Sɔlima: Ninkʋʋdiba Atan' Yɛla

Dapa atan' n da bɛ. Ba da anɛ dapkanda sʋ'ʋŋa. Ka daar yinne ka ba la'asi zin'ini gban'ɛ ye ba duom bɔ daalim la'ad, linɛ an kpana nɛ tiraad nɛ mali ka ba ya'a nyɛ sɔ' ban kʋ.

Ba gilig nɛ ala nwadisa atan' nɛ dabisa tan' ka pʋ nyɛ nidi kʋʋ. Ka kpɛlim mɔr ken nɛ ken. Daba anu daar ba nyɛ nɛ si'eli zi'e lallisa sabili wʋʋ nidnɛ, ka ba kpɛɛm la ye ba kem kʋʋ o sɔba, ye o sɔb ya'a pʋn tun'e ka mɔre laʋksia'a wʋsa ba na nyaŋi kʋʋ o. Ka oŋa giŋid kpɛ, ka oŋa giŋid kpɛ, ba ti keŋ paae nyɛ ka li ka'a nida, ka anɛ bɔtʋ ka ligidi pɛ'ɛl ma'aa ma'aa. Ka ba ye, aatɔ, ka nannanna nwa, ti ye ti niŋ ligidi nwa wala? Ka ba ye, ba na pʋdignɛ. Amaa ka ye li nar ka ba yis ligidi la n keŋ da'a daam na nu yiiga ka paam paŋi nyaan pʋdig ligidi la. Ka yis ligidi la bi'ela ye biig la kem da' danyʋʋr na ka ba nu.

Biig la keŋ la, o tɛn'ɛsi o pʋtɛn'ɛrin on na niŋ si'em kʋ banɛ kpɛlimi anina la ka vaae ligidi la wʋsa n sʋ'e. O yɛli o mɛŋ ye, o na da' nɛ daam la ka bɔ tikʋʋdim n lɔs daamin la n paae tisi ba ka ba nuu kpi ka o sʋ'oe ligidi la wʋsa. Ka sid da' daam la ka bɔ tikʋʋdim n lɔs.

Zi’ ka nidib ayi la kpɛlim la, ba mɛ gban'ɛnɛ ye ba kʋ biig kanɛ keŋ daam la da'ab la ka mɛ sʋ'oe ligidi la. Biig la n mɔr daam la paa na la, ka oŋa kiak kpɛ, ka oŋa kiak kpɛ, n kia o kʋ ka yʋ’ʋn zaŋ daam la nu nwan-nwan. Li pʋ yuugɛ, ka ba wʋsa mɛ kpɛlim kpi zin'ikan la nɔɔ ka ba sɔ'ɔsɔ' pʋ nyaŋi paam la'af baa yinne mɔri kuli ba yaanɛ.

Din ka Kusaas ye fʋ ya'a tɛn'ɛs bɛ'ɛd bɛɛ gban'e ye fʋ tʋm bɛ'ɛdi tisi fʋ tiraan, fʋn baŋim ye fʋ maanɛ fʋ mɛŋ la.