Sɔlima:Wina'am na paas mɔɔg

Dau zʋnzɔŋo da bɛ ka o pu’a kpi ka kɛ ka onɛ o dakɔɔnr kpɛlim. Ban da kpɛlim la, ba sɔ'ɔ sɔ da pʋ mɔr pu’a. Ka lɛɛ mɔr na'aratita'aguobir yinne. Daar yinne ka biig la gɔs kii ka buol ye, Mba'a. Nannanna, m mi' ye fʋ anɛ m saam ka mam mɛ aan fʋ biig, amaa kɛl ka ti zaŋ ti na'ayimmir la kuosi tiaki da' na'anya'aŋi bas ka o na dua ka li nɔbig ka ti nyɛ nyɔɔdi n sʋŋi ti mɛŋ. O saam la da pʋ ki'isɛ ka yɛl yee, “M biiga, M pʋ ki'isi fɔ – Zaŋim naaf la giligi kuos, ka mam bɔɔd si'el anɛ ye, onɛ da'a naaf la si'em sa ka pʋ yɛl ye, Wina'am na paasɛ, fʋn da di'e, ka onɛ da' naaf la ka ye Wina'am na paas, fʋn di'em na ka Wina'am sid na paas.”

Haya, ka biig la zaŋ naaf la duoe mɔr gilib tat-tat-tat ɛɛnti paae lɔsi'a, ka ba da' yɔn pisi nɛ zakzak ka pʋ tiɛn yɛl ye Win na paasɛ, ka o mɔŋi ba. Ka sieba tis na'asa'a hali ka paas ligidi ka pʋ yɛl ye Win na paasɛ, ka o mɔŋi ba.

Biig la ti yuolim nɛ paae sɔ' yin, ka dau nɛ o dakɔɔnr zin'i samanin zaam nɔɔr ka o paae na ye o kuosidi o naaf la nɛ, ka biig la ye o saam da'am, ka o saam la ye o ka'a ligidi na da'a. Ka biig la yɛli o saam la ye, “Li ka'a mɔɔdi la ka fʋ kiaa ti'ili ti'il laa?” Ye o ti'igim mɔkil yinne da' naaf la ka Win'am na paas. Ka naaf la sɔb ye, ɛnhɛɛn, ye o saam yɛl o nɛ ye, onɛ da' ka yɛl ye Wina'am na paas on tisim o sɔb, ka Wina'am sid na paas.

Ka biig la zaŋ naaf la n tisi ba ka di'e o mɔkil ka pʋ’ʋsi ba sʋ'ʋŋa ka di'e o suor nɛ o mɔkilli kul. On ti tu'ae yir la ka saa kʋʋ fʋkid ilililiil, ka li mɛ an sisɔb paal, ka o paae samanin na, nɛ mɔɔg la lɔb zɔŋ za'anɔraʋgʋn, n tʋd zɔŋin ka kpɛlim zɔɔ dɔl yaŋir kpɛn' zakin ye o bian'as la'ad ka naan yina n pʋ'ʋs o saam la on daa kpɛlim si'em. Zi, ka on tʋd mɔɔg la zɔŋin la, o saam la pʋ baŋi. Biig la nan bɛ zakin la bian'asid la'ad ka saa la mɛ fukid la, ka waad mɔri o saam la ka o babin zɔŋin la ied sa'ad ye o nwɛ' kɛnbire nyu'e bugum, o saam la babin zɔŋin la ied sa'ad ye o nyu'e bugum ʋʋs la. O babili n keŋ nyɛnɛ mɔkil la digi ka o zi' onɛ digilɛ, ka o ba'aŋi fʋoi bi'ela n kɔɔ-kɔɔ n nwɛ’ kɛnbir la, on usig ka bugum la niŋ pillimm sansi'a la ka o nini mɛ kpɛlim nie nyain ka o nyɛt nyain. O biig la naan zakin yina la ka li malisi o saam la pamm ka o saam la kpɛlim bu'os o ye, ka anɔ'ɔnɛ zi mɔkil la na n digil ka man yisi la'aŋ bugum ye m ʋʋs waad ka m nini lakɛ? Ka biig la pʋ'ʋs o, on daa kpɛlim si'em ka zaŋ lin niŋ si'em wʋsa n tu'as o. Ka li maligim ma'ae ba wʋsa sʋnya galis.

Li pʋ nie bɛugɔ ka nidib pamm wʋm labaar ye yin la dim mɔr Wina'am na paas mɔɔg ka fʋ ya'a a zu'om ka die li bi'ela nyu'e ka li la'aŋ fʋ nini na nie ka fʋ nyɛt sʋ'ʋŋa. Ka zu'om nam yit kateŋ kateŋi n kenna di'esid mɔɔg la. Zu'om wʋsa ya'a kena, o yisidnɛ mɔɔd la bi'ela n tuanki tis o ka saa o naaf. O sɔb ya'a sid mɔre paae yiri niŋ bugum usig ka li ti la'aŋ bugum pielim pillimm la, ka o nini mɛ kpɛlim nie nyain ka o sɔb nyɛt sʋ'ʋŋa. Li niŋnɛ ala ka zu'omnam banɛ keŋi o sa'an la wʋsa yɔ naaf, naaf. Dau la nɛ o dakɔɔnr la da zaŋnɛ naaf yinne kuosi tis ka di'e mɔkil la, ka yʋ'ʋn panr hali n lieb arazak dim teŋ la pʋʋgin.

Lin ka ba ye, ya ya'a la'asi bɛ yin ka siakid taaba yɛlʋg, ka ya fara bɛɛ namisʋg pʋn tun'e ka zu'e si'em, bɛug sa, ya saa na paami ya mɛŋ ka ya sunya ma'ae la.

Italic text