Wina'am Na Paas Mɔɔg

Wina'am Na Paas Mɔɔg: anɛ Kusaal sɔlʋŋ kanɛ pianꞌad daʋ zʋnzɔŋ nɛ o dakɔɔnr yaꞌam daan sɔꞌ yɛla. Sɔlʋŋ la pianꞌandɛ bigisid daʋ la nɛ o la nɛ da pʋ mɔr siꞌela, hali laꞌam kɔꞌɔŋ pʋꞌa onɛ na maal diibi tisi ba siꞌem, amaa ban da mɔr nɔɔr yinne ka siakid taaba pianꞌad nɛ saꞌala la yɛla da kɛ ka Winaꞌam barigi ba ka ba ti kena lieb kpanꞌas gaad sɔꞌ wʋsa ba teŋin la. Sɔlʋŋ la paꞌal ye, daʋ la pʋꞌa da kpinɛ ka bas on nɛ o dakɔɔnr la maꞌaa. Ba da mɔrnɛ naꞌadagɔɔbir yinne maꞌaa ka Winaꞌam nɛ kpiꞌim dɔlis naꞌagɔɔbir yinne la ni piꞌeli ba nuꞌus nɛ kpanꞌam. Sɔlʋŋ la pʋtɛnꞌɛr anɛ di paꞌal nɔɔr yinne paŋ nɛ tʋmmir nɛ an siꞌem. Ala ka Winaꞌam gbaʋŋ yɛl ye, ba'abiis ya'a la'as taaba bɛ nɛ nɔɔr yinne, li anɛ sʋꞌŋa ka malisi galis la. Di ye li nwɛnnɛ malʋŋ kpaam linɛ ka ba bu'od niŋin Aaron zugin, ka li buoɛndi sigid o tieŋin, hali ti paadi o fuug nɔgbannin siꞌem, ka lɛn nwɛn wʋʋ Hemon zuorin mɛligim nɛ lit Zion Zuorin si'em la. Di ye, ani ka Zugsɔb la tisidi O albarika, hali nɛ vʋm linɛ bɛ saŋa linɛ kae naarɛ. Daʋ kaŋa nɛ o dakɔɔnr la vʋm bɛllim da paꞌal ye, yɛlʋg kaŋa anɛ amɛŋa. Sɔlʋŋ la bɛ teŋin la.

Daʋ zʋnzɔŋi da bɛ, ka o pʋꞌa kpi ka bas o ka on nɛ o dakɔɔnr yinne kpɛlim. Ban da kpɛlim la, ba sɔ'ɔsɔꞌ da pʋ mɔr pʋ'a, ka lɛɛ mɔr na'aratita'agɔɔbir yinne maꞌaa. Daar yinne ka biig la gɔs kii, ka buol ye, m ba'a, ka o saam la siak, ka o yɛl o ye, nannana, m mi'i ye fʋ anɛ m saam ka mam mɛ aan fʋ biig, amaa kɛl ka ti zaŋi ti na'ayimmir la kuosi tiak da' na'anya'aŋi bas ka daasieri o na ti dua ka li nɔbig ka ti nyɛ nyɔɔdi suŋi ti mɛŋ nɛ ti bɛllim. O saam la da pʋ ki'isɛ ka yɛl ye, m biiga, m pʋ kiꞌisi fʋ nɔɔrɛ, zaŋim naaf la giligi kuos. Amaa, mam bɔɔd si'el anɛ ye, onɛ da'a naaf la si'em sa ka pʋ yɛl ye, Wina'am na paasɛ, fʋn da di'e. Amaa, ka onɛ da' naaf la hali baa nɛ siꞌem wʋsa ka yɛl ye Wina'am na paas, fʋn di'em na ka Win'am sid na paas.

Haya, ka biig la zaŋ naaf la duoe mɔr gilib tat-tat-tat ɛɛnti paae lɔsi'a, ka ba da' yɔn pisi nɛ zak-zak ka pʋ tiɛn yɛl ye Win na paasɛ, ka o mɔŋi ba. O da ɛɛnti paae zinꞌisieba ka sieba tis na'asa'as hali ka pɛ'ɛs ligidi ka pʋ yɛl ye Win na paasɛ, ka o mɔŋi ba.

