Wina'am Gbauŋ Lɛbigiri Pini'il Si'em

Li da anɛ Nasaayʋʋm 1962 ka tʋʋma yir linɛ ka da buon ye Summer Institute of Linguistics (SIL) ka nanannana ka li yʋ’ʋŋ an Ghana Institute of Linguistics, Literacy and Bible Translation (GILLBT) la da pin’il Wina’am gbauŋ lɛbigir Ghana nwa. Ba da pin’ilnɛ buudi ayuobʋ ni ka Kusaal da an yinne. Ti ba’abiig David nɛ o pu’a Nancy banɛ ka ba da pʋdi ba yʋda ye Adugraug nɛ Adugpu’ak la da sʋ’oe Kusaal tʋʋma. Ba da yinɛ Britain linɛ an Nasaateŋ la na. Ban nɛ ti karisaamnama Azong Punaad nɛ Adam Ana’ab nɛ Abina’ab nɛ Akon nɛ sieba da la’asi tʋm tʋʋma la. Ba da kpɛ’ɛŋi ba mɛŋi tʋm nɛ nimmua hali lɛbig Wina’am gbauŋ kaanbpaal la naae yʋʋm pii nɛ naasi pʋʋgin (1976). Ba da zuŋ Wina’am gbauŋ kan la nɛ 1977 yʋʋmpaal-nwadig dabisʋm pii nɛ anii daar. Kusaal Wina’am gbauŋ nwaa da an Wina’am gbauŋ kanɛ ka SIL tʋʋma la naae yiiga Ghana hali nɛ Gbauŋ sabʋlʋg sʋ’ʋlim wʋsa. Tinam banɛ an Yesu Kristo nya’adɔlib wʋsa kʋ maligim tam yʋʋm kaŋa yɛllɛ, bɔzugɔ yʋʋm kanla ka Wina’am da pian’ Kusaali tis Kusaas ka li kpɛn an nyain-nyain. Karisaamnam nɛ karimbiis nɛ Wina’am tʋmtʋmnib wʋsa da da’ Wina’am gbauŋ nwaa karim karindɔɔdin nɛ ba yaan ka li kɛ ka nidib pamm baŋ Yesu Kristo. Nasaayʋʋm 1999 ka ti Kusaal sʋ’ʋlim karinsaamnam nɛ Kusaal tʋʋma kpɛɛmnam da la’asi gban’e ye li sʋm ye ba maal nɔɔryinne sʋŋi lɛbig Kusaal Wina’am gbauŋ kaanbkʋdʋg la ka li kɛ ka ti paam Wina’am gbauŋ la mummi. Ba da gaans Karinsaamnam James Anaaf nɛ Peter Yisazua nɛ Robert Awindaug. GILLBT da zamisi ba, ban na niŋ si’em ka lɛbig kaanbkʋdʋg la sʋ’ʋŋa. Ba da kpɛ’ɛŋi ba mɛŋi lɛbig gbauŋ sieba. Amaa ban da gɔsidi ba karindɔɔd la, saŋa da kae ka be nyaŋidi tʋm nwɛnɛ din nar si’em. Alazug li yʋma yuobʋ nya’aŋ (2005) ka banɛ gɔsid Kusaal Wina’am gbauŋ lɛbigir la (Bible Translation Committee) da zaŋ karisaam Joshua Akelwin nɛ Moses Atiig ye ba tʋm tʋʋma la. Yʋʋm kanla ka Michael nɛ o yipu’a Hanneke nwɛ’ kuŋi ti Wycliffe Netherland ka ba siak ye ba na sʋŋ nɛ ligidi ka tʋʋma la keŋ tuon. Dr. Tony Naden onɛ mi’ Hebrew pian’ad karŋʋ sʋ’ʋŋa la da sʋŋ tʋmtʋmnib nwa. Tʋʋma la da paae saŋa sia ka di nar ye Michael Awimbil paas ka li keŋ tɔ’ɔtɔ. Ba da zaŋnɛ yʋm pii nɛ yuobʋ naae kaanbkʋdgʋg la ka maligim maal kaanbpaal la ka ba la’as ayi’ maal Wina’am Gbauŋ Kanɛ an Kassi la ka zuŋi li 2016 Nasaa nwadig dab pisi daar. Saalib ya’a nyaŋi karim Wina’am gbauŋ la ba buudi pian’adin, li nwɛnɛ kʋliŋi yɔgi tisi ba bɛɛ bugum na nie ba sʋʋginɛ. Li kɛtnɛ ka ba pin’in karindɔpaala ka sʋŋid karidɔbanɛ pʋn bɛ la ka ba nyɛt paŋ siig pʋʋgin. Nidib ya’a ti baŋ Yesu Kristo, li kɛtnɛ ka ba liebid wʋʋ yir yinne dim ka kɛt ka buudi kɔn’ɔb-kɔn’ɔb nyaŋi bɛ nɛ nɔɔryinne nɛ nɔŋilim.

Yesu Kristo da bu’os bu’os sieba Mak 4:21 ye, “Sɔ’ na nyu’oe fitir ka zaŋ pɛogʋ pibil bɛɛ o na zaŋi digil gadʋ lɛŋʋ nɛɛ? O kʋ zaŋi sʋn’ʋl si’el zugɔɔ?” Ala mɛnɛɛ, Kusaal Wina’am gbauŋ la anɛ nyɔvʋr fitir linɛ na sʋŋi tii ti bɛllim pʋʋgin. Ti ya’a karim gbauŋ nwa ka zamisi li sʋ’ʋŋa ka siaki bɛ wʋʋ gbauŋ la pa’ani ti ye bɛ si’em la, li na kɛ ka ti bɛllim tiaki an sʋ’ʋŋa ka ti bɛ nɛ taaba nɛ nɔŋilim nɛ sumalisim nɛ nɔɔryinne ka si’el wʋsa an sʋ’ʋŋa tisi ti.

Wina’am gbauŋ lɛbigir ka’ nid ayinne tʋʋma. Alazug m kʋ nyaŋi naae m sɔnsʋg nwa ka pʋ zaŋi m pʋ’ʋsim tis nimbanɛ sʋŋ laa. Ti yiiga pʋ’ʋsim kennɛ David nɛ o pu’a Nancy nɛ Karinsaama Apunaad nɛ Adam nɛ ban da ɛɛnb ɛɛnb sʋŋ ka tinam sʋn’ʋl la. Ti mɛ pʋ'ʋsid GILLBT nɛ Wycliffe Netherlands ban sʋŋi ti zin'is kɔn'ɔb-kɔn'ɔb la. Ala ka ti mɛ pʋ'ʋsid Kusaal sʋ’ʋlim karinsaamnam nɛ karimbiis wʋsa nɛ ban sʋŋ nɛ ligidi nɛ winsɔsʋg la. Ti mɛ pʋ’ʋsid John Sidsaya nɛ George Mbeck nɛ George Alalbil nɛ Moses Atiig nɛ Joshua Kelwin nɛ Samson Abuosi nɛ Kusaal tʋmtʋmnib wʋsa. Ti pʋ’ʋs tita’ar kɛnnɛ banɛ aan ti Kʋsaal tʋʋma komitii la. M mi’ ye nidib pamm sʋŋya ka Kusaal Wina’am gbauŋ nwa yina amaa ti kʋ nyaŋi sɔbi ba wʋsa yʋda kpɛlaa. Wina’am mi’ ba ka na niŋi ba zug barika.

Ti zaŋ Wina’am gbauŋ nwaa niŋ Wikipedia ni ka niŋ yadda ye li na sʋŋ banɛ wʋsa na karimi li.