Zaari

Bigisig

Zaari anɛ teŋbili bɛ Garu sʋ'ʋlim ni, ka li baŋir da naam nɛ yʋʋmʋ kɔbiga nɛ nyaáŋ kanɛ gaad la. Li anɛ minti pistan' (30) ken fʋ ya'a ban'ad nɛ moto. Zaari mɔr da'. Teŋ banɛ bɛ kuam- kuam la kpɛn'ɛd da' la. zaanr, woo ban buon siém la bɛnɛ ya-dagɔbʋg fʋ ya'a bɛ Garu. Buudi kɔn'ɔb kɔn'ɔb bɛ teŋin la. Buudi nam la sieba anɛ Nabidnam, Mɔɔs, nɛ kusa dɔsieba dim. Teŋin dim la anɛ kpikpira dimi an Bimoba buudi la.Buudi nam la dit taaba. Ba mɛ lɛm la'asidi maan nɛ ba buudi malmanam li saŋa ya'a ye ti paae. Malim ban anɛ Samanpiid (kusaas malima), Daanjuar (Bimoba malima). Lin zug ka saan ya'a keŋ Zaanr teŋin, o ye tɛn'ɛs ye nidib la wʋsa anɛ buudi yimmir.

Zaanr nidib tʋm tʋʋma kɔn'ɔb-kɔn'ɔb. Bam anɛ gɔbina tʋmtʋmnib woo nɛɛsnam nɛ pa'annib, ka sieba tʋm DC ɔffisin, bam mɛ tʋm nɛ ba mɛŋ tʋʋma woo ziŋgban'adib nɛ da' dittib. Amaa nidib la bɛdigʋ tʋm nɛ kuob tʋʋma (kpaadib). Ba kuod nwi' bɛŋa sunwaangɛ kawɛnna, ki nɛ zɛɛndnam woo toosi, nanzʋ'ʋs nɛ zɛnma'asa nam. Ba mɛ lɛn gʋ'ʋn bʋnkɔnbid-niigi nɛ pɛ'ɛs nɛ bʋʋs nɛ nɔɔs nɛ bʋmʋs nɛ dɛɛs wʋsa.

Teŋ la yʋ'ʋr la naam si'em

Teŋindim (kpikpira dim la) an bimoba dɔɔg buudi la, ba yaan-yi da yit nɛ fanriŋ (Togo) teŋgbaʋŋ nɛ o sʋnzuop sieba n ken sʋ'ʋlimin la tɔn'ɔsid, li da anɛ sinár yʋʋm ban la. Ba da tɔn'ɔsid zin'isieba mɛ paas. Ba ya'a da ye tɔn'ɔsi si'al, ba da ye lɛb nɛ kul fanriŋ. Ka ya'a ti lɛm ken tɔn'ɔsʋg ya'as, ba da ye ti la'as nɛ zin'i kanɛ ka ba wʋsa ya'am gban'ae ka ku'om nɛ vʋ'ʋsim zin'ig bɛ la gur taaba. Ba zi'enig zin'ig la da an sʋm tisi ba la zug, ba da lɛbi yɛli ba sʋnzuop banɛ da ye kpɛlimi ba yaan la ka dɔlli ba sieba keŋ ka ba bɛ zin'igin la ka tɔn'ɔsidi ta'asid yin. Ala, bi'el bi'el, ka ba kpɛlimi ba zi'enʋg zin'igin la. li niŋ nɛ ala ka banɛ wʋsa keŋ ye ba kaae ba ye kpɛlim ba sanán zin'ig la malisim yɛla m ti paae zina nwa. li niŋ nɛ ala ka teŋ la yʋ'ʋr buon Zaanr, (ti zaa ziig) kanɛ an ye, ti zi'enig zin'ig kʋsaallin.