Amaa ka ya bu'os ye, ‘Fʋ nɔŋi ti wala-wala?’” Zugsɔb la yɛl ye, “Esau da ka'anɛ Jakob ba'abiigaa? La'an nɛ wala, m da nɔŋ Jakob,
3 amaa Esau ka m kis, ka san'am o teŋ linɛ bɛ zuoya ni la, ka kɛ ka o faar la lieb wɛog bʋnkɔnbid zin'ig.”
4 Esau yaas banɛ an Edom dim la ya'a yɛl ye, “La'an nɛ ban san'ami ti teŋ la, ti na maligim mɛ' dabɔɔd la.” Zugsɔb Onɛ an Paŋtita'ar Sɔb la na yɛl si'eli nwa' ye, “La'an nɛ ban na mɛ' la, m na nwa'ae li bas. Ba na buonnɛ ba ye Nimbɛ'ɛdnam Teŋ, nimbanɛ ka Zugsɔb la sʋnpɛɛn bɛɛ ba zugin saŋa wʋsa.
5 Ya na nyɛɛ li nɛ ya mɛŋ nini ka yɛl ye, ‘Zugsɔb la paŋ zu'oya hali o kpi'euŋ la tʋʋg Israel titɔndis la bɛn!’”
Maan linɛ mɔr gba'ar yɛla
[dɛmisim gbɛlima | dɛmisimi din yi zin'isiana]6 Zugsɔb onɛ an Paŋtita'ar Sɔb la yɛl ye, “Biig na'asid o ba', ka tʋmtʋm na'asid o zugdaan. Amaa man onɛ ka ba buon ye ba ba' la, na'asi kanɛ nar ye ba tisim la bɛ ya? M ya'a aan ba zugdaana, wɔ'ɔgir kanɛ nar ye m di'e la bɛ ya? “Li anɛ yanam maanmaannib la nɛ'ɛsidi m yʋ'ʋr la. “Amaa ya bu'osid ye, ‘Ti nɛ'ɛsi fʋ yʋ'ʋr wala-wala?’
7 “Li anɛ yanamɛ mɔr diib linɛ an dian'adi pa'annɛ m maan daka zug la yɛla. “Amaa ya bu'osid ye, ‘Li niŋ wala ka ti maalif dian'ad sɔba?’ “Li anɛ yanamɛ pʋ nannɛ m maan daka la, ka mɔr linɛ ka' sʋm maan maana la.
8 Ya ya'a mɔr bʋnkɔnbid banɛ zu'om kena maan maana, lin ka'anɛ bɛ'ɛdɛɛ? Ka ya ya'a nɔk bʋnkɔnbwabir bɛɛ bʋnkɔnbkanɛ bɛn'ɛda, lin ka'anɛ bɛ'ɛdɛɛ? Mɔrini li keŋ tisi ya Gɔmena la, ka gɔs ye o sʋnf na malis nɛ yaa? O na di'e lii?” Zugsɔb Onɛ an Paŋtita'ar Sɔb la bu'osid.
9 Zugsɔb onɛ an Paŋtita'ar Sɔb yɛl ye; “Nannanna yanam banɛ an maanmaannib la mɔr piinbama buudi ken Zugsɔb la san'an sɔsid ye o sʋŋi ti la, ya gɔs ka o na di'e lii?
10 “M naan bɔɔdin ye ya yinne yɔɔn Pʋ'ʋsim Yir la za'anɔya, ka ya kʋ lɛm mɔr piinyaalis la nyu'odi m bimbim la zugɔ! M sʋnf pʋ malis nɛ yaa.” Zugsɔb Onɛ an Paŋtita'ar Sɔb la pian'. “M kʋ di'e piini linɛ bɛɛ ya nu'usin la.
11 Man yʋ'ʋr la na anɛ yʋ'ʋtita'ar tɛɛns wʋsa sʋʋgin, lin yi winnigi tansid zin'isi'a paae winnigi lit zin'isi'a la. Zin'ig wʋsa ba mɔr bʋnnyubisa nɛ maan sʋma linɛ an nyain kenna man yʋ'ʋr zug, bɔzugɔ man yʋ'ʋr anɛ yʋ'ʋtita'ar tɛɛns wʋsa sʋʋgin.” Zugsɔb onɛ an Paŋtita'ar Sɔb la pian'.
12 “Amaa ya san'amidi m yʋ'ʋr maana la zin'igin, ka ziemi li, ka yɛt ye, ‘li ka' gbinnɛ.’
13 Ya yɛt ye, ‘Nwa' anɛ zitita'ar!’ Ka naki ya nyɔnya nɛ'ɛsidi li.” Zugsɔb onɛ an Paŋtita'ar Sɔb la pian'. Zugsɔb la yɛl ye, “Ya mɔri bʋnkɔnbid banɛ pu'alim nɛ waba nɛ bʋnkɔnbid banɛ ka wiim mɔri ba kena maal maana, ya tɛn'ɛs ye mam na di'e lii?”
14 Zugsɔb onɛ an Paŋtita'ar Sɔb la yɛl ye, “Nɔpɔɔr bɛ onɛ wʋsa gaŋ bʋnkɔnbraug o bʋnkɔnbid sʋʋgin, ka zi'el nɔɔr ye o tis Zugsɔb la, ka filimmi li ya'as. M anɛ Na'atita'ar, ka nimbanɛ bɛ tɛɛns la wʋsa ni zɔti m yʋ'ʋr la.”