Biig la ti yuolim nɛ paae sɔ' yin, ka daʋ sɔꞌ nɛ o dakɔɔnr zin'i samanin zaam nɔɔr ka o paae na ye o kuosidi o naaf la nɛ, ka biig la ye o saam da'am, ka o saam la ye o ka'a ligidi na da'a. Ka biig la yɛli o saam la ye, ka ka'a mɔɔdi la ka o kia ti'ili-ti'il la? Ye o ti'igim mɔbɔbin yinne da' naaf la ka Win'am na paas, ka o saam la la‘ ka ye, ba mɔr mɔbɔbin yinne daꞌad naafɔ? Ani ka naaf sɔb la yɛl ye, ɛnhɛɛn, ye on saam paꞌa yɛl o nɛ ye, onɛ wʋsa ti da' naaf la ka tien yɛl ye Wina'am na paas, on tisim o sɔb naaf la ka Wina'am sid na paas. Dinzugo, ba mɔr mɔbɔbin la na ka on na tisi ba naaf la.

Ani ka ba nɔk mɔbɔbin la na ka biig la diꞌe ka zaŋ naaf la n tisi ba. On da di'e o mɔbɔbin la ka pʋꞌʋsi ba sʋ‘ʋŋa ka di'e o yisuor nɛ o mɔbɔbini kullɛ. On da ti yɔi yir la, ka saa kʋ fʋkid ilililiil, ka li mɛ an sisɔb paal, ka o paae samanin na, nɛ mɔɔg la lɔb zɔŋ za'anɔraugun, n tud zɔŋin ka kpɛlim zɔɔ dɔl yaŋirini kpɛn' zakin ye o bian'as la'ad ka naan yina pʋ'ʋs o saam la on pa‘a kpɛlim si'em. Ziꞌi ka on tud mɔɔg la zɔŋin la, o saam la pʋ baŋɛ, ka biig la nɛ nam bɛ zakin la n bian'asid la'ad ka saa la mɛ fʋkid la, ka waad mɔri o saam la ka o babin zɔŋin la ied sa'ad ye o nwɛ' kɛnbiri nyu'ue bugum, o saam la da babin zɔŋin la ied sa'ad ye o nyu'ue bugum oos la, o da babili keŋ nyɛ mɔbɔbin la digi ka zi' onɛ digili lii. Ani ka o ba'aŋi fʋoe bi'ela n kɔ-kɔɔe n nwɛꞌ kɛnbir la, on usig ka bugum la niŋ pillimm sansi'a la, ka o nini la mɛ kpɛlim lak nie nyain ka o nyɛt fasi. O biig la naam zakin yina la ka li malisi o saam la pamm ka o saam la kpɛlim bu'os o ye, ka anɔ'ɔnɛ zi mɔbɔbin la na digil ka man yisi la'aŋ bugum ye m ɔɔs waad ka m nini lakɛ? Ani ka biig la pʋꞌʋs o, on pa‘a kpɛlim si'em ka zaŋ lin niŋ si'em wʋsa n tu'as tisi o, ka li maligim ma'ae ba wʋsa sunya gaadi ala.

Li da pʋ nie bɛugɔ ka nidib pamm wum labaar ye yin la dim mɔr Wina'am na paas mɔɔg ka fʋ ya'a a zʋnzɔŋ ka die li bi'ela nyu'ue ka li la'aŋ fʋ nini kɔ‘ɔŋ na lak nie nyain ka fʋ nyɛt su'uŋa. Di da anɛ ala ka zu'omnam yit kateŋ-kateŋi n kenna di'esid mɔɔg la. Asida, zu'om wʋsa ya'a da kena, o yisidnɛ mɔɔd la bi'ela n tuanki tis o ka saae o naaf. O sɔb ya'a sid mɔri paae yin niŋ bugum usig ka li ti la'aŋ bugum pielim pillimm la, ka o nini mɛ kpɛlim nie nyain ka o sɔb nyɛt su'uŋa. Li da niŋidnɛ ala ka zu'omnam banɛ keŋi o sa'an la wʋsa mɔr naaf, naaf na tisid daʋ la nɛ o dakɔɔnr la ka diꞌesid Winaꞌam na paas mɔɔg la tiꞌebidi ba mɛŋ. Daʋ la nɛ o dakɔɔnr la da zaŋnɛ naaf yinne la maꞌaa kuos tis ka diꞌe mɔbɔbin yinne, amaa ka da yʋꞌʋn panr hali n lieb arazak dim bɛ teŋ la pʋʋgin.

Lin ka ba ye, ya ya'a la'asi bɛ yin ka siakid taaba nɔɔr, ka ya fara bɛɛ namisug pʋn tun'e ka zu'oe si'em wʋsa, bɛog sa, ya saa na paami ya mɛŋ ka ya sunya ma'ae la.