Ziim Dol Duam

Duꞌam dɔl ziim

Daʋ sɔꞌ da bɛ ka mɔr o puꞌa ka o puꞌa la ti kpi ka bas biribiŋ. Ka biig la ti kena nɔbig siak puꞌa diib. Biig la da keŋ ti nyɛ sɔꞌ yir puꞌasadir ka liꞌa o ka ba nɔɔr zimis taaba ka o di o kul yin na. saŋa siꞌa da kena ka banꞌa gbanꞌe biribiŋ la saam ka o bɛnꞌɛd ka pʋ lɛn tʋnꞌe duod agɔl yaꞌasa, amaa ka dig dɔɔgin maꞌa. Ka daar yinne ka biig la puꞌa yɛl o sid la ye, o saam la sandigim bɛnꞌɛd ti paae siꞌem bɛɛnna asɛɛ ka o yiis o ka kɛ ban babayiꞌ la maꞌa ka ba bɛ, o yaꞌa lɛm bɔɔd o saam la gaad on puꞌa la asɛɛ ka on kanɛ an puꞌa la yaꞌa lɛb o baꞌ yin ka kɛɛ o ka on nɛ o saam la laꞌasim bɛ. Haya, ka dasaŋ la sid da bɔɔd o puꞌa la hali ka yɛl o puꞌa la ye o nɛɛm zɔꞌɔm, ka o sid nɛɛm zɔꞌɔm la yina niŋ laan ka gbinꞌe kuꞌom lie ganꞌarin. Ka nɔk gɛla atanꞌ paas keŋ tat-tat ti paae zinꞌisiꞌa ka ye ba ye zunꞌusi kuꞌosid gɛla ka lɔb gɛl yinne bas ka zunꞌus yina gɔmm, ka o ye li nam pʋ paae. Ka lɛn keŋ ala ti paae sianꞌatisʋʋs ka lɛn lɔb gɛl yinne bas yaꞌas ka zunꞌus lɛn duoe gɔm-gɔm ka o ye ayei li nam pʋ paae zinꞌikanɛ ka o na mumɛ m saam laa. O da keŋ nɛ ala yʋꞌʋn ti paae zinꞌisiꞌa ka tititaꞌar maꞌae anwa bʋrr ziꞌe timm. Ka o nɔk o saam la zinꞌil tiig la gbinnin ka yɛl o saam la ye, fʋ zɔꞌɔm nwana, fʋ kuꞌom nwana ka tulig waꞌae kun ka o saam la buꞌos o ye, fʋ ye fʋ sid basim nɛ kpɛ ka kulɛɛ? Haya, ka biig la lɛb o puꞌa ni ka on nɛ o puꞌa ti laꞌam bɛ nɛ taaba ka nyaꞌal o saam la sianꞌarin, ka o saam zinꞌin tiig la gbinnin ala ti kpi. Biig la da pʋ lɛn vɛɛs anina yaꞌasa. Ka banꞌakanɛ da gbanꞌe o saam la nɔɔ da kena gbanꞌe o ka o bɛnꞌɛd nwɛnnɛ o saam la da bɛnꞌɛd siꞌem la. Saŋkan o puꞌa la mɛ da maal kaꞌalim ka kɛ o biig la da an biribiŋ ka mɔr puꞌa la. Ka daar yinne ka biig la puꞌa mɛ yɛl o sid la nwɛnnɛ o ma la da yɛl o siꞌem la ye, asɛɛ ka o yiis o saam la bɛ yin la. Tɔ, biig la ye o niŋ wala kiꞌisɛ ka duoe nɔk o saam la, ka zaŋ kuꞌom nɛ ganꞌar nɛ zɔꞌɔm nwamin, mɔr o keŋ ka maal nwɛnnɛ o saam da maal o saamyaaŋ siꞌem la. O da mɔr o ala ti paae zinꞌikanɛ nɛ tikanɛ gbinnin ka o saam da bas o saamyaaŋ ka o kpi la. Ka on mɔr o paae tiig la gbinnin zinꞌil o naae ka tulugi lɛbid la ka o saam la yɛl o ye, m biiga lɛm na ka m ye m yɛlif nɛ siꞌel. Ka biig la tulug lɛbna ka o yɛl o ye, fʋ nyɛ kɔnb banɛ digi nwa laa, fʋ saamyaaŋ kɔnbaa la ka fʋ ma da panꞌas man ka m nɔk m saam na bas kpɛla, on na kɔnbaa dig nwa la. Ala ka bʋnkan yʋꞌʋn kena paae man zina nwana la, fʋ yaꞌa bɔɔd sida ya, fʋ yaꞌa bas mam kpɛ ka m kpi nwɛnnɛ fʋ saamyaaŋ la, bʋnkanɛ da paae fʋ saamyaaŋ ka paae man zina la mɛ na ti kena paae fʋn. Ka biig la sid pʋ kiꞌisɛ ka nɔk o saam la lɛb kul ka ie nidib banɛ an kpɛɛmnam ka ba nwɛꞌ nuꞌus ka maal malima sʋꞌʋŋa, ka nɔk o saam yaaŋ la kʋʋr kul ti maal. Ka o saam la mɛ bɛɛ ala ti kena kpi ka o maal o saam la kʋʋr ka maal malima la wʋsa, ka banꞌakanɛ daa dɔl o saamyaaŋ ti kena paae o saam la, banꞌakan da pʋ lɛn gbanꞌe o. Ala ka li an yɛlkpan ye duꞌam kaꞌ diꞌema bʋnɛ. Maalim duꞌad sʋm ka saa ti nyɛ li sʋm